Den Urgentist, deen zanter Joren a Syrien oder rezent der Ukrain aktiv ass, steet och an dëser Kris am direkte Kontakt mat internationalen a lokalen ONGen.

"Mir brauchen elo en humanitäre Waffestëllstand a Gaza." Dat fuerderen net just 13 ONGen, dorënner Amnesty International, Médecins sans frontières an Handicap International, ma och d'Vereenten Natiounen.  Israel an d'Hamas wiere kuerz virun engem Accord fir eng Wafferou an der Gazasträif. Heescht et e Sonndeg aus dem Qatar. D'USA relativéieren, schwätzen awer vu wichtege Fortschrëtter. Den Deal wäert wuel erauslafen op d'Fräiloosse vun israeelesche Geisele fir eng Wafferou, wärend där humanitär Hëllef ka geliwwert ginn.

2,2 Millioune Mënschen an der Gazasträif brauchen dréngend Iessen, proppert Waasser a medezinesch Versuergung. Wéi grouss d'Nout ass, kann de Professer Raphael Pitti aschätzen. De Spezialist a Krichsmedezin an humanitärer Hëllef ass ee vun de westlechen Dokteren, déi prett sinn a Gaza hëllefen ze goen, soubal Ägypten oder Israel gréng Luucht ginn.

Den Urgentist, deen zanter Joren a Syrien oder méi rezent der Ukrain aktiv ass, steet och an dëser Kris am direkte Kontakt mat internationalen a lokalen ONGen.

"Il faut bien se dire que nous assistons à une véritable catastrophe humanitaire, de très grande ampleur.  Causée par les hommes, contre des hommes."

De Vereenten Natiounen no si ronn 1,5 Milliounen, vun den 2,2 Milliounen Awunner aus der Gazasträif deplacéiert.
Dee vun der Hamas kontrolléierte Gesondheetsministère huet d'Zuel vun 12.000 palestinenseschen Affer publizéiert. Dorënner, ronn 5.000 Kanner an eng 3.300 Fraen. E Bilan, dee vu kenger onofhängeger Source iwwerpréift ka ginn. Fakt ass awer: D'Zoustänn an de Spideeler si katastrophal. Dat bestätege Mataarbechter vu Médecins sans Frontières, an och Dokteren, mat deenen de Raphael Pitti direkt a Kontakt steet.

"Il y a eu jusqu’à présent 197 soignants qui sont mort durant ce mois. Il manque de tout. Il manque de médicaments. En particulier il manque aussi des produits anesthésiques. De ce fait beaucoup d’interventions se font sans anesthésie générale. …..  C’est une situation qui est épouvantable. Et avec la peur évidemment, d’être en même temps bombardé."

Bombardementer op ënner anerem och Spideeler, déi den israeelesche Vertrieder bei de Vereenten Natiounen esou rechtfäerdegt:

"Hamas mécht eng extensiv Notzung vu Spideeler, medezineschen Institutiounen an Ambulanze fir militäresch Zwecker. Beweiser aus de leschten Deeg validéiere kloer, datt d'Hamas Waffen a Militärausrëschtung a Spideeler verstoppt an Tunnelle baut. D'Liewe vu Patienten a medezineschem Personal a Gefor bréngt. Wat d'Opriff fir e Waffestëllstand ubelaangt. Soulaang déi 238 Leit vun Hamas gehale ginn, gëtt et keng Plaz fir e verlängerte Waffestëllstand."

Där Sécherheetszone gouf et wärend dem Konflikt a Syrien. An der Gazasträif ass d'Realitéit awer eng aner. An Tëschenzäit hale sech iwwer 2 Millioune Mënschen an engem Raum op, deen emol net méi sou grouss, wéi 1/7 vu Lëtzebuerg ass.

Fir de Raphael Pitti, gëtt et just een Auswee:

"La violence ne peut qu’attiser la violence et entretenir la violence et provoquer la violence en retour. Et donc il est vraiment important que l’on puisse commencer à tenir des discours de paix, des discours de pacification. Que l’on respecte la dignité des personnes. Tuer quelqu’un c’est assez facile. Mais on tue aussi d’une autre façon. En ne respectant pas sa dignité."

Zeien erzielen, wat si de 7. Oktober an dono erlieft hunn

"Bréngt all déi, déi entfouert sinn heem. Hëlleft ons!" - d'Attacke vun den Terroriste vun der Hamas de 7. Oktober hunn international fir Entsetze gesuergt. Iwwer 1.200 Mënsche sinn ëm d'Liewe komm. Op d'mannst 238 Geisele goufe vun den Terroristen an d'Gazasträif verschleeft.   Déi israeelesch Ambassade fir d'Belsch a Lëtzebuerg hat dës Woch op eng ganz speziell Pressekonferenz invitéiert. 4 Aenzeie vun de Massaker an ee Familljemember vun enger Geisel hu virun engem klenge Grupp Journalisten erzielt, wat si erlieft hunn.

"Dir héiert si froen: Firwat hutt dir meng Schwëster ëmbruecht? Firwat hutt dir meng Schwëster ëmbruecht?"

Der 72 Joer aler Dvora Idan hire Fils Tzachi gouf de 7. Oktober vun den Terroriste vun der Hamas an d’Gazasträif verschleeft. Hir 18 Joer al Enkelin, déi 3 Deeg virdrun hire Gebuertsdag gefeiert huet, gouf virun hiren Elteren an zwee Geschwëster erschoss. Bis elo feelt all Spuer vum Familljepapp.

"Dee Moie war et anescht. Ganz, ganz anescht. Wéi dat, wat ech bis dohin erlieft hat."
Déi 55 Joer al Ayelet Hakim konnt sech mat Zäit am Kibbutz Be’eri mat hiren 3 Kanner am Saferoom vum Haus a Sécherheet bréngen. Iwwer WhatsApp hu si matgelies, wéi Baussen, Haiser a Brand gestach goufen. Wéi Noperen erschoss goufen. Der Fra hir Schwëster an hire Schwoer goufen entfouert. Bis elo feelt vun hinnen all Spuer.

"Op dem Ament hunn ech gebiet, fir ze stierwen. Well ech wousst ganz gutt, datt wann se d’Dier opmaache géifen, ech léiwer direkt stierwe géif, wéi vergewaltegt oder op Gaza entfouert ze ginn."
Déi 35 Joer al Laura Blajman war zesumme mat hirem Mann a Frënn um Tribe of Nova Festival. Zesumme mat 5 weidere Persounen huet d’Koppel sech an enger Caravanne verstoppt. 6 Stonnen an Doudangscht. Iwwerdeems d’Terroriste bausse Mënsche gejot an erschoss hunn. 270 Persoune goufen um Site vum Festival ëmbruecht.