Groussherzoglech Famill enk mat Olympesche Spiller verbonnen
Zanter dem Ufank vun dëse Summerspiller ass déi groussherzoglech Famill zu Paräis an huet ë.a. d'Lëtzebuerger Sportler bei hire Competitiounen ënnerstëtzt.
Am Häerz vu Paräis, um rouden Teppech am Haff vum Élysée-Palais sinn de Grand-Duc Henri an d'Grande-Duchesse Maria Teresa vum franséische President Emmanuel Macron an der First Lady empfaange ginn. Si hunn zu den 200 Gäscht gehéiert, déi op d'Receptioun vun de Staats - a Regierungscheffen am Ufank vun den Olympeschen a Paralympesche Spiller zu Paräis invitéiert goufen. Ënnert de Scheinwerfer a viru Journalisten aus der ganzer Welt vertrëtt déi groussherzoglech Koppel Lëtzebuerg op der internationaler Bün nieft eisem Premier Luc Frieden a senger Fra. D'groussherzoglech Koppel erneiert also hir historesch Bindungen zu dësem groussen, globalen Event an den olympesche Wäerter.
© ATP/Luxpress
Et wier de Grand-Duc Jean gewiescht, dee sech als éischte Member vun der groussherzoglecher Famill am Olympesche Comité engagéiert hätt. Et wier hien och gewiescht, deen de "Virus" un de Grand-Duc Henri viru ginn hätt, deen elo zanter 26 Joer Member wier. Wärend all där Zäit hätt de Grand-Duc keng Olympesch Spiller verpasst, sou d'Grande-Duchesse.
© ATP/Luxpress
Ob Athen, London oder Rio - d'Membere vun der groussherzoglecher Famill reese gären zesummen op d'Olympesch Spiller, fir d'Entwécklung vun de verschiddenen Editioune vun dëser grousser Sportversammlung ze suivéieren, déi dëst Joer fir d'éischte Kéier eng Paritéit tëscht Fraen a Männer bei den 10.500 qualifizéierten Athleete proposéiert. Eng historesch Leeschtung an och eng Première.
All dat wier een Zeeche vun Entwécklung an et wier ee grousse Moment, sou d'Grande-Duchesse, déi Member am Internationale Paralympesche Comité an am Nationale Paralympesche Comité ass. Hier géing och nach d'Chancëgläichheet tëscht paralympeschen an olympeschen Athleetinnen an Athleete besonnesch um Häerze leien.
D'Grande-Duchesse freet sech och iwwer d'Participatioun vun enger Flüchtlingsekipp, déi aus 36 Athleeten aus verschiddene Länner besteet.
© ATP/Luxpress
D'Groussherzogin, déi sech fir d'Verdeedegung vun de Fraerechter asetzt, huet d'Organisatioun "Stand Speak Rise Up" gegrënnt, nodeems en internationale Forum géint sexuell Gewalt zu Lëtzebuerg am Joer 2019 organiséiert gouf, bei deem sech 1.200 Leit ronderëm d'Wäerter versammelt haten, änlech wéi déi vum olympeschen Esprit.
D'Olympesch Wäerter, déi d'Energie ginn, fir Grenzen a Beschränkungen ze iwwerschreiden, fir d'Generatiounen ze verbannen an d'Leit ronderëm d'Welt zesummenzebréngen.
