E Sonndeg am Laf vum Dag gouf an der EM-Qualifikatioun an de Gruppen C, E, G an I gespillt.

Hei konnt sech Holland mat 2:1 géint Wäissrussland duerchsetzen, Ungarn huet den Aserbaidschan mat 1:0 geklappt, d'Belsch wënnt 2:0 am Kasachstan, Schottland iwwerrennt San Marino mat 6:0 a Russland wënnt däitlech an Zypern. E Sonndeg den Owend stoungen dann nach 4 weider Matcher um Programm. Hei gouf et Victoirë fir Russland, Däitschland an Éisträich. Wales a Kroatien deelen 1:1.

Grupp C

Wäissrussland - Holland 1:2

0:1 Wijnaldum (32. Minutt), 0:2 Wijnaldum (41. Minutt), 1:2 Dragun (54. Minutt)

Holland kënnt der EM-Qualifikatioun ëmmer méi no. E Sonndeg den Owend huet d'Oranje sech mat 2:1 a Wäissrussland behaapt a kënnt domat elo op 15 Punkten aus 6 Matcher. Fir d'Hollänner huet zweemol de Wijnaldum getraff. De Gol vum Dragun zum Ufank vun der zweeter Hallschent sollt de Wäissrussen net duergoen.

Estland - Däitschland 0:3

0:1 Gündogan (52. Minutt), 0:2 Gündogan (58. Minutt), 0:3 Werner (71. Minutt)

De Match hat fir Däitschland net wierklech gutt ugefaangen, well no 14 Minutte ware si nëmmen nach zu 10. Do war et nämlech den Emre Can, deen ze spéit koum a Rout gewise krut. Estland hat an der éischter Hallschent direkt e puer Mol d'Chance fir a Féierung ze goen, ma si hunn hir Chancen net genotzt. Dëst sollt sech an der zweeter Hallschent rächen, well do huet den Ilkay Gündogan innerhalb vu 6 Minutten direkt zweemol markéiert an huet domat de Match entscheet. An der 71. Minutt huet hien dunn de Ball opgeluecht fir de Werner, dee fir d'3:0-Schlussresultat gesuergt huet.

Grupp E

Ungarn - Aserbaidschan 1:0

1:0 Korhut (10. Minutt)

Ungarn behält weider d'Chance, sech fir d'EM ze qualifizéieren, dat duerch eng knapp Victoire géint den Tabelleleschten Aserbaidschan. De Korhut huet an der 10. Minutt den eenzege Gol vum Match geschoss.

Wales - Kroatien 1:1

0:1 Vlasic (9. Minutt), 1:1 Bale (45. Minutt)

Den Tabelleleader Kroatien war e Sonndeg den Owend op Besuch am Cardiff City Stadium an et hat fir si och richteg gutt ugefaangen, well si konnte schonns no 9 Minutten duerch de Vlasic a Féierung goen. An der drëtter Minutt vun der Nospillzäit vun der éischter Hallschent konnt de Gareth Bale dunn den Ausgläich markéieren. Kroatien war e Sonndeg wuel déi besser Ekipp, mä um Enn ass et beim 1:1 bliwwen. Och déi 9 Minutten Nospillzäit hunn näischt méi bruecht.

Grupp G

Slowenien - Éisträich 0:1

0:1 Posch (21. Minutt)

Éisträich bleift un der Spëtzt drun, dat wéinst enger knapper Victoire géint Slowenien. De Posch hat an der 21. Minutt den eenzege Gol vun der Partie geschoss. An der 89. Minutt kruten d'Slowenen dunn och nach Rout, dat a Persoun vum Popovic.

Polen - Nordmazedonien 2:0

1:0 Frankowski (74. Minutt), 2:0 Milik (80. Minutt)

Polen konnt e Sonndeg den Owend d'Tabellespëtzt mat Erfolleg verdeedegen, dat duerch eng 2:0-Victoire géint Nordmazedonien. De Frankowski an de Milik hunn d'Goler geschoss.

Grupp I

Kasachstan - Belsch 0:2

0:1 Batshuayi (21. Minutt), 0:2 Meunier (53. Minutt)

Och am 8. Match ass géint d'Belsch kee Kraut gewuess. 8 Matcher, 8 Victoiren, besser geet et net an dat dann nach mat engem Golverhältnis vun 30 zu 1.

Schottland - San Marino 6:0

1:0, 2:0 an 3:0 McGinn (12., 27. a 45. Minutt), 4:0 Shankland (65. Minutt), 5:0 Findlay (67. Minutt), 6:0 Armstrong (87. Minutt)

D'Schotten hu sech e Sonndeg e bësse Frust vun der Séil geschoss. Nodeems si déi lescht 4 Matcher alleguerte verluer haten a schonns keng Chance méi op eng Qualifikatioun haten, hu si géint San Marino ganzer 6 Goler markéiert. Fir San Marino geet et weider biergof. Si hunn no 8 Matcher e Golverhältnis vun 0 zu 43 an och 0 Punkten.

Zypern - Russland 0:5

1:0 Cheryshev (9. Minutt), 2:0 Ozdoev (23. Minutt), 3:0 Dzyuba (79. Minutt), 4:0 Golovin (89. Minutt), 5:0 Cheryshev (92. Minutt)

D'Russen hunn och um 8. Spilldag hir Stäerkt op en Neits bewisen, dat bei der 5:0-Victoire géint Zypern. D'Russe waren dominant an zanter der 28. Minutt och nach an Iwwerzuel. 7. Victoire am 8. Match fir d'Ekipp ëm Cheryshev a Co.