Am neiste Guide Michelin kréie souwuel de "Ryôdô" an de "La Villa de Camille et Julien" aus der Stad eng éischte Kéier e Michelin-Stär.

Guide Michelin / Reportage Pit Everling

Um Méindeg huet Michelin d'Selektioun vun dësem Joer fir de Guide Michelin Belsch a Lëtzebuerg virgestallt. 2022 ginn 841 Etablissementer recommandéiert, ënnert deenen 141 Stäre-Restauranten an 147 Bib-Gourmand-Restaurante sinn. Dräi nei Restaurante goufe mat zwee Stären ausgezeechent, 16 nei Etablissementer krute fir d'éischte Kéier e Stär an de Restaurant ¡Toma! zu Léck gouf fir säin Engagement fir eng nohalteg Gastronomie mam grénge Stär ausgezeechent.

D'Belsch huet da rëm dräi Restauranten, déi dräi Stäre vu Michelin kruten. De Restaurant Hof van Cleve zu Kruishoutem an de Restaurant Zilte zu Antwerpen behalen hir Stären. De Boury zu Roeselare ass no véier Joer vun zwee op dräi Stären un d'Spëtzt vun der Weltgastronomie geklommen.

Donieft begréisst Michelin Belgique et Luxembourg 2022 och dräi nei Zwee-Stäre-Restauranten: de Restaurant Hertog Jan zu Anvers, souwéi La Villa Lorraine zu Bréissel an de Restaurant Colette - De Vijvers zu Averbode.

Da sinn et ganzer 16 nei Restauranten aus der Belsch, déi ee Stär kréien. Zu Anvers ass et ënnert anerem d'asiatesch Kiche vum DIM Dining, de Fine Fleur an den Nebo. Och ënnert den neien Etablissementer sinn de Restaurant Rebelle, den Hert vun Turnhout an de chez Tinèlle hunn dëst Joer ee Stär kritt. Weider sinn et de chez Vintage, den In den Hert, Sense, Fleur de Lin an den Aurum by Gary Kirchens. Den ¡Toma!, deen och de grénge Stär vu Michelin krut, ass och ënnert den neie Restaurante am Guide 2022. Donieft goufen och den Arden an de Quai 4.

Michelin Stäre-Restauranten zu Lëtzebuerg:

All Joers bléckt d'Gastronomie gespaant op d'Urteel vun de Michelin-Inspekteren. E Méindeg de Moie war et esou wäit: Déi nei Editioun vum renomméierte Guide fir d'Belsch a Lëtzebuerg gouf presentéiert. Fir de Grand-Duché gëtt et do dach awer eng Partie Changementer.

Fänke mer u mat deene positiven Nouvellen. Zwee nei Restauranten däerfe sech iwwer ee Stär freeën. Do wier de japanesche Restaurant "Ryôdô" zu Hollerech, dee ganz kuerz virun der Pandemie opgemaach huet. De Chef Ryodo Kajiwara war bei der Michelin-Konkurrenz vu Gault et Millau schonn zum Chef de l'année 2022 gekréint ginn. Op där aner Säit ass d'"La Villa de Camille et de Julien" nei an der Lëtzebuerger Stäre-Famill dobäi. De gastronomesche Restaurant an der Polvermillen huet am Juni 2020 seng Dieren opgemaach.

Dem Guide Michelin no bleift d'"Ma Langue Sourit" op der Éitermillen de beschte Restaurant am Land. De Chef Cyril Molard ka seng zwee Stäre behalen.

Ee Stär behalen dann: "D‘Distillerie" vu Buerglënster, de Restaurant "Léa Linster" vu Fréiseng,  de "Mosconi" aus der Stad, de Restaurant "Fani" vu Réiser an de "Guillou Campagne" vu Schuller.

D'Distillerie krut iwwerdeems e grénge Stär, dee fir "Gastronomie an Nohaltegkeet" steet. E Restaurant, dee jo och vum "We're Smart Green Guide" zum beschte Geméis-Restaurant vun der Welt ausgezeechent gouf.

Op anere Plazen dierft d'Sortie vum neie Michelin-Guide manner zelebréiert ginn. 3 Lëtzebuerger Restaurante verléieren hire Stär. Ënner anerem d'Traditiouns-Haus Clairefontaine op der Stater Plaz mam selwechten Numm gëtt no iwwer 2 Joerzéngten net méi vum roude Guide berécksiichtegt. Och de Restaurant Cristallerie op der Plëss, deen zënter 2015 e Stär hat, verléiert dësen. De Clausener Restaurant "Les Jardins d'Anaïs" war 2019 mat engem Stär ausgezeechent ginn a kritt dee mam neie Guide och ofgeholl.

"Bib Gourmand" steet bei Michelin fir e gutt Präis/Leeschtungs-Verhältnis. Déi Auszeechnung behalen de "Parc Le'h" vun Diddeleng, de Restaurant "Dahm" vun Ierpeldeng, de "K“ Restaurant" vun Huldang, d'"Brasserie des Jardins", d'"Cantine du Châtelet" an de "Kamakura" aus der Stad. De Restaurant "Bonifas" vun Nouspelt an de "Bistronome" vu Stroossen.

De Bib-Gourmand krute verschidden Etablissementer ewech geholl an zwar den "Atelier Windsor" an d'"Bergamote" aus der Stad, woubäi d'Bergamote zougemaach huet. Dat selwecht gëllt fir de "Joël Schaffer" vu Mäertert an den "Two 6 Two" vu Stroossen. De lescht genannten ass dem Internetsite no vun enger temporärer Fermeture betraff.  
De Restaurant "L'Écuelle" vu Wilwerdang krut an der neister Editioun vum Guide Michelin kee „Bib Gourmand“ méi.