An der Ukrain huet Lwiw 2:2 géint Mariupol gespillt. Iwwerdeems huet de Maurice Deville mat Mannheim 3:0 zu Grossaspach gewonnen.

E Sonndeg huet am Russesche Championnat Ufa auswäerts géint Orenburg 0:0 gläichgespillt. Den Olivier Thill souz bei Ufa déi 90 Minutten op der Bänk.

An der Ukrain huet Dynamo Kiew auswäerts géint Schachtar Donezk mat 0:1 de Kierzere gezunn. De Gerson Rodrigues stoung an der Startformatioun. No enger Gieler Kaart an der 50. Minutt gouf hien an der 62. Minutt ausgewiesselt.

Beim 1:1-Remis tëscht Apollon Limassol an Apoel Nikosia souz de Vahid Selimovic bei den Haushären de ganze Match op der Bänk.

Samschdeg

An der Ligue 1 hat den OSC Lille mam Lëtzebuerger Investor Gerard Lopez den FC Metz op Besuch. No 90 Minutten trenne sech béid Ekippe mat engem 0:0. De Resumé vum Match fannt Dir bei de Kollege vum 5 Minutes.

An der däitscher Futtball-Bundesliga bleift Paderborn duerch eng 0:1-Defaite weiderhin op der leschter Tabelleplaz. De Lëtzebuerger Laurent Jans stoung 79 Minutten um Terrain. Mainz huet iwwerdeems 2:3 géint Union Berlin de Kierzere gezunn. De Leandro Barreiro souz 90 Minutten op der Mainzer Bänk.

An der 3. Liga an Däitschland huet Waldhof Mannheim zu Grossaspach 3:0 gewonnen. De Lëtzebuerger Nationalspiller Maurice Deville huet an der 64. Minutt am Mëttelfeld 2 Géigespiller stoe gelooss an de Ball op den Diring opgeluecht, deen de Ball propper an de Filet gesat huet.

Iwwerdeems huet Kaiserslautern 3:0 bei Uerdingen gewonnen an Ingolstadt, mam Lëtzebuerger Trainer Jeff Saibene, huet Zwickau mat 4:2 geklappt. Ingolstadt huet domadder weiderhin 3 Punkte Retard op de Leader Duisburg.

Fir de Kont vum 14. Spilldag an der ukrainescher Premier League waren um Samschdeg de Mëtten den Tim Hall an de Marvin Martins mat Karpaty Lwiw beim FK Mariupol op Besuch. No 90 Minutten hu sech béid Ekippe mat 2:2 getrennt. Déi zwee Lëtzebuerger stoungen alle béid de komplette Match um Terrain. Den Tim Hall krut an der 45'+3 eng Giel Kaart.

Freideg

An der Ligue 2 a Frankräich huet Orléans mam Vincent Thill de Kellerduell géint den FC Paris mat 0:1 verluer. De Lëtzebuerger Nationalspiller gouf an der 76. Minutt agewiesselt. Orléans bleift duerch dës Néierlag op der leschter Plaz an der Tabell. Si hunn 9 Punkten um Kont a Paräis huet op der zweetleschter Plaz der 12.

Um leschte Spilldag vun der éischter Period huet Virton, d'Ekipp vum Geschäftsmann Flavio Becca, nach déi éischte Plaz an der Tabell missten u Louvain ofginn. Virun den eegene Spectateuren huet ee mat 0:1 de Kierzere gezunn. Bei Virton stoungen den Anthony Moris, de Kevin Malget an den Dave Turpel an der Startformatioun. Den Aurélien Joachim souz op der Bänk.

Net an den Asaz koum e Freideg den Owend den Enes Mahmoutovic. De Lëtzebuerger souz bei der 2:3-Defaite vu Maastricht bei der Formatioun Jong AZ op der Bänk.

An der Regionalliga Südwest ass de Florian Bohnert mat der zweeter Ekipp vu Mainz net iwwert ee 4:4 géint Pirmasens erauskomm. De Lëtzebuerger souz déi 90 Minutten iwwer op der Bänk.