Fir d'Olympia Qualifikatioun feelt iwwer 50 Meter Crawl um Enn nëmmen 1 Honnertstel.

D'Julie Meynen huet dann och e Samschdeg de Lëtzebuerger Rekord iwwer 50 Crawl verbessert an ass op déi excellenten 12. Plaz komm. An den Halleffinallen ass de Chrono fir d'Lëtzebuergerin no 24 Sekonnen an 78 Honnertstel stoe bliwwen. Domadder bleift déi 21 Joer al Schwëmmerin eng éischte Kéier ënnert der Schallmauer vu 25 Sekonnen a verbessert hiren eegene Rekord ëm 22 Honnertstel.

AUDIO: Reaktioun vum Julie Meynen

Fir d'Olympia Qualifikatioun feelt um Enn nëmmen 1 Honnertstel. Iwwer 100 Meter Crawl hat d'Julie Meynen d'Norm fir d'Olympesch Spiller ëm 6 Honnertstel verpasst. Et gesäit also gutt aus, datt nieft dem Raphaël Stacchiotti nach een zweete Schwëmmer aus dem Grand-Duché d'nächst Joer zu Tokio mat dobäi wäert sinn. D'Julie Meynen huet jo nach e puer Méint Zäit fir d'Norm iwwer béid Strecken ze packen.

D'Julie Meynen ass déi éischt Lëtzebuergerin déi bei enger WM an den Halleffinalle stoung an et ass och déi beschte Plazéierung fir d'FLNS déi et jee gouf. De Laurent Carnol war 2011 zu Shanghai an 2013 zu Barcelona de 15. ginn a fir de Raphaël Stacchiotti war et zu Gwangju déi 16. Plaz.

Qualifikatioun fir d'Halleffinallen

Op der Weltmeeschterschaft am Schwammen zu Gwangju a Südkorea huet sech d‘Julie Meynen an der Nuecht op e Samschdeg fir d‘Halleffinallen iwwer 50 Meter Crawl qualifizéiert. D‘Lëtzebuergerin huet no 25 Sekonnen a 7 Honnertstel ugeschloen a sech als 16. an de Virleef klasséiert. D’Halleffinalle gi kuerz no 13 Auer eiser Zäit geschwommen.

AUDIO: Eng éischt Reaktioun vum Julie Meynen

De Lëtzebuerger Rekord vum Julie Meynen steet zanter Enn Juni bei 25 Sekonnen. D‘Qualifikatiounszäit fir d‘Olympesch Spiller zu Tokio ass 24 Sekonnen a 77 Honnertstel.

Da gouf et och nach een neie Lëtzebuerger Rekord fir d’4x100 Meter Mixed-Crawl-Staffel. D’Julie Meynen, d‘Monique Olivier, de Julien Henx an de Raphaël Stacchiotti hu mat enger Zäit vun 3 Minutten 33 Sekonnen a 55 Honnertstel deen ale Rekord ëm 1 Sekonn a 35 Honnertstel verbessert. Um Enn ass et déi 18. Plaz ënner 35 Ekippen.