No der verréckter 4:3-Victoire vun Diddeleng zu Hueschtert an dem Championstitel vum F91 stoung de Mäzen Flavio Becca RTL Ried an Äntwert.

De Flavio Becca huet sech um Sonndeg iwwert de 15. Championstitel vum F91 Diddeleng gefreet an op d'Fro hin, ob et him net géing leeddoen, den F91 Diddeleng kuerz- bis mëttelfristeg ze verloossen, huet hie geäntwert, datt hie sech jo ee Joer Bedenkzäit géing ginn an nach mat Iwwerraschunge misst gerechent ginn.

Dat nämmlecht géif och fir den Dossier 1. FC Kaiserslautern gëllen.

AUDIO: De Flavio Becca um Mikro vum Serge Olmo

Ronn 20 Joer ass de Flavio Becca elo Sponsor an der Forge du Sud. An där Zäit goufen also 15 Championstitelen a 7 Victoiren an der Coupe de Luxembourg gefeiert, de 26. Mee kann esouguer nach eng dobäi kommen.

E Sonndeg virum Match géint Hueschtert huet de President vum F91, Romain Schumacher, schonn ugedeit, datt d'Ära Becca zu Diddeleng awer net komplett op en Enn geet ...

Fir e gewësse Suspens hat och dem Flavio Becca seng Ukënnegung vun Iwwerraschunge gesuergt ...

An de leschte Méint huet den F91 fir onvergiesslech Momenter erlieft. Besonnesch an der Gruppephas vun der Europa League.

No oder nieft Diddeleng kënnt jo elo och Hesper an d'Futtball-Universum vum Sportsponsor. Mat Virton ass de Lëtzebuerger Geschäftsmann am Moment gutt ënnerwee, an déi zweet belsch Liga ze steigen.

Vill gouf an de leschte Wochen och iwwert den Engagement beim däitschen Traditiounsclub, den 1. FC Kaiserslautern, geschwat. De Flavio Becca selwer wollt awer zu der aktueller Situatioun näischt soen.