"Wiels de fir d'Personalitéit oder fir d'Politik?"

E Mann, dee verurteelt gouf an deen - erwisenermoossen -  extrem vill Ligen erzielt. Firwat kënnt hien esou gutt un? D'Annick Goerens huet versicht dat erauszefannen.
 
"1000 Prozent Republikaner. 1000 Prozent Donald Trump". Dat seet den Eddy Garcia, een Uber-Chauffeur den mech duerch Las Vegas gefouert huet. Keng zwou Minutten am Auto hunn mer iwwer d'Walen diskutéiert an hien huet mer ganz roueg a verstänneg dat erkläert, wat ech hei am Nevada schonn eng sëllege Kéier héieren hunn. 
 
"Hien ass zimmlech graff. An hien kann Saachen iwwer Leit soen déi e bëssen klenglech sinn. Ech verstinn dat. Hien huet een groussen Ego. Ech verstinn dat. Mee du muss seng Personalitéit net gär hunn. Mee wats hei muss gären hunn, dat ass wann s de an de Buttek gees an du bezils duebel souvill fir e Steak, nach méi wéi dat Duebelt fir Eeër oder Poulet. Dat muss de sou kucken. An dat ass hei ëmmer de Sujet Nummer 1, nämlech: wéi vill kascht et? Wéi vill kascht et fir deng Kanner ze ernären oder déi eeler Leit? Si liewen op engem strikte Budget. Si kënnen sech dës héich Präisser net méi leeschten. An den Donald Trump wäert déi erofsetzen. Hien huet et schonn eemol gemaach. An hien wäert et nach eemol maachen."

An genee dat do ass effektiv dat Éischt wat ech hei an den States ëmmer ze héieren kréien - déi héich Präisser - et geet ëmmer ëm d'Suen. Wann een hei akafen geet oder sech iwwerhaapt nach e Restaurant leeschte kann, jo dann bleiwen net vill Kitten am Nilles iwwereg, wéi een op Jéinesch géing soen.
 
"2016 hunn ech gezéckt fir den Trump ze wielen. Mee wéi ech gesinn hunn, dass hien 80 Prozent vun dem wat hien gesot huet, och agehalen huet. Dunn hunn ech mer geduecht: ech muss nees fir de Mann wielen. Liewensmëttel waren deemools 20 Prozent méi bëlleg. Mëllech-Pudder fir Puppelcher war 30 Prozent méi bëlleg. Logement 40 Prozent manner an Bensinn 40-50 Prozent manner deier wéi elo. Dofir soen ech: wiels de fir d'Personalitéit oder fir d'Politik? Ech wielen fir d'Politik?" 
 
Republikaner oder "Trumpisten" soen hei ëmmer nees "promises made, promises kept". An natierlech huet den Trump eng ganz Rei Verspriechen agehalen: et goufen zum Beispill verschidden Steierreduktiounen, d'USA sinn aus dem Paräisser Klima-Accord ausgetrueden an den Trump huet den Justiz-System ëmgebaut. An dat rechnen vill Leit him ganz héich un. Mee grad do läit den Däiwel natierlech och am Detail an Detailer ginn dacks iwwersinn.

Wat huet den Trump versprach an agehalen? (Just e puer Beispiller)

• Et goufen verschidden Steierreduktiounen
• D'USA sinn aus dem Paräisser Klima-Accord ausgetrueden
• Den Trump huet den Justiz-System ëmgebaut
• Den Trump huet eng amerikanesch Versioun vun der simplification administrativ ëmgesat a vill Regulatiounen gestrach
• Den Trump hat versprach d'Truppen aus dem Noen a Mëttleren Osten zeréckzezéien "bring the troops home" an dat ass zum Deel och geschitt 

Wat huet den Trump versprach an net agehalen? (Just e puer Beispiller)

• Den Trump wollt eng komplett Mauer bauen, tëscht Mexiko an den USA, bezuelt vun Mexiko. 194 Meilen vun enger bestoender Mauer goufen renovéiert. Just 3 Meilen goufen komplett frësch gebaut an natierlech net vun Mexiko bezuelt.
• Den Trump wollt Obamacare (Gesondheetversuergung fir déi ronn 15 Prozent vun den Amerikaner déi guer net verséchert sinn) ofschafen respektiv ersetzen
• Den Trump wollt Folter legal maachen. Hien hat zum Beispill gesot "torture works". Hien géif "waterboarding" direkt legal maachen
• Den Trump wollt d'Hillary Clinton an de Prisong bréngen "lock her up" gouf ëmmer gesongen op senge Walkampf-Evenementer 2016. D'Madame Clinton ass natierlech net am Prisong
• Den Trump wollt aus der NATO eraus, dat ass bis haut nach net geschitt 
• Den Trump hat versprach fir dofir ze suergen dass ALL d'Moslemen e Visa-Verbuet géinge kréien, also et onméiglech fir si maachen an d'USA anzereesen. Mee hien hat et awer versicht, notamment mat 2 "travel bans". De Supreme Court war dogéint virgaangen. Beim 3. Versuch ass et gegléckt. Moslemen aus verschiddene Länner dierfen bis haut net areesen