Am Super-G konnt d'Italienerin Goggia hir Avance am Weltcup ausbauen. Bö feiert seng 62. Weltcup-Victoire am Biathlon.

Am Schisprangen zu Sapporo konnt sech de Japaner Ryoyu Kobayahi mat 271,5 Punkte virum Dawid Kubacki aus Polen an dem Halvor Egner Granerud aus Norwegen behaapten. De Japaner ass éischter en Iwwerraschungsgewënner, deen dëst Sprange mat 135 an 130 Meter a 7,2 Punkten Avance op den Zweete gewanne kann.

Am Super-G am Schi Alpin waren d'Dammen zu Cortina d'Ampezzo am Asaz. Hei war d'Sofia Goggia déi Séierst a baut och hire Virsprong am Weltcup aus. 0,13 Sekonne Retard hat d'Slowenin Ilka Stuhec als Zweet an Drëtt gouf d'Kira Weidle aus Däitschland, mat 0,36 Sekonne Retard.

Zu Kitzbüel sinn d'Männer an der Descente op d'Pist gaangen. Hei konnt sech den Éisträicher Vincent Krichmayr behaapten, dat virum Schwäizer Niels Hintermann an dem US-Amerikaner Jared Goldberg.

Am Biathlon bei de Männer wënnt de Johannes Thingnes Bö seng 5. Course hannerteneen. Beim Sprint iwwer 10 Kilometer zu Antholz hat hien zwar e Feeler am Schéissen, ma um Enn ass et awer seng insgesamt 62. Victoire am Weltcup. Op Plaz 2 kënnt de Martin Ponsiluoma aus Schweden (+31.4 Sekonnen) an op Plaz 3 den Norweger Strula Holm Laegreid (+37.30 Sekonnen).