Éier en Dënschdeg den neie Shopping-Gigant an der Stad fir de Public opgeet, war d'Press schonn e Méindeg invitéiert.

Mat ronn 36.000 Metercarré Geschäftsfläch ass et dee gréissten Akafszenter am Land. En Dënschdeg de Moien um 9 Auer mécht e seng Dieren eng éischte Kéier fir de Public op.

De Shopping Center Cloche d'Or ass een Deel vum Mega-Immobilie-Projet um Ban de Gasperich. Iwwer 3 Stäck verdeele sech hei e Supermarché, e Fitness-Studio an eng 130 Butteker a Restauranten. Dovun eng ganz Rei, déi et bis ewell nach net zu Lëtzebuerg gouf.

AUDIO: Ouverture Auchan Cloche d'Or: Rep. Maxime Gillen

E Méindeg waren nach eng Kéier Honnerte Leit am Asaz fir Regaler anzeraumen, Etiquetten ze pechen an de leschte Stëbs vum Chantier ewechzewëschen. Eigentlech sollt d'Ouverture scho viru 14 Deeg sinn.

Den Direkter vu Ceetrus Lëtzebuerg, Eric Mathieu: « Nous n’étions pas prêts il y a 14 jours. On a pris la décision de reporter cette ouverture pour que les conditions d’accueil soient excellentes. Et je pense que c’était le choix de la raison. On peut être fier du résultat en deux semaines. »

Ronn eng Dose Butteker kommen an den nächste Méint och nach no. Ma ronn 100 Geschäfter a Restauranten si vun elo un op. Dorënner eng ganz Partie nei Nimm, déi bis ewell nach net am Grand-Duché vertruede waren. Ma och national Chaînen, wéi den Ernster, Namur oder déi erfollegräich Start-up Rawdish hu sech hei néiergelooss.

De franséische Grupp Auchan notzt de Grand-Duché fir nei Konzepter ze testen, wéi de Generaldirekter vun Auchan Lëtzebuerg Cyril Dreesen erkläert.

« La mission qui a été donnée à Auchan au Luxembourg est de disrupter un modèle, de trouver un nouveau modèle de distribution pour pouvoir recréer quelque chose de différent au sein d’Auchan. »

Dowéinst gouf de Supermarché op der Cloche d'Or och ganz anescht opgebaut. An d'Offer soll iwwert den normale Wochen-Akaf erausgoen, esou de Cyril Dreesen weider.

« Par exemple on va proposer des ateliers pour les enfants, des ateliers créatifs, des masterclass, notamment en biscuiterie. On va avoir un coach sportif, une diététicienne, on va avoir aussi la possibilité d’apprendre à faire la cuisine en famille ou avec des amis et après pouvoir le déguster. »

Alles an Allem wiere méi wéi 1.600 Leit nei agestallt ginn, fir am Shopping Center ze schaffen. Eleng am Supermarché gi sech pro Dag méi wéi 10.000 Clienten erwaart. Dat bei 2.800 Parkplazen. D'Direktioun ass iwwerzeegt, dass dat duergeet. Ëmmerhi kéimen an den Auchan um Kierchbierg eng 3.000 Leit méi ... bei der selwechter Gréisst u Parking, erkläert den Eric Mathieu.

« Nous avons deux tiers de personnes qui viennent sans voiture donc à mobilité douce ou à pied et seulement un tiers en voiture. Nous pensons que ce sera le même cas ici sur Cloche d’Or. »

Wéi dat mam Trafic ronderëm funktionéiert, wäert ee gesinn. Bis den Tram dohi kënnt, dauert op alle Fall nach e puer Joer. A bis dohi wäert och nach sou munche Chantier d'Gedold vun den Automobilisten op d'Prouf stellen.

VIDEO: Cloche d'Or: Neie Shoppingzenter mécht seng Dieren op
75.000 Meter Carré Geschäftsfläch, 130 Boutiquen, 23 Restauranten, 2.850 Parkplazen an en Auchan mat 12.500 Meter Carré.