En Dënschdeg war de CEO vu Luxembourg for Finance eisen Invité vun der Redaktioun.

De G7 ass sech iwwert eng global minimal Betribssteier eens ginn de Weekend. De Lëtzebuerger Finanzsecteur gesäit deen Accord ganz entspaant, sou de CEO vu Luxembourg for Finance. Den Nicolas Mackel sot den Dënschdeg de Moien hei op RTL, den Accord vum G7 wier eng Etapp vun engem Wee, dee Lëtzebuerg schonn ëmmer matgaange wier. Et wier trotzdeem effektiv eng "historesch" oder "interessant" Etapp, well wann déi nei international Betribsbesteierung Realitéit gëtt, da géinge multinational Konzerner net méi just do Steiere bezuelen, wou se hire Sëtz hunn, mä och do, wou se verkafen. Net just de Benefice géing besteiert ginn, mä och de Revenu oder den Ëmsaz.

Den Nicolas Mackel huet awer widderholl, datt de Succès vun der Finanzplaz bei Wäitem net nëmme steierlecher Natur wier. Op d’Ausso, datt international Firmen awer och op Lëtzebuerg kommen, well et hei steierlech ganz attraktiv Gesellschaftsforme gëtt, huet de CEO vu Luxembourg for Finance geäntwert, datt international Firmen aner Grënn hunn, fir Gesellschaften ze grënnen. Dat hätt dem Nicolas Mackel no domadder ze dinn, datt déi Gesellschaften hei am Land "Assurancen" ginn an datt Lëtzebuerg "Triple A" notéiert gëtt. Dat géing d’Firmen "berouegen". Donieft huet hien op all d‘Bestriewunge vun der EU oder vun der OECD higewisen, déi dozou gefouert hätten, datt Steieroptimiséierung haut "net onméiglech, mä vill méi schwéier ass".

Datt den US-Onlinehändler Amazon d’lescht Joer trotz ëmmer héijem Ëmsaz keng oder bal keng Steiere via säin europäesche Sëtz am Land bezuelt huet, dat wier dem Nicolas Mackel no dorobber zeréckzeféieren, datt Amazon seng Revenue géing reinvestéieren an dowéinst Pertë maachen. Datt d’Verméige vum Chef vun Amazon trotzdeem geklommen ass, dat wier dorobber zeréckzeféieren, datt d’Aktiewäerter vu senger Firma geklomme sinn. Den Nicolas Mackel huet an deem Zesummenhang awer dem Jeff Bezos geroden, sech e bessere Marketing zouzeleeën. Wann de Jeff Bezos kritiséiert gëtt, well e sech eng Yacht vu 500 Milliounen Dollar keeft, hätt e besser, hie géing Philanthropie maachen.

Och wann d’Steieren net de Grond fir de Succès vun der Lëtzebuerger Finanzplaz wieren, sou huet den Nicolas Mackel trotzdeem virdru gewarnt, Steieren ëmmer nëmmen eropzesetzen. Steierhaussë wiere fir eng Rei Länner ewéi "Zocker" oder eng "Drog", mä ekonomesch gesi keng Léisung.

Invité vun der Redaktioun: Nicolas Mackel

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.