E Mëttwoch de Moie war de CEO vu Luxembourg for Finance eisen Invité vun der Redaktioun.

Steiere sinn een Atout, deen Investisseuren op Lëtzebuerg lackelt, mä net deen Determinanten. Dat sot de CEO vu Luxembourg for Finance, der Promotiounsagence vun der Finanzplaz, déi vum Staat finanzéiert gëtt, e Mëttwoch de Moien hei op RTL.

Den Nicolas Mackel huet erkläert: Wéi eenzel Persounen, déi bei hirer Steiererklärung kucke wat se kënnen ofsetzen, maachen dat och Gesellschaften „am Groussen an am Komplizéierten“. Dat alles wier awer am Kader vun nationalen an europäesche Reegelen. „Steiereffizienz ass näischt aneschtes ewéi d’Leit beroden, a soen wat kënnt Dir maachen a wat net“, esou de CEO vu Luxembourg for Finance.

Wann Entreprisen op Lëtzebuerg kommen, da géinge se „quasi an alle Fäll“ no de Steiere froen, mee dat wier net „determinant“. Den Nicolas Mackel huet als Beispill d’Holdinge genannt, déi awer deelweis op engem europäesche Regime géinge baséieren. Firwat géingen d’Entreprisen dat dann net an anere Länner maachen? Op déi Fro, déi hie selwer gestallt huet, huet den Nicolas Mackel geäntwert: „well Lëtzebuerg dorobber spezialiséiert ass“.

Lëtzebuerg hätt ënnert anerem e gesetzleche Kader, deen net nëmme géing hëllefen Transaktiounen an Investissementer ze maachen, mä se och ze sécheren. D’Geriichter zu Lëtzebuerg wieren och an deem Beräich spezialiséiert an et kéint een op Englesch plädéieren, wat a ville Länner net méiglech wier. D'selwecht bei der Iwwerwaachungskommissioun vun der Finanzplaz (CSSF) wou „vum Portier erop bis bei de Generaldirekter“ all Mënsch géing Englesch schwätzen.

Kontroll a Blanchiment

Op d'Fro, ob méi Kontroll der Finanzplaz géing Angscht maachen, sot de CEO vu Luxembourg for Finance: "guer net". Et wier kloer, datt Lëtzebuerg gär eng propper Finanzplaz wier. Et kéint och sinn, datt verschidde Leit oder Firmen op Lëtzebuerg kéimen, an eréischt duerno opfalen. Mä da wier nach ëmmer eng Kontroll do vun de Banken via Transaktiounen. Den Nicolas Mackel huet d'Fro opgeworf, ob international Medien net och missten déi Fäll erwänen, wou Banken hir Relatioune mat hire Clienten gestoppt hätten. Et wier am Fong egal, wann eng Societéit hei am Land ass, d'Fro wier, wat duerno domadder geschitt.

Méi Kontroll kann hie sech am digitale Beräich virstellen: „Do ginn et och ëmmer méi digital oder technologesch Léisungen, fir esou Kontrollen ze maachen, ewéi kënschtlech Intelligenz“. Léisungen duerch déi Lëtzebuerg an Zukunft sécher nach vill besser opgestallt kéint sinn, sou den Nicolas Mackel.

Openlux, dat wier an den Ae vum Nicolas Mackel d’Resultat vun der Aarbecht vu Journalisten a Leit, déi den Erfolleg vun der Lëtzebuerger Finanzplaz net géinge verstoen, oder net wéilten acceptéieren. Déi Leit géingen eng Equatioun maachen, datt ee klengt Land mat vill Succès nëmme mat Gefuddels méiglech wier. Dat wier awer net de Fall, well Lëtzebuerg als Member vun der europäescher Unioun déi selwecht Reglementatiounen applizéiert, ewéi déi aner Staaten, esou de CEO vu Luxembourg for Finance. Als grouss Finanzplaz wier ee sech senge Responsabilitéite bewosst.

Invité vun der Redaktioun: Nicolas Mackel

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu, op der App an am RTL Play ass d'Emissioun dono och am Replay ze fannen.