E Samschdeg stoung zu Ettelbréck bei der Däichhal den nationale Championnat am Cyclocross um Programm.

Resumé Cyclocross-Championnat / Reportage Lynn Kayser

De Loïc Bettendorff wënnt d'Course an ass Champion bei den Espoiren. De Scott Thiltges ass Zweete ginn an domadder huet hie sech no 2017 nees den Titel bei der Elite geséchert. E bessert Enn vu senger Karriär hätt sech den Alzenger net kënne virstellen: "Ech hat mir dat virgeholl an et huet funktionéiert. Méi schéi kann een eng Karriär net ophalen. [...] Natierlech hätt ech d'Course gäre gewonnen, mä mäi Fokus louch vun Ufank un op der Elitecourse an hie war haut einfach ganz e bësse méi staark."

Zweete gouf bei der Elite de Raphaël Kockelmann an Drëtten de Ken Conter. Bei den Espoiren ass d'Plaz 2 fir de Mats Wenzel virum Cédric Pries.

Bei den Dammen huet sech d‘Christine Majerus hiren 12. Titel am Cyclocross geséchert. Um Podium stoungen nach d‘Isabelle Klein an d‘Suzie Godart. D'Christine Majerus huet no der Course matgedeelt, datt si d'WM net fiert, engersäits, well si net mat hire Resultater zefridde war an deementspriechend wier den Opwand, fir an d'USA op d'WM ze goen, ze grouss. Weider hätt si sech deen Ament och net richteg op d'Saison op der Strooss kënne preparéieren.

Fir d'Lëtzebuerger Championne ware virun allem déi lescht zwou an eng hallef Wochen alles anescht wéi einfach. Déi uerg Chute vun hirer Coequipière Amy Pieters huet d'Christine Majerus déif getraff.

Extrait Christine Majerus

"Déi lescht Woche woren net einfach, et ass schwiereg, sech op Courssen ze konzentréieren, wann ee weess, dass déi bescht Frëndin ëm d'Liewe kämpft. Jo déi lescht Wochen d'Resultater wore wéi se woren. Ech mengen, wann ee moies schlecht Nouvelle kritt, da kann ee mëttes keng gutt Course fueren. Ech hunn all Respekt fir déi, déi dat kënnen trennen an dann awer gutt Resultater fueren, mä dat ass bei mir absolutt net de Fall gewiescht. Ech hoffen, datt sech d'Situatioun nach fir hatt verbessert. Et ass elo zeréck an Holland. Ech mengen dat ass gutt fir hatt a seng Famill. An da musse mir him eben déi Zäit ginn, déi et brauch an dann hoffe mir, datt et dat iwwersteet."

Bei den Espoirinne war wéi erwaart d‘Marie Schreiber déi Bescht. Fir si geet de Bléck elo a Richtung WM,wou et d'Zil ass, fir an d'Top 10 ze fueren: "Wann ech kucken op deene Weltcupen, wou ech gefuer sinn an net elo en technesche Problem mam Vëlo hat oder sou, war ech ëmmer sou an den Top10, dat heescht et ass och realistesch. A wéi gesot, wann ech e gudden Training hunn, da wier eng 7. Plaz, wéi op der EM, scho cool awer."

D‘Maïté Barthels an d‘Nina Berton si bei den Espoirinnen 2. an 3. ginn.

Bei de Juniorinne stoungen d'Layla Barthels, d‘Liv Wenzel an d‘Anouk Schmitz um Podium.

An enger ganz spannender Course huet sech de Mathieu Kockelmann de Rout-Wäiss-Bloen Trikot bei de Juniore geséchert. De Favorit vun Déifferdeng huet sech am Sprint virum Mil Morang duerchgesat. Den Niels Michotte stoung nach als Drëtten um Podium.

Beim nationale Championnat am Cyclocross huet sech de Rick Meylender den Titel bei den Debutante geséchert. Den Dippecher huet d‘Course dominéiert. Fir hien ass et déi 12. Victoire an dëser Saison. Um Podium stoungen nach de Jonah Flammang-Lies an den David Loschetter.

Bei de Meedercher war d‘Gwen Nothum dat Bescht. D‘Plazen 2 an 3 ware fir d‘Lisi Schmitz an d‘Lena Lallemang.

Bei de Masters huet sech iwwerraschend de Pascal Triebel den Titel geséchert. Hien huet sech am Verlaf vun der Course no vir geschafft a sech am leschten Tour op déi éischt Plaz gesat. Den Olivier Paderhuber ass 2. ginn an den Tom Flammang ass op déi 3. Plaz komm.

Fotoe vum Rom Hankes