No der Eliminatioun vun der Belsch an der Gruppephas huet hiren Trainer Martinez annoncéiert, datt hien net méi géif weidermaachen.

Am Grupp F sinn déi leschte Matcher um 16 Auer ugepaff ginn. Mat der knapper Victoire iwwer Kanada konnt sech Marokko déi éischte Plaz am Grupp sécheren, de Kroaten ass en 0:0 géint d'Belsch duergaangen, fir weiderzekommen.

Et war e groussen Hin an Hier am Grupp E. Zum Schluss geet Däitschland eng 4:2-Victoire net duer, fir weiderzekommen, well Spuenien knapp 1:2 géint Japan verluer huet an domadder déi zwou Ekippen an der nächster Ronn stinn. Costa Rica hätt Däitschland misste klappen, fir weiderzekommen.

Domadder treffen an den Aachtelsfinallen elo Japan op Kroatien a Spuenien kritt et mat Marokko ze dinn.

Resumé WM / Reportage Guy Seyler

Grupp F

Kroatien, Marokko (béid 4 Punkten) an d'Belsch (3 Punkten) konnte um leschte Spilldag nach allen dräi aus eegener Kraaft weider kommen. Eenzeg Kanada (0 Punkten) war definitiv eliminéiert.

Kanada - Marokko 1:2
0:1 Ziyech (4'), 0:2 En-Nesyri (23'), 1:2 Aguerd (40',sg)

RTL

Mat enger Victoire wier et kloer, datt Marokko sécher weider wier. Déi zwee Goler vum Ziyech an dem En-Nesyri an den éischte Minutte vum Match hunn dës Missioun däitlech méi einfach gemaach. Kanada koum an der 40. Minutt nees bäi, dat awer mat vill Pech fir Marokko, wou den Aguerd e Pass wollt klären, mat sengem Agräifen säin eegene Golkipp awer ausgespillt huet. Esou ass et mat engem aus kanadescher Sicht glécklechen 1:2 an d'Paus gaangen.

An der zweeter Hallschent war Marokko manner aktiv no vir, grad well si mat dësem Score sécher weider wieren, egal wéi déi aner Partie géif ausgoen. An der 71. Minutt hate si awer zwee Mol Chance, well d'Kanadier eng Kéier just d'Lat an eng Kéier knapp iwwert de Gol gekäppt hunn. Et sollten an dëser Partie keng weider Goler falen, esou datt d'Marokko sech als 1. an dëser Grupp konnt duerchsetzen.

Kroatien - Belsch 0:0

RTL

© AFP

Kroatien huet direkt gewisen, wat si an dësem Match wëllen: 3 Punkte mathuelen. Well no 8 Sekonne ware si scho virum Gol vum Courtois opgetaucht, ma de Perisic huet just ganz knapp laascht d'Këscht geschoss. Kroatien war an den éischte Minutte besser an hat no 15 Minutten bal eng gutt Chance, well den Arbitter hat no engem Foul op Eelefmeter decidéiert. Ma de VAR koum eisen Noperen zur Hëllef, well et huet sech erausgestallt, datt virum Foul eng Abseitspositioun virlouch, et war eng Milimeterdecisioun. D'Belsch huet no dëser Situatioun méi matgespillt, ma virum Säitewiessel konnt sech keng Ekipp richteg virum géigneresche Gol duerchsetzen.

Kroatien war och nom Säitewiessel déi besser Ekipp, ma ëmmer nees huet hinnen déi leschte Pass, fir ganz geféierlech virun de Gol ze kommen, gefeelt. An der 61. Minutt hate si du Chance, well e Verteideger sech nach a leschter Sekonn sech an de Schoss vum Carrasco geschmass huet, fir den 1:0 fir d'Belsch ze verhënneren. Direkt drop huet och de Lukaku direkt zwou Grousschancë leie gelooss. No dësen Zeene war d'Belsch am Match an och an der Schlussphas déi besser Ekipp. Kroatien huet weider probéiert, den entscheedende Gol ze schéissen, ma am Ugrëff huet ëmmer déi leschten an decisiv Pass gefeelt.  Bei der Belsch ass zwar wuel de leschte Pass ukomm, ma de Ball sollt net am Netz landen. Grad de Lukaku hat zum Schluss nach zwou grouss Chancen, huet awer zwee Mol net de wichtege Gol fir seng Ekipp konnte markéieren. Dësen 0:0 suergt dann dofir, datt Kroatien als zweeten an der Grupp weider ass, eis Noperen aus der Belsch goufen eliminéiert.

Martinez net méi Trainer vun der Belsch

Wéi d'AFP mellt, huet de Coach vun der Belsch Roberto Martinez kuerz no der Eliminatioun vu senger Ekipp an der Gruppephas matgedeelt, datt hie säin Amt géif Néierleeën. Hie war zanter 2016 de Cheftrainer bei der Nationalekipp vun eisen Noperen. "Dat war mäi leschte Match mat der Nationalekipp. Ech kann net weidermaachen", esou de Martinez op der Pressekonferenz nom Match. "Et ass Zäit fir mech, ze akzeptéieren, datt dëst de leschte Match war."

Grupp E

Spannend war et virun de leschte Matcher an der Grupp E. Well all Ekipp, ob Spuenien (4 Punkten), Japan, Costa Rica (béid 3 Punkten) oder Däitschland (1 Punkt) konnten nach weiderkommen. Eenzeg Däitschland misst esouguer am Fall vun enger eegener Victoire op Spuenien hoffen, fir e Weiderkommen ze garantéieren.

Costa Rica - Däitschland 2:4
0:1 Gnabry (10'), 1:1 Tejeda (58'), 2:1 Vargas (70'), 2:2 Havertz (73'), 2:3 Havertz (85'), 2:4 Füllkrug (90'+1)

RTL

© Glyn Kirk / AFP

Fir Däitschland war d'Missioun also kloer, et muss ee gewannen. An dat huet een eisen Noperen och ugesinn, déi vun Ufank un no Vir gespillt hunn an schonn an den éischten 10 Minutte véier méi oder wéineger gutt Chancen haten. Et war dunn eben déi véiert Chance, déi de Gnabry mam Kapp ausnotze konnt, no enger gudder Flank vum Raum. Däitschland huet nom Gol den Drock weider héich gehalen a sech och Chancen erausgespillt, och wann d'Costa Ricaner et hinne e bësse méi schwéier gemaach hunn. An der 42. Minutt hat Däitschland du Chance, well den Neuer konnt e Ball vum Fuller paréieren, nodeem direkt zwee Verteideger e Lapsus passéiert war an de Fuller eleng virum Gol opgetaucht ass. Esou goung et mat enger knapper awer verdéngter Avance fir Däitschland an d'Paus.

Nom Säitewiessel haten an den éischten 10 Minutte béid Ekippe gutt Zeenen no vir, dobäi ass awer wéineg erausgesprongen. Bis an der 58. Minutt. No enger gudder Flank konnt den Neuer nach e Käpper vum Waston halen, ma de Ball ass dem Tejeda virun d'Féiss gesprongen, dee sech dës Chance fir den Ausgläich net huele gelooss huet. Däitschland huet sech net opginn an den Drock no Vir nees erhéicht, ma bei den éischte Chance vu Musiala a Rüdiger huet einfach d'Prezisioun gefeelt. Dofir huet et de Vargas an der 70. Minutt besser gemaach an no engem Fräistouss a vill Gewulls den 2:1 fir Costa Rica markéiert. D'Féierung huet awer net laang gedauert, well 3 Minutte méi spéit huet den Haverts den 2:2 geschoss. De Füllkrug huet kuerz drop nach eng gutt Chance op eng weider Féierung leie gelooss, hie war um staarken Navas hänke bliwwen. Costa Rica ass däitlech méi aktiv ginn an huet méi no Vir gemaach, well och si nach eng Chance haten, bei enger Victoire weider ze kommen. Ma och Däitschland huet et weider probéiert an den Havertz huet si kuerz viru Schluss no enger Flank vum Gnabry eng weider Kéier a Féierung bruecht. Déi huet de Füllkrug dann nach an der Nospillzäit op 4:2 erhéicht, nodeem per VAR kontrolléiert gouf, ob et net awer Abseits war.

Japan - Spuenien 2:1
0:1 Morata (12'), 1:1 Doan (48'), 2:1 Tanaka (51')

RTL

© AFP

Och am anere Match war fréi vill lass. Japan huet nach an der 8. Minutt eng gutt Chance leie gelooss, ma an der 12. Minutt huet de Morata eng Flank vum Azpilicueta notze kënnen, fir d'Féierung ze markéieren. De Match ass dono e bësse méi verflaacht a laang si richteg gutt Golchancen ausbliwwen. Spuenien hat an der éischter Hallschent iwwer 80 Prozent Ballbesëtz, konnten dat awer net gutt bis zum Schluss ausspillen a sinn ëmmer nees un der japanescher Defense hänke bliwwen.

Japan hat am éischten Duerchgang wéineg gutt Chancen, huet dat dofir direkt am Ufank vun den zweete 45 Minutte besser gemaach. No 3 Minutten huet den Doan de Ball aus der Distanz propper erwëscht an den 1:1 markéiert. knapp 3 Minutte méi spéit huet de Mitoma den Tanaka esou fräigespillt, datt een eleng op den eidele Gol gelaf ass. Nom VAR gouf och dëse Gol ginn, esou datt Japan 6 Minutte gebraucht huet, fir de Match ze dréinen. Spuenien huet et weider no Vir probéiert, war awer net aggressiv genuch an ass ëmmer nees un de Japaner hänke bliwwen. Och Japan huet et un Duerchsetzungskraaft gefeelt. Wéi schonn an den éischte 45 Minutten hat Spuenien en däitlechen Avantage beim Ballbesëtz, ma déi richteg gutt Chancen hu Vir gefeelt. An der Nospillzäit hate si nach zwou Méiglechkeeten, ma esouwuel Asensio wéi och Olmo sinn um Gonda am japanesche Gol hänke bliwwen.

D'Tabellen an d'Resultater am Iwwerbléck

Tabell