Wéinst de Bauereprotester an Däitschland haten eng Rei Baueren um Mëttwoch de Moie Grenziwwergäng a Richtung Lëtzebuerg zougesat.

Wéi d'Police confirméiert, waren d'Grenzbrécken a Richtung Gréiwemaacher, Réimech, Wuermer a Schengen betraff, op de Stroosse ronderëm huet et sech gestaut. D'Autobunne sinn allerdéngs opbliwwen.

Géint 9.40 Auer koum e Mëttwoch de Moien de Message vun der Police, datt d'Blockade vun de Bauere laanscht d'Musel all opgehuewe wieren an och de Stau hätt sech antëscht opgeléist.

Vun der Plaz vu Schengen gouf eis e Mëttwoch de Moie géint 6.20 Auer confirméiert, datt d'Blockad a Richtung Lëtzebuerg ugaangen ass, d'Bunn a Richtung Däitschland war deen Ament awer nach op. Zu Pärel war de Rond-point bei der aler Muselsbréck blockéiert. Op der Plaz war déi franséisch, déi däitsch an déi Lëtzebuerger Police.

Wéi d'Police op RTL-Nofro confirméiert huet, sinn op d'Grenziwwergäng a Richtung Gréiwemaacher an a Richtung Schengen vun den Demonstranten Mëschtkéip op d'Fuerbunn gekippt ginn. Et wier awer nach laanschtgaangen.

Schonn Ufank Januar koum et duerch d'Bauereprotester am Raum Tréier zu Chaos am Pendler-Trafic. Deemools haten d'Trakteren och Autobunnsopfaarte blockéiert. Zanter Mëtt Dezember demonstréieren d'Baueren an Däitschland scho géint Pläng vun der Regierung, verschidde Subventioune falen ze loossen. Esou soll d'Bäihëllef fir den Agrardiesel zum Beispill bis 2026 schrëttweis fortfalen. Op anere Plazen huet d'Regierung awer och scho Konzessioune gemaach.

Och a Frankräich goungen d'Protester e Mëttwoch virun, ënnert anerem op de groussen Autobunnsachse ronderëm Paräis oder Lyon. Déi däitsch Bauere wollten e Mëttwoch dowéinst och eriwwerfueren op Schengen: Als symboleschen Akt, well et en europäesche Problem wier, ausgeléist duerch eng Hausse vun der Energie-Steier.

Et wier verpasst ginn, eenheetlech Reegele fir den europäeschen Agrarsecteur ze schafen, a Schengen géif ebe symbolesch fir d'Unitéit vun Europa stoen. Wann ee keng Satisfaktioun géif kréien, géifen et weider Aktioune ginn, a wann et misst sinn, géif e bis op Bréissel bei d'EU-Kommissioun fueren.

E Méindeg de Moie gouf et doriwwer eraus och schonn änlech Bauere-Blockaden un der belscher Grenz, wat zu engem zolitte Stau op der Autobunn E411 Bréissel-Lëtzebuerg an der Areler A6 gefouert hat.

Zu Lëtzebuerg sinn den Ament nach keng Bauereprotester geplangt, ma dem President vun der Chambre d'agriculture Guy Feyder no géif een och am Grand-Duché den Drock spieren.