Zanter e Méindeg de Moie fiert den Tram am Dag am 4-Minutten-Takt, an net méi all 5 Minutten.

Dat fir der héijer Demande gerecht ze ginn, wéi et de Méindeg de Mëtteg vun de Responsabele geheescht huet. Et huelen nämlech elo a Pandemie-Zäite scho méi Leit den Tram, wéi ee sech am Mobilitéitsministère an der Stad Lëtzebuerg erwaart hat.

Tram am 4-Minutten-Takt/Reportage Fanny Kinsch

Am Abrëll dëst Joer sinn am Duerchschnëtt 42.000 Leit d'Woch mam Tram gefuer, méi wéi duebel sou vill wéi nach am Januar. Ier den Tram den 13. Dezember 2020 bis op d'Gare gefuer ass, louch d'Zuel vun de Passagéier bei 15.100 d'Woch, sou de gréngen Transportminister François Bausch.

"Trotz Lockdown, trotz Problemer, déi mer haten, ass et sou, dass den Tram e risege Succès huet, datt mer bei wäitem méi Reesender transportéiere schonn um éischten Deel, wéi mer dat geduecht haten. Mir ginn och dovunner aus, dass, wa bis den Home Office fäerdeg ass a méi Leit nees present sinn op der Aarbecht, datt mer relativ rapid wäerten eropgoen op 70.000-80.000 Passagéier den Dag."

Deen Ament wier et dann och méiglech, all 3 Minutten en Tram fueren ze loossen. Bis September 2022 da soll den Tram vun der Gare weider op Bouneweg fueren. Déi deementspriechend Aarbechten um Pont Buchler wäerte virum Summer ofgeschloss sinn, esou de Minister. Hei entsteet den neien Arrêt "Leschte Steiwer/Dernier Sol", en Numm mat historeschem Charakter, sou d'Stater DP-Buergermeeschtesch Lydie Polfer.

"Deen Numm kënnt schonn aus dem virleschte Joerhonnert, schonn am 19. Joerhonnert war do e Café, dee "Leschte Steiwer" geheescht huet. A Steiwer war deemools de Su. De leschte Steiwer, dee louch ausserhalb vun der Festungsmauer a wann d'Baueren dann heemgefuer si vum Maart bis an déi baueresch Géigenden, vu wou se komm sinn, da war dat déi lescht Wiertschaft, wou se nach konnten dee leschte Su ausginn."

D'Stad Lëtzebuerg an de Gesondheetsministère hunn iwwerdeems wëlles, den Drogekonsumraum Abrigado, deen den Ament beim Pont Buchler ass, ze plënneren. Doriwwer wier ee sech an enger Reunioun virun engem Mount eens ginn.

"Loosse mer et mol ganz diplomatesch soen, datt et der Méi wäert wier, fir driwwer nozedenken, fir den Abrigado ze delokaliséieren. Well, wéi der lo gesitt, e kënnt laanscht eng Strooss, déi wierklech ganz staark befuer ass a jiddwereen, deen d'Situatioun sur place kennt, gesäit, dass et do all Dag zu méi wéi enger geféierlecher Situatioun kënnt. Mee, nach muss dann déi Plaz fonnt ginn."

Vum leschte Steiwer fiert den Tram da weider bis op d'Héicht vum Bouneweger Lycée, sou den Transportminister François Bausch.

"Dat ass dat, wat hannert dem Pont Buchler, wou dee verbreet ginn ass, no riets direkt Richtung Bouneweg geet. Dat gëtt jo déi nei N3, Thionvillesstrooss gëtt eng Kéier reklasséiert vun enger Nationalstrooss zréck entweder zu engem CR oder zu enger Gemengestrooss, dat kënne mer duerno kucken."

Bei den neien Tramsarrêt "Lycée Bouneweg" kënnt och eng Busgare, fir datt d'Leit méi einfach kënne vum Bus an den Tram ëmklammen.

"Dat gëtt e ganz wichtege Pôle d'échange natierlech och fir den RGTR, well do si vill Bussen, déi mer haut nach awer méi an d'Stad erabréngen, déi wäerte souguer schonn do kënnen ofgebonne ginn an dat wäert natierlech och fir d'Reesender vum RGTR och e grousse Gewënn ginn. Well haut musse se erausklammen um Arrêt op der Rocade an da mussen se iwwert d'Bréck lafen op déi aner Säit lafe fir op den Tram. Wa se natierlech an Zukunft do erausgelooss ginn, da kënne se vum Bus quasi an den Tram eraklammen, dat gëtt vill méi einfach a vill méi agreabel."

Bis Enn 2023 da soll deen nächsten Tronçon fäerdeg ginn, bis bei den neie Futtball- a Rugby-Stadion op der Cloche d'Or. De Minister wëll iwwerdeems nach virun Enn 2022 d'Projete fir 4 weider Strecken an der Chamber deposéieren - fir an déi nei Quartieren um Kierchbierg, fir de séieren Tram op Esch, fir op Hollerech a fir op Stroossen bei de CHL.