An der Ukraine ass et dem Gerson Rodrigues gelongen säin éischte Gol mat Dynamo Kiew ze schéissen.

Um Sonndeg stoung den Olivier Thill mat Ufa um Terrain mee muss sech leider mat 0:1 Auswäerts géint Arsenal Tula geschloe ginn. De Lëtzebuerg stoung an den éischten 11 mee gouf an der Halschent ausgewiesselt.

An der ieweschter Ukrainescher Divisioun war de Marvin Martins mat Karpaty Lwiw am Asaz a spillt 1:1 géint Mariupol. De Lëtzebuergeschen Nationalspiller stoung de ganze Match als Rietsverdeedeger um Terrain.

Am DFB-Pokal verléiert de Maurice Deville an engem spektakuläre Match mat Waldhof Mannheim mat 3:5 géint Eintracht Frankfurt. Den 1:0 an der 3. Minutt konnt de Lëtzebuerger virbereeden.

Knapps weider koum dogéint de Laurent Jans mat Paderborn mee huet awer richteg missen zidderen. Se hu géint Rödinghausen (Regionalliga) nämlech missen bis an d'Eelefmeterschéisse goen nodeems et no 90 Minutten 3:3 stoung an an der Verlängerung kee Gol gefall ass. Do ass d'Ekipp ëm de Kapitän aus der Nationalekipp awer méi cool bliwwen a stinn an der nächster Ronn. De Laurent Jans stoung de ganze Match um Terrain.

A Frankräich an der Ligue 1 konnt d'Ekipp vum Gerard Lopez, OSC Lille, mat 2:1 géint Nantes gewannen an dat duerch 2 Goler vum Osimhen.

A Schweden gewënnt de Lars Gerson mat Norrköping mat 2:0 géint Elfsborg an de Lëtzebuerger stoung déi ganz 90 Minutten um Terrain. An der Tabell steet Norrköping no 19 Spilldeeg mat 31 Punkten op der 7. Plaz.

Samschdeg

An der Ukraine stoung de Gerson Rodrigues fir déi éischt kéier an der Startformatioun an dat direkt am 2. Match. De lëtzebuergeschen Nationalspiller sollt dëst Vertrauen sengem Trainer dann och direkt zeréck bezuelen a konnt an der 39. Minutt mat sengem 1. Gol fir Dynamo Kiew den 1:1 am Spëtzematch géint Donezk markéieren.

Allerdéngs sollt dëse Gol awer net duergoen a Kiew verléiert mat 1:2. De Rodrigues huet de ganze Match duerchgespillt.

An der hechster Schwäizer Divisioun war de Christopher Martins mat de Young Boys Bern géint St. Gallen am Asaz a ka sech mat 3:2 duerchsetzen. De Lëtzebuerger stoung iwwert déi ganz Spillzäit um Terrain.

An der Regionalliga Südwest spillt de Florian Bohnert mat Mainz 05 II 1:1 géint den FSV Frankfurt. De Lëtzebuerger stoung déi ganz 90 Minutten um Terrain.

Freideg

An Däitschland gouf e Freideg den Owend déi 1. Ronn am DFB-Pokal lancéiert. Mam Jeff Saibene war hei ee Lëtzebuerger mat senger Ekipp am Asaz. Um Enn gouf et awer eng Néierlag fir Ingolstadt. D'Ekipp vum Saibene huet sech no 90 Minutte misse mat 0:1 géint Nürnberg geschloe ginn.

Am Yankee Stadium zu New York konnt de Maxime Chanot mat sengem Veräin FC New York City eng 3:2-Victoire géint Dynamo Houston feieren - deen an der 58. Minutt agewiesselte Castellanos huet an der 3. Minutt vun der Nospillzäit in extremis fir den Erfolleg um 22. Spilldag fir City gesuergt.

Den US Orléans aus der Ligue 2 ass e Freideg den Owend auswäerts mam Vincent Thill op den Ofsteiger Guingamp getraff. D'Heemekipp ass an der 35. Spillminutt duerch de Rodelin a Féierung gaangen a konnt dëse Score iwwert déi 90 Minutte retten. Den Thill stoung fir seng Faarwen iwwert déi komplett Spillzäit um Terrain.