Si stinn zanter 92 Wochen onënnerbrach op der éischter Plaz an der Weltranglëscht. Zanter 2016 dreet och de Bob Jungels säin Deel zum Erfolleg bäi.

Säin Teammanager Patrick Lefèvre huet hie bei der Ekippepresentatioun mat de Wierder virgestallt, hie wier ee "special rider", dee sech ausgesicht hätt, Etappefuerer ze sinn. Ma sech elo och géing drun erënneren, wéi hien als Junior bei de Klassiker am Norde gewonnen hätt. A stellt sech viru säi Fuerer.

Fir op Weltniveau Leeschtung ze bréngen, muss einfach alles stëmmen an do kënnt de Kapp, awer och d’ganz Ekipp mat an d'Spill. De laangjärege Soigneur Peter de Coninck wunnt zanter 15 Joer zu Lëtzebuerg a masséiert de Sportler net nëmmen d'Been, mä hie kennt och d’Erfollegsrezept vun der belscher Ekipp.

Den Ekippegeescht schéngt bei hinne wierklech besonnesch ze sinn. 2019 war d’Joer vum Julian Alaphilippe, mat deem de Bob Jungels dacks d’Zëmmer deelt. No ënnert anerem der Victoire bei der Strade Bianchi, Mailand San Remo an der Flèche Wallone fiert hie beim Tour 2 Wochen a Giel. D’Stäerkt vum sougenannte "Wolfpack" mécht dobäi aus, wéi och déi Bescht zesummenhalen.

Beim Bob huet sech fir dës Saison elo net alles, awer villes geännert. No fënnef Joer an de Schwäizer Bierger ass hie virun ee puer Deeg zréck op Lëtzebuerg geplënnert. Dëst Joer viséiert hie beim Tour de France och net méi de General, mä éischter Etappen. A freet sech mat sengen Teamkolleegen op d’Klassiker.

Bei der Ekippevirstellung huet de Patrick Lefèvre verzielt, datt et dëst Joer guer net esou einfach gewiescht wier, de 27 Fuerer bei insgesamt 79 Courssen an 272 Coursedeeg de passende Programm zesummenzestellen. Och well dëst Joer ënnert anerem fir de Bob Jungels Tokio usteet.