An 10 Klasse goufen d’Championen am Zäitfuere gesicht. An den zwou Haaptkategorien konnte sech allkéiers d’Favoritten duerchsetzen. 21 Kilometer stounge bei den Hären op engem selektive Parcours um Programm.
Bei de Profien: Vum Depart un huet de Bob Jungels (Deceuninck Quick-Step) gewisen, dass hien och an den nächste Méint de rout/wäiss/bloen Trickot vum Contre la Montre op senge Schëllere wëll hunn. Op der Arrivée hat hien eng Avance vu 45 Sekonnen op den Alex Kirsch. Op déi drëtte Plaz ass de Kevin Geniets gefuer. Hien hat e Retard vun 52 Sekonnen.
Bob Jungels: Ech muss soen, ech hat ee gudden Trëtt. Virun allem an deene Partie wou ech meng Kraaft konnt ausspillen, hunn ech gemierkt, dass Zoch op der Pedall war. Ech weess elo net wéi et vu baussen ausgesinn huet, mä ech hat ee gutt Gefill. Ech hunn nom Dauphiné 3 Nuechten 10-11 Stonne geschlof an och soss doheem näischt gemaach, wéi am Bett geleeën. Dat schéngt gutt geklappt ze hunn.
