No engem 35:40-Réckstand an der Paus hunn d'Miseler géint de Basket Esch an der 2. Hallschecht zeréck geschloen. Bei den Dammen ass Hueschtert 1. Finalist.

E Samschdeg den Owend goufen am Basket déi éischt Halleffinalle vun der Coupe gespillt. Bei den Häre stounge sech de Basket Esch an d'Musel Pikes géigeniwwer. No enger staarker Schlussphas konnten déi Miseler d'Partie mat 81:76 fir sech entscheeden a stinn domadder als éischte Finalist fest. 

Bei den Damme krut de Champion Gréngewald et mat de Musel Pikes ze dinn. Um Enn konnte d'Dammen aus dem Gréngewald mat enger knapper 56:53-Victoire deen éischten Titel fir d'Finall sécheren.

Basket Esch – Musel Pikes 76:81 (40:35)

Pikes dréine Match géint Esch a stinn an der Coupe-Finall
D'Musel Pikes hu sech um Enn mat 81:76 géint de Basket Esch duerchgesat.

Et war de Basket Esch ënnert dem Impuls vum Clancy Rugg, deen an den Ufanksminutten den Toun uginn huet. Am 1. Véierel konnt sech d'Ekipp aus der Minettsmetropole ee Virsprong vun 2 Zieler erausspillen, d'Pikes wollten awer no engem 14:16 aus hirer Siicht am 1. am 2. Véierel weider dru bleiwen. Déi Escher hunn allerdéngs an den zweeten 10 Minutte ferm op de Gas gedréckt a sinn de Miseler mat engem Run dovu gezunn.

Dunn huet Esch opgehalen hire Basket ze spillen an de Lavone Holland huet mat enger staarker Leeschtung seng Miseler nees an de Match bruecht. No engem 24:21 am 2. Véierel stoung de Score an der Paus bei 40:35 fir d'Minetter.

D'Partie war also nach laang net entscheet. Zwar sinn déi Escher besser vum Téi komm, ma d'Pikes sinn ëmmer méi frech ginn an hunn d'Partie schliisslech no den drëtten 10 Minutte komplett kënne mat engem 19:11 dréien. Opfälleg war no der Paus déi schlecht Trefferquot op béide Säiten.

© Shari Schenten

Esou hunn enorm spannend lescht 10 Minutten op déi vill Spectateuren am Gymnase vun der Coque gewaart. D'Miseler waren net méi ze stoppen an hunn an Zäit vun 2 Minutten d'Partie komplett op d'Kopp gestallt. 7 Minutte bloufen am leschte Véierel nach ze spillen, wéi d'Pikes sech eng Avance vun 10 Punkten erausspille konnten. De Momentum war elo kloer bei de Miseler, och well beim Basket Esch kee sou richteg d'Verantwortung wollt iwwerhuelen.

Um Enn sinn d'Miseler no enger kämpferescher Leeschtung, an engem 27:25 am leschte Véierel, als Gewënner vum Parquet gaangen an domat als 1. Ekipp an d'Finall vun der Coupe agezunn.

Basketball - de ganze Match
Basket Esch géint Musel Pikes 76:81

BBC Gréngewald - Musel Pikes 56:53 (30:25)

Den Optakt hunn d'Dammen aus dem Gréngewald géint d'Damme vun der Musel gemaach. Hei huet ee sech eng ausgeglache Partie kënnen erwaarden, och wann et d'Pikes mam Gréngewald mam aktuelle Champion ze di kruten. D'Miseler wollten awer un déi lescht gutt Matcher uknäppen an an d'Finall anzéien. Dëst huet nom 1. Véierel allerdéngs net onbedéngt gutt ausgesinn, deen déi Hueschterter mat 16:7 däitlech fir sech konnten entscheeden. Am 2. Véierel hu sech d'Pikes awer gutt gewiert an hunn de Wee mat engem 18:14 zeréck an de Match fonnt - 30:25 fir de Gréngewald an der Paus.

Nom Téi war et weider e ganz interessante Match, an deem sech d'Dammen aus dem Gréngewald den 3. Véierel mat 21:14 krope konnten. Si hu gutt opgespillt a mat dësem Erfolleg e grousse Schratt a Richtung Finall gemaach. Am leschte Véierel koumen d'Musel Pikes awer nach eng Kéier erun, ma hunn hir Leeschtung awer mat enger schlechter Trefferquot net belount.

D'Miseler hu gekämpft, mä ëmmer wa se no un d'Géignerinnen erukomm sinn, ass et esou just net duergaangen, fir zeréck an de Match ze kommen. An enger ganz spannender Schlussphas, an där beim Gréngewald net méi vill zesumme gelaf ass, goung de 4. Véierel mat 14:5 fir d'Pikes op den Enn - dat ass op 3 Punkten net duergaangen. De Gréngewald ass domat den 1. Finalist bei den Dammen.

Dammebasket - de ganze Match
BBC Gréngewald - Musel Pikes 56:53