Et ass een iwwerraschenden Deal: D''Xbox-Firma aus Redmond keeft déi ugeschloen Activision Blizzard fir 69 Millarden Dollar

Microsoft iwwerhëlt Activision Blizzard / Reportage Diana Hoffmann

Activision Blizzard ass ënner anerem duerch d’Entwécklung vun de Spiller "Call of Duty",  "World of Warcraft" a "Candy Crush" bekannt ginn. 

Mat dësem Kaf gëtt Microsoft dem Ëmsaz no zu der drëttgréisster Gaming-Firma op der Welt, a läit domat hannert Tencent aus China a Sony aus Japan. De Kaf soll de Wuesstem vu Microsoft bei de Spiller an de Beräicher Mobile, PC, Konsolen a Cloud acceleréieren, heescht et vum Softwarekonzern.

De Kafpräis vu 95 Dollar pro Aktie,  dee fir Activision Blizzard bezuelt soll ginn, ass däitlech méi héich, wéi di 51 Milliarden Dollar, déi d’Gaming-Entreprise op der Bourse deen Ament wäert war. Wéi vill Tech-Entreprisë konnt Microsoft an de leschten 2 Joer Pandemie vun enger Croissance profitéieren. De Wäert vun der Firma huet sech an de leschten 2 Joer op 2,3 Billioune bal verduebelt.

Gaming wier déi dynameschst an opreegenst Entertainment-Kategorie op alle Plattformen, sot de Chef vu Microsoft Satya Nadella. Se wäert eng Schlësselroll bei der Entwécklung vu Metaverse-Plattforme spillen. Also an der Entwécklung vun enger virtuell erweiderter Realitéit.

Chef vum Gaming-Departement vu Microsoft ass de Phil Spencer. Hien muss da wuel opraumen. Leschte Summer war vun toxeschem Aarbechtsklima bei Activision Blizzard ried, an dem Chef Bobby Kotick ass sexuell Belästegung an Diskriminéierung virgehäit ginn.

2020 huet d’Firma Bethesda fir 7,5 Milliarden Dollar kaaft. Dee Gréissten Deal fir Microsoft louch 2016 bei 26 Milliarden Dollar fir Linkedin.

D’Transaktioun vun Activison Blizzard soll d’nächst Joer ofgeschloss sinn. Virdru muss dat zoustännegt Amt nach analyséieren, op d’Iwwernam net géint Kartellrecht verstéisst. An de leschten 10 Joer huet Microsoft nämlech schonn eng 30 Gaming-Studioe kaaft.