Den Haaptpräis vum Festival konnt dëst Joer net iwwerreecht ginn, well den internationale Jury nëmme 50% vun de Filmer aus der Kompetitioun konnt gesinn.

Och wann déi 10. Editioun vum LuxFilmFest huet missen duerch déi aktuell Situatioun éischter op en Enn goe wéi geplangt, konnten awer an enger Partie Kategorië Filmer ausgezeechent ginn.

Dat war net méiglech fir den Haaptpräis vum internationale Jury. De Jury hat sech eréischt géint der Mëtt vum Festival zesummefonnt, a konnt also net genuch vun den 10 Filmer kucken.

Bei de 6 Documentairen allerdéngs, déi d'Membere vum Documentaire Jury all konnte kucken, ass de Präis un déi Lëtzebuerger Koproduktioun COLLECTIVE vum däitsch-rumäneschen Realisateur Alexander Nanau gaangen.

Dëst ass eng passionant a spannend inzenéiert a montéiert Enquête iwwert dat total korrupt Gesondheetswiesen a Rumänien. No engem tragesche Brand an der Bukarester Disco "Collective"(Oktober 2015), ouni Sorties de Secours, waren 27 jonk Leit direkt ëmkomm, an duerno och nach 39 vu Schwéierverbrannten a rumäneschen Spideeler verstuerwen. De Film suivéiert e Journalist vun enger Sportszeitung(!), deen no an no ëmmer méi Mëssstänn opdeckt (sous-equipéiert Spideeler, Refus vun den Autoritéiten d'Affer an auslännesch Klinicken ze verleeën, trafiquéiert Desinfectanten duerch eng rumänesch Pharmaentreprise..) an den nei designéierten  Gesondheetsminister, e fréieren Aktivist vun enger Patientevertriedungen. Dëse versicht, esou gutt e kann un éischter Stell der Korruptioun a Vetternwirtschaft an de Spideeler Meeschter ze ginn, an nei Gestiounscritèren duerchzesetzen.

COLLECTIVE léist sech bal wéi e spannenden Fiktiounsfilm kucken a verlaangt dann natierlech grousst Kënnen vum Realisateur, sief et nëmmen fir déi richteg Personnagen ze fannen, déi esou e Film droe kënnen.

Den Alexander Nanau hat schonns mat "Toto et ses soeurs" 2014 e villfach präisgekréinte Dokumentaire iwwert eng Rom Famillje gedréint, deen och um Luxfilmfest a Kompetitioun gelaf ass. Bei där Geleeënheet ass och de Kontakt entstanen mat Samsa Films, di dann elo COLLECTIVE mat produzéiert hunn.

Et ass unzehuelen, dass COLLECTIVE beim Jury wuel a Konkurrenz mat dem anere groussaartege Dokumentaire "Midnight Family" iwwert eng privat Ambulanzenentreprise zu Mexico City war. Béid Dokumentaire sinn, wann se an d'Kinoe kommen net ze verpassen.

© "Babyteeth" vum Shannon Murphy

Deen aneren gréissere Präis gouf vum Jugendjury verginn a goung un de Kompetitiounsfilm BABYTEETH vun der Australierin Shannon Murphy. Am Film geet et ëm e jonkt Meedchen dat onheelbar u Kriibs erkrankt ass. Seng Elteren, déi alles maache fir him d'Liewen ze erliichteren, a verzweiwelt versichen d'Fassung ze behalen, acceptéieren schliisslech e marginale jonken Drogendealer, an dee sech hiert Meedche verléift huet, a mat deem se dann zesummen de Wee gi bis zum batteren Enn. Et ass wéineg verwonnerlech, dass dëse  ganz staarken an emotionale "coming of age" Film, di Jugendlech besonnesch ugesprach huet. An enger extrem exigenter, scho bal elitärer Kompetitioun war et och deen eenzege Film, deen eng "traditionell" narrativ Struktur hat, an trotzdeem voll iwwerzeege konnt.

Genau wéi COLLECTIVE ass och  BABYTEETH  en excellente Choix vun béide Juryen, a mer kënnen ons op d'Sortien vun deenen zwee Filmer am Kino freeën.

Di aner Präisser (VR a Kannerjury) kënne mer hei net kommentéiere well mer se net gesinn hunn.

Gewënner am Virtual Reality Pavillon ass de Film "BATTLESCAR”.

De Festival huet wéinst dem Corona-Virus dëst Joer nëmmen 8 Deeg gedauert, konnt allerdéngs ronn 18 Dausend Visiteuren zielen, woubäi do nach net d’Leit aberechent goufen, déi un de Workshoppen Deel geholl hunn oder am VR-Pavillon am Neimënster waren.