Op der Uklo-Bänk sëtze mam Marco Mille, mam Fränk Schneider a mam André Kemmer 3 fréier Geheimdéngschtler.

Hinne gëtt am wesentlechen 3 Saache reprochéiert: Eng illegal Oflauschteraktioun, d'Klaue vun Daten an d'Privatsphär net respektéiert ze hunn. Konkret geet et ëm d'Fro, ob déi 3 de Geschäftsmann Mariotto legal ofgelauschtert hunn.

Ee vun den Zeien ass de Jean-Claude Juncker, deen e Mëttwoch de Mëtteg dierft un d'Rei kommen. Als Staatsminister war hie politesch responsabel fir d'Aktivitéite vum SREL an hätt Oflauschteraktioune missten autoriséieren.

Am Raum steet jo och d'Rumeur, dass e Gespréich tëscht dem Jean-Claude Juncker an dem Grand-Duc Henri, opgeholl gi war, an op enger verschlësselter CD gespäichert, déi allerdéngs wéi et schéngt net dechiffréiert kéint ginn.

8 Sitzunge sinn emol bis den 13. Mäerz virgesinn.

SREL-Prozess huet ugefaangen / Reportage Eric Ewald

Um Dënschdeg de Moie war et also um Stater Geriicht déi erwaarten zéi, fir d'Beschëllegt an hir Affekoten awer net onwichteg 1. Sëtzung vum SREL- oder Frisbee-Prozess.
Fir deen de Publikum-Interessi manner grouss war, wéi vläicht erwaart; dogéint gouf et es am Ufank relativ vill vum Rescht vun der Magistratur a vun net-implizéierten Affekoten.

Eng déck Dose Journalisten waren zwar do an dat waren der méi wéi Spectateuren. An ee fréiere Bommeleeër-Enquêteur war och do, vu datt dës SREL-Affär mat der Bommeleeër-Affär verknäppt ass.

SREL-Prozess/Reportage Nico Graf

Am Mëttelpunkt vun dëser 1. Sëtzung stounge juristesch Kriticke vun den Affekote vun den 3 Ugeklote Marco Mille, Fränk Schneider an André Kemmer. Déi koumen um Dënschdeg guer net zu Wuert, am Géigesaz - eben - zu hiren Affekoten.

Den Ufank huet de Me Pol Urbany gemaach. Den Affekot vum André Kemmer huet gemengt, eppes méi wéi 13 Joer no de Faite sollt d'Geriicht d'Poursuitte géint säi Client irrecevabel erklären. De Prozess kéint och schonn direkt ophalen, e Prozess, an deem et ëm d'Erënnerung vum Schlësselzeie Jean-Claude Juncker géif goen, dee sengerzäit gesot hätt: „Mir hunn näischt héieren, wéi mir gelauschtert hunn.“

Dofir wär hien dovun iwwerzeegt, dass den deemolege Premier d'Ecoute op den Elektronikspezialist Loris Mariotto, ëm déi et am Prozess geet, autoriséiert huet, sou de Me Urbany. De Jean-Claude Juncker hätt méi spéit dozou gesot, absolut keng Erënnerung méi ze hunn, et awer net auszeschléissen. Den Dossier hätt och tëscht dem 1. an dem zweeten ausgesatene Prozess zwee Joer am Tirang geleeën, fir de fréiere Staatsminister ze schützen.

Dem André Kemmer säin Affekot huet sech donieft dru gestéiert, dass de Parquet déi entspriechend Audiofichieren huet, d'Defense awer net. Et wär fir d'éischt, dass hie mat sou eppes konfrontéiert wär.

Zu gudder Lescht misst de Jean-Claude Juncker, an den Ae vum Me Urbany, Co-Beschëllegte sinn an net Zeien an de Loris Mariotto, dee fir dës ganz Affär responsabel wär, 1. Beschëllegten an net Partie civile.

De Me Laurent Niedner ass iwwerdeems op Informatiounen agaangen, déi een als Verdeedegung eréischt d'lescht Woch kritt hätt, a Form vun engem Classeur. Doraus géif ervirgoen, dass den deemolegen Oppositiounspolitiker François Bausch am Dezember 2012 just eng Kopie an net den original USB-Stick ofginn hätt, op deem d'ominéist Aueregespréich tëscht sengem Client Marco Mille an dem Jean-Claude Juncker drop war. An der Suite wär sech op en inkorrekte Verbatim vun deem Gespréich beruff ginn. Beamten aus dem Staatsministère no hätt den Ex-Premier nämlech näischt an deem Gespréich zu der Ecoute op de Loris Mariotto gesot, woubäi den CSV-Politiker dat awer a Wierklechkeet gemaach hätt.

De Me Laurent Ries dann huet betount, dass säi Mandant Fränk Schneider an dëser Affär inaktiv war an dofir all Responsabilitéit kontestéiert. Dee wéisst doriwwer eraus och net, wat him reprochéiert gëtt.

Fir de Vertrieder vum Parquet sollten d'Riichter op de Gros vun de Froen am Urteel agoen. Et léich awer keen Iwwerschreide vum Délai raisonnable vir.

Um Enn vun der Sëtzung sot de President vum Geriicht, um Mëttwoch de Mëtte géif seng Decisioun heizou bekannt ginn.