Keng schéin Nouvellen ëm Ouschteren aus Australien. Do sinn duerch meterhéich Wellen an de leschten Deeg 6 Persounen ëmkomm.

Wéi d'Police am Bundesstaat New South Wales mellt, gouf op Ouschtersonndeg e sechst Affer, e Fëscher, dout bei der Plage Wattamola Beach net wäit vu  Sydney gebuergen. D'Küst do ass immens fielseg. E 14 Joer ale Jong, dee mam Mann um Boot war, konnt reaniméiert ginn a koum an d'Spidol.

E Samschdeg scho war an New South Wales e Fëscher mat sengem Boot vun enger Well vu bis zu 3 Meter un e fielsege Küstendeel geschleidert ginn. Op Karfreideg sinn am selwechte Bundesstaat donieft nach 3 Persounen erdronk. Am Bundesstaat Victoria ass eng Fra ëm d'Liewe komm, déi vun der Stréimung an d'Mier gezu gouf. Wéi offiziell Autoritéiten nach matgedeelt hunn, ginn 3 Persoune vermësst.

© AFP
© AFP
Les photos diffusées sur ce site sont soumises à des droits d’auteurs et ne peuvent être copiées, modifiées, vendues, sans l’autorisation préalable du propriétaire du site en question.

Schonn en Donneschdeg hat d'Waasserrettungsorganisatioun SLSA virun de liewensgeféierleche Welle virun den australesche Küste gewarnt, besonnesch déi vun New South Wales a Victoria. An de leschten 10 Joer wieren un de Plagen ouni Rettungsdéngscht am Ganze 630 Mënsche gestuerwen.