En Dënschdeg de Moie war d'Justizministesch eis Invitée vun der Redaktioun.

D’Regierung krut d’lescht Woch vun den internationale Medien, déi d’Enquête „Openlux“ produzéiert hunn, eng Lëscht mat enger Dose Leit mat „luguberem Background“, déi a Lëtzebuerger Gesellschaften opdauchen. „Mir hunn natierlech déi Lëscht direkt un d’CRF (Cellule de Renseignement Financier) weiderginn“, sou déi gréng Justizministesch Sam Tanson en Dënschdeg de Moien hei op RTL. Et misst een alles dru setzen, fir datt et net virkënnt, datt esou Leit zu Lëtzebuerg Geschäfter kënne maachen, sou d’Ministesch. Si huet zouginn, datt och mat all de Kontrollmechanismen, déi et ginn, eppes „duerch d’Netz“ geet, mä dat dierf der Ministesch no „u sech net sinn“.

D‘Cellule de Renseignement, déi éischt Instanz an der Lutte géint de Blanchiment an d’Finanzéierung vum Terrorismus, gouf déi lescht Jore personell opgestockt. Op d'Fro, ob dat duergeet, sot d‘Justizministesch: „Et geet ni duer“. Et misst een op allen Niveauen all d'Moyene ginn, fir d‘Kontrollen esou gutt ewéi méiglech kënnen duerchzeféieren. Dat, fir sech de Reproche net musse gefale loossen, et géing een duerch e Manktem u Kontroll Saachen toleréieren. Dat géing ufänke bei den eenzele Professionellen am Secteur, sief et d'Affekoten, d'Notairen, d'Experts contables, d'Fiduciairen an d’Banken, déi eng éischt Iwwerpréiwung musse maachen a Problemer mellen. D'lescht Joer hunn d'Affekoten hei am Land eng 120 „déclarations de soupçon“ gemaach, wat méi wier ewéi a Frankräich, an och bei den Notairë wier d'Zuel eropgaangen, huet d‘Sam Tanson ënnerstrach.

Si huet dann och annoncéiert, datt si d'nächst Woch e Gesetzprojet deposéiere wäert, fir eng zousätzlech 20 „Référendairen“ anzestellen. Dat wiere Juristen an Ekonomisten, déi den eenzelen Acteuren an der Chaîne kënnen hëllefe bei Dossieren, déi dacks ganz komplex wieren an international Verstréckungen hätten.

Steieroase ?

Ee weidere Virworf aus der Openlux-Enquête ass deen, datt Lëtzebuerg – trotz Fortschrëtter déi lescht Joren nach ëmmer eng Steieroase wier. De Finanzminister Pierre Gramegna hat e Méindeg op der Tëlee gesot, d’Leit kéimen net wéinst de Steieren op Lëtzebuerg. Um Internet beschreiwen awer Professioneller vum Finanzsecteur selwer, Societéiten, déi et erlaben, Verméigen „steier-effizient“ ze „strukturéieren“.

D’Sam Tanson huet erkläert, datt d’Welt globaliséiert ass an et an Europa de Bannemaart gëtt. Dat géing dozou féieren, datt „Fluxen zirkuléieren“. Wuel hätt d’Europäesch Unioun sech déi lescht Jore vill Reegele ginn, déi Lëtzebuerg och transposéiert huet, fir ze verhënneren, datt ee Land dovunner profitéiert, datt eng Gesellschaft an engem anere Land manner Steier bezilt ewéi se soll. Nach wier et awer och esou, datt een an engem Kader ass „wou et effektiv och eng Steierkonkurrenz gëtt“.

Et géing ganz ënnerschiddlech Instrumenter an deem Beräich ginn, mee an engem Kader, deen europäesch festgeluecht ass, esou d’Sam Tanson. D’Justizministesch sot, Lëtzebuerg misst hei den „Accent“ dorop leeën, datt déi Instrumenter op eng transparent Aart a Weis funktionéieren an déi auslännesch Steierverwaltunge wëssen, wat hei zu Lëtzebuerg passéiert.

"Et geet wierklech net drëms, de Papp ofzeschafen"

Op d’Polemik, déi d’ADR lassgetrëppelt huet, datt déi Gréng wéilten de „Papp“ ofschafen, huet d’Sam Tanson esou reagéiert: „Et geet hei iwwerhaapt net ëm d’Familljekonstellatioun an et geet och wierklech net drëms, de Papp ofzeschafen“. Papp wier een, well een déi Relatioun mat sengem Kand huet an de Papp wier, genee ewéi d’Mamm, „eng extrem wichteg Funktioun an der Famill“. Dat géing net duerch e Gesetz gereegelt ginn, mee duerch d’Bezéiung.

D’gréng Justizministesch huet bedauert, datt et bei der Polemik guer net méi ëm d’Saach géing goen, nämlech dem Kand, dat adoptéiert ass oder duerch "Procréation médicalement assistée" op d’Welt koum, d’Chance ze ginn, erauszefannen, wie seng biologesch Eltere sinn. Elo wier d’Diskussioun verzerrt ginn, et géing versicht ginn, bewosst Polemik ze maachen, fir de politesche Géigner kleng ze maachen. Den Terme „parent“ gouf schonn unerkannt, mam Gesetz iwwert de Mariage fir jiddereen.

Op de soziale Reseaue gouf d’Sam Tanson wéinst der "Polemik" attackéiert. Mat politeschen Attacke kéint si liewen, mee Attacken op hiert Ausgesinn an op hir Famill - „dat geet net“. Am Netz wier een net an engem gesetzfräie Raum. D’Justizministesch konnt nach net soen, ob se Plainte wäert maachen, si hätt nach keng Zäit gehat, fir sech d’Attacken am Detail unzekucken.

Invité vun der Redaktioun: Sam Tanson

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu, op der App an am RTL Play ass d'Emissioun dono och am Replay ze fannen.