Schonn zejoert war d'Monica Semedo vum deemolege Parlamentspresident David Sassoli wéinst Harcèlement psychologique fir zwou Woche suspendéiert ginn.

Nodeems ee fréiere Mataarbechter zejoert eng Plainte beim zoustännege Comité am Europaparlament deposéiert hat, gouf eng Enquête lancéiert, déi elo ofgeschloss ass.

Wéi et am "Wort" heescht, koum dee Comité zur Konklusioun, datt d'Reprochë fondéiert sinn an et sech effektiv op en Neits ëm Harcèlement psychologique handelt.

Dee Comité huet säi Rapport der Parlamentspresidentin Roberta Metsola ginn, un där et elo ass, fir eng Decisioun ze huelen, ob a wéi eng Sanktioune géint déi fréier DP-Politikerin decidéiert ginn. Am Raum steet eng Suspensioun vun e puer Wochen, wärend där d'Madamm Semedo dann net dierf u Sëtzungen deelhuelen.

Déi definitiv Decisioun iwwer eventuell nei Sanktioune géint d'Monica Semedo soll am Dezember oder Januar geholl ginn.

Schonn zejoert war d'Monica Semedo vum deemolege Parlamentspresident David Sassoli wéinst Harcèlement psychologique fir zwou Woche suspendéiert ginn an hat doropshin hir DP-Parteikaart ofginn.

Wort-Informatiounen no sollen déi nei Sanktiounen dës Kéier e Stéck méi zolidd ausfalen.

Aus Kreesser vu fréiere Mataarbechter heescht et, d'Aarbechtsklima am Staff vun der Madamm Semedo wier net z'erdroe gewiescht, et wieren onrealistesch Uspréch un d'Assistente gestallt ginn a Rieds geet och vu stännegem mentalen Drock.

Zanter datt d'fréier liberal Politikerin am Parlament ass, wieren ewell 8 Mataarbechter komm an nees gaangen.

Nodeem d'Monica Semedo aus der DP ausgetrueden ass, ass si awer weider Member vun der liberaler Renew-Fraktioun.

Reaktioun vun der Europadeputéiert

An engem Bäitrag op Facebook weist d'Monica Semedo sech kämpferesch. Wa Leit géife soen, si wier "domm" a géif net schaffen, bräicht ee just hir offiziell Säit ze kucken. "Loosst mech meng Aarbecht maachen" mat "enger Ekipp, déi genee sou vill Passioun huet wéi ech", heescht et ofschléissend am Post.

Och d'lescht Joer scho war d'Europadeputéiert, déi jo elo fir Renew am Parlament sëtzt, sech kenger Schold bewosst.