Um leschte Spilldag huet d’Union Saint-Gilloise géint Bruges an de leschte Minutte verluer. Antwerpen goung e Remis zu Genk duer, fir Meeschter ze ginn.

An der Belsch ass Decisioun ëm den Titel um leschte Spilldag an de leschte Minutte gefall.

Et war e batteren Owend fir den Anthony Moris, deen de ganze Match tëschent de Pottoe stoung. An der 46. Minutt war seng Ekipp duerch den Adingra a Féierung gaangen. D'Union Saint-Gilloise huet bis an déi leschte Minutte wéi de séchere Champion ausgesinn. Bruges huet et awer fäerdeg bruecht, an der 90. Minutt auszegläichen a kuerz drop de Match komplett ze dréinen. An der 10. Minutt vun der Nospillzäit ass nach den 3. Gol fir d'Gäscht gefall. Well d'USG 1:3 verluer huet, konnten am anere Match souwuel Genk wéi och Antwerpen Champion ginn. An do war d'Heemekipp bis an déi 94. Minutt 2:1 vir. Den Alderweireld huet dunn awer ausgeglach an den Titel geet schlussendlech op Antwerpen. Genk klasséiert sech op der 2. Plaz. D'Union St.-Gilloise spillt op der 3. Plaz net an der Qualifikatioun fir d'Champions League, mee an der Qualifikatioun fir d'Europa League.

Fir de Mica Pinto a Sparta Rotterdam ass et an Holland dogéint besser gelaf. An de Playoff-Halleffinallen ëm d'Qualifikatioun fir d'Conference League huet Sparta am Retourmatch no Eelefmeterschéisse géint Utrecht gewonnen. De Lëtzebuerger souz awer de ganze Match op der Bänk. An der Finall spillt Sparta géint Twente Enschede ëm déi international Plaz.

An Norwegen huet de Lars Gerson mat Kongsvinger 2:1 zu Asane gewonnen. De Lëtzebuerger huet de ganze Match gespillt an den 2. Gol fir seng Ekipp virbereet. Kongsvinger ass no 11 Spilldeeg Tabelleleader an der 2. Divisioun.

En 1:1-Remis gouf et a Schweden tëschent AIK Stockholm a Kalmar. De Vincent Thill gouf an der 73. Minutt agewiesselt. Deen Ament stoung et 0:1 an dono ass dem AIK nach den Ausgläich gelongen.

De Maxime Chanot stoung beim 0:0 tëschent dem FC New York City a New England 90 Minutten um Terrain. Den Ofwierspiller krut an der 81. Minutt déi giel Kaart gewisen.

An der Tierkei kann Eyüpspor net méi an déi 1. Liga opsteigen. Am Retourmatch an de Playoffe gouf et eng 0:2-Defaite zu Bodrumspor. Den Olivier Thill stoung dobäi net am Kader.

Den Dirk Carlson stoung bei 1:0-Victoire vu St. Pölten géint d'Amateure vu Rapid Wien an der 2. Liga an Éisträich och net am Kader.

Samschdeg

An der héchster bulgarescher Liga hunn den Eldin Mahmutovic an ZSKA Sofia et verpasst, e wichtege Schratt Richtung Meeschtertitel ze maachen. Am Derby géint CSKA 1948 Sofia sollt et just en 1:1-Gläichspill ginn. De Lëtzebuerger Verteideger hat seng Faarwen a Féierung geschoss, déi de Pedrinho awer nach virun der Paus ausgläiche konnt. An der Nospillzäit (90'+10) krut d'Ekipp vum Mahmutovic en Eelefmeter zougesprach, dee si awer net notze konnt.

No der Victoire vu Ludogorets Rasgrad géint Levski Sofia ass ZSKA virum leschte Spilldag nees Tabellenzweeten a muss op en Ausrutscher vum Géigner hoffen.

Austria Wien huet de leschte Match am éisträichesche Championnat och d'Punkte gedeelt. D'Ekipp vum Marvin Martins, deen d'lescht Woch säi Vertrag bei de Mofen ëm zwee Joer verlängert huet, koum géint de Champion Red Bull Salzburg zu engem 1:1. Et hat laang no enger Victoire fir Salzburg ausgesinn, déi an der 30. Minutt a Féierung goungen, mee de Gruber konnt fir d'Wiener an der leschter Spillminutt nach ausgläichen. D'Austria schléisst d'Saison op der fënnefter Plaz of, ass awer nach net definitiv fir d'Conference League qualifizéiert. Dat entscheet sech eréischt am Duell géint de Sechsten.

D'Resultater am Iwwerbléck

D'Tabell am belsche Championnat