An engem explosiven Interview huet dem Prënz Harry seng Fra vun hirer Leidenszäit bei de Royals bericht an erhieft schwéier Virwërf géint d'Kinnekshaus.

E Sonndeg den Owend gouf den Interview vun der US-Starmoderatrice Oprah Winfrey mat der Koppel ausgestraalt. Déi 39 Joer al Meghan Markle huet sech als Affer vu Ruffmord bezeechent an huet Rassismus-Virwërf géint d'brittescht Kinnekshaus erhuewen. Och de Prënz Harry ass deels haart mat senger Famill an d'Geriicht gaangen an huet sech besonnesch enttäuscht gewise vu sengem Papp Prënz Charles. En hätt sech vu sengem Papp am Stach gelooss gefillt.

RTL

Déi negativ Berichterstattung vun der brittescher Press hätt d'Meghan an eng schwéier psychesch Kris gestierzt, sot d'Herzogin vu Sussex an dem 2 Stonne laangen Interview, deen um US-Sender CBS ausgestraalt gouf. "Ech wollt einfach net méi liewen. An dat war e ganz kloren, realen a beängschtegende stännege Gedanken". Op Nofro hin huet si zouginn, dass si och u Suicide geduecht huet. Si huet sech un déi kinneklech Famill adresséiert a gesot, dass si professionell Hëllef bräicht. D'Äntwert dorop war awer, dass een dat net kéint maachen... dat wier net gutt fir d'Institutioun.

D'Meghan huet och iwwer e Virfall mat hirer Schwéiesch Kate virun der Hochzäit mam Harry am Mee 2018 geschwat. Deemools hat et an der Press geheescht, d'Meghan hätt d'Kate zum Kräische bruecht. "De Géigendeel war wouer", sou d'Herzogin vu Sussex. Tatsächlech hätt d'Kate sech iwwer eppes opgereegt, dann awer hire Faux-pas agesinn a sech dofir entschëllegt. "Jiddereen an der Institutioun wousst dat".

Dat wier fir si den Ufank vum richtege Ruffmord gewiescht an de Punkt, wou sech d'Bezéiung zu der kinneklecher Famill gedréint hätt. "Ech hu verstanen, dass ech net just net geschützt ginn, mä dass si (d'Royals) och nach bereet waren, ze léien, fir aner Familljememberen ze schützen."

Den Harry huet och e puer Mol erkläert, hie wéilt verhënneren, dass sech déi tragesch Geschicht vu senger Mamm widderhëlt. D'Prinzessin Diana war vun der brittescher Press zanter der Hochzäit mam Prënz Charles verfollegt ginn. Si ass den 31. August 1997 am Alter vu 36 Joer gestuerwen, wéi hiren Auto, dee vu Paparazzie gejot gouf, an engem Tunnel zu Paräis en Accident hat.

Vu sengem Papp hätt hie sech am Stach gelooss gefillt: "Hien ass duerch eppes Änleches gaangen. Hie weess, wéi sech Péng ufillt." Hien hätt säi Papp awer ëmmer gär.

Säi Papp a säi Brudder William wieren am kinnekleche System "gefaangen", sou nach den Harry. "Si kommen net eraus. An ech hunn dowéinst e risegt Matgefill." Gläichzäitegt betount hien, zu senger Boma, der Kinnigin Elizabeth II., eng richtegt gutt Bezéiung ze hunn. Hien a seng Fra Meghan hätten "alles gemaach, wat si kënnen", fir an der kinneklecher Famill ze bleiwen, sou den Harry. "Ech sinn traureg, dass geschitt ass, wat geschitt ass."

Reprochë goufen et och a Richtung Rassismus. D'kinneklech Famill hätt sech virun der Gebuert vun hirem Bouf Archie nämlech Suergen ëm d'Hautfaarf vum dësem gemaach. Si hätt wärend der Schwangerschaft musse Gespréicher féieren, wéi däischter dem Jong seng Haut wuel wäert ginn.

Am Interview hunn déi schwanger Meghan an den Harry dann och verroden, dass hiert zweet Kand e Meedche gëtt. Si hunn och zouginn, dass si sech schonn 3 Deeg virum offiziellen Hochzäitsdatum heemlech den 19. Mee 2018 d'Jo-Wuert ginn hunn.