En Dënschdeg war den Optakt vum 3. a leschte Spilldag vun der Gruppephas op der Futtball-Weltmeeschterschaft am Katar.

Am Grupp B konnt sech England en Dënschdeg den Owend als Gruppenéischte fir d'Aachtelsfinalle qualifizéieren, wou et elo an den Duell géint de Senegal geet. Den aneren Ticket vum Grupp huet sech d'USA geséchert an trëfft als Gruppenzweeten op Holland. Eliminéiert sinn Iran a Wales.

Am Grupp A konnte sech um Dënschdegmëtteg Holland als Gruppenéischten an de Senegal als Gruppenzweete fir d'Aachtelsfinalle qualifizéieren, deemno sinn Ecuador an de Katar eliminéiert.

Resumé WM / Reportage Serge Olmo

Grupp B

Wales - England 0:3
0:1 Rashford (50'), 0:2 Foden (51'), 0:3 Rashford (68')

England huet sech mat engem 3:0 géint Wales déi éischt Tabelleplaz am Grupp B geséchert. No enger Victoire an engem Remis sinn d'Englänner als Gruppeleader an de leschte Match vum Grupp géint Wales gaangen. Deemno huet sech och d'Bild vum Spillverlaf um Terrain gewisen. D'Three Lions hate vun Ufank un d'Kontroll iwwert de Ball an och déi besser Chancen op d'Féierung. Trotzdeem ass et no 45 Minutten nach ouni Goler an d'Vestiairë gaangen.

Dat sollt sech kuerz no der Paus dann awer änneren. Duerch d'Goler vum Rashford a Foden stoung et bannent zwou Minutten 2:0. Ronn 20 Minutte méi spéit huet de Rashford mat sengem zweete Gol vum Match dann nach op 3:0 erhéicht an d'Partie scho sou gutt wéi entscheet. Wales huet sech immens schwéier gedoen a konnt un der Sortie vum Match bis zum Schluss näischt méi änneren.

Iran - USA 0:1
0:1 Pulisic (38')

Iran huet sech mat enger 0:1-Defaite géint d'USA déi zweet Plaz verspillt. D'USA stoung dobäi vun Ufank un ënner Drock, dat well nëmmen eng Victoire eng Plaz an den Aachtelsfinalle bruecht hätt. D'iranesch Ekipp huet sech dowéinst an den Ufanksminutten virun allem op déi defensiv Aarbecht konzentréiert. Am Spill no vir ass op béide Säite fir eng gutt hallef Stonn laang näischt geschitt. Den 1:0 sollt dann awer nach kuerz virun der Paus falen. No enger Flank vum McKennie war de Pulisic mam Kapp op der Plaz a konnt d'USA a Féierung an domat viraussiichtlech op déi zweet Tabelleplaz schéissen.

Nom Säitewiessel war d'USA weider déi iwwerleeën Ekipp. Iran huet mat der Zäit zwar besser an de Match fonnt, virum géigneresche Gol war awer net all ze vill ze gesinn. Ee Gol zum Ausgläich wier fir déi zweet Plaz an der Tabell duergaangen, ma Iran krut sech fir eng engagéiert Leeschtung zum Schluss net mat engem Remis belount. D'USA krut d'Féierung bis zum Enn iwwert d'Zäit bruecht a séchert sech domat den Ticket fir d'1/8-Finallen.

Grupp A

Ecuador - Senegal 1:2
0:1 Sarr per Eelefmeter (44'), 1:1 Caicedo (68'), 1:2 Koulibaly (70')

Den Ecuador ass mat engem Punkt méi an de Match géint de Senegal gaangen, war an der éischter Hallschent awer iwwer wäit Strecken ënnerleeën. D'Senegalesen hunn de Match dominéiert, eleng bei de Schëss stoung et 10 zu 2 fir d'Afrikaner. An der 42. Minutt gouf et dunn e Foul vum Hincapie um Sarr an den Arbitter huet op Eelefmeter decidéiert. De Gefoulten ass an der Suite selwer ugetrueden a konnt de Senegal mat 1:0 a Féierung bréngen. Mat deem Resultat goufen dann och d'Säite gewiesselt.

De Start an déi zwee Hallschent war relativ zéi. Bannent den éischten 20 Minutte gouf et kaum geféierlech Offensivaktiounen, dat well béid Formatiounen defensiv stabil stoungen a kaum eppes zougelooss hunn. An der 68. Minutt konnt den Ecuador dunn awer no engem Corner duerch de Caicedo ausgläichen. D'Äntwert vum Senegal koum awer nëmmen zwou Minutte méi spéit. No engem Fräistouss koum de Ball iwwer Ëmweeër bei de Koulibaly, de Kapitän stoung genau richteg a konnt aus kuerzer Distanz den 2:1 markéieren. An der Schlussphas gouf et nach op béide Säiten déi eng oder aner Chance, mee bis zum Schluss sollt sech näischt méi um Resultat änneren. Domat steet de Senegal fir déi éischte Kéier zanter 20 Joer nees an der Aachtelsfinall.

Holland - Katar 2:0
1:0 Gakpo (26'), 2:0 de Jong (49')

D'Hollänner hu sech an der Ufanksphas vum Match e Stéck méi schwéier gedoen, wéi ee sech dat wuel erwaart huet. Mat der éischter gudde Chance konnt de Gakpo Holland dunn awer an der 26. Minutt mat 1:0 a Féierung bréngen. Fir den 23 Joer ale Spiller vum PSV Eindhoven war et den drëtte Gol am drëtte WM-Match. Och an der Suite war d'Oranje net zwéngend iwwerzeegend a konnt frou sinn, datt d'Katarer d'Raim, déi sech opgedoen hunn, net notze konnten. Deemno goung et mat der knapper Féierung fir Holland an d'Paus.

Nom Säitewiessel konnten d'Hollänner dunn direkt nach een drop setzen, do war et nämlech de Frenkie de Jong, deen den 2:0 markéiere konnt. D'Katarer hu sech awer nach net opginn an deels ganz energesch no vir gespillt, richteg geféierlech ware si awer net. D'Hollänner konnten dann och nach eng drëtte Kéier zouschloen, ma dee Gol gouf spéiderhi wéinst engem Handspill annuléiert. Um Enn wannen d'Hollänner mat 2:0 a séchere sech déi éischt Plaz am Grupp A.

Grupp B

Iran - USA um 20 Auer

Wales - England um 20 Auer

D'Tabellen am Iwwerbléck

Tabell