A Mexiko ginn et ëmmer rëm Fäll vun Drogekriminalitéit mat villen Doudegen. De forensesche System ass staark iwwerlaascht.

Déi mexikanesch Police huet an engem private Crematoire an der Stad Ciudad Juarez iwwer 380 Läichen, déi openee getässelt waren, fonnt. Virleefeg géint et "381 Läichen, déi net konform am Crematoire deponéiert an net ageäschert goufen", huet e Vertrieder vum Parquet vum Bundesstaat Chihuahua e Sonndeg matgedeelt. Deemno goufen d'Läichen ouni erkennbar Uerdnung a verschidde Raim vum Gebai "gestapelt". Si goufen "einfach sou op de Buedem geheit, wallos, eng op déi aner".

All d'Läiche wieren abalsaméiert ginn. Amplaz vun Äschen hätten d'Familljememberen "anert Material" kritt. D'Autoritéite schätzen, datt e puer vun de Läiche bis zu zwee Joer do geleeë kéinten hunn.

De Parquet huet d'Entdeckung der "Noléissegkeet a Verantwortungslosegkeet" vun de Proprietäre vum Crematoire zougeschriwwen. Si kéinten "net méi ophuelen, wéi si verschaffe kënnen". Ee vun de Verwalter vum Crematoire hat sech schonn dem Parquet gestallt. Ob d'Läichen zu Affer vu krimineller Gewalt gehéiert hunn, hunn d'Autoritéiten net matgedeelt.

Mexiko ass staark vun organiséierter Kriminalitéit betraff. Kriminell Bande liwwere sech am Land zanter Jore brutal Kämpf ëm eng Virherrschaft iwwer den Drogemarché. D'Land leit ausserdeem ënnert enger Kris vu sengem forensesche System - duerch déi héich Zuel u Läichen, déi ze analyséiere sinn, de Personalmanktem an d'Limitatioun vu Mëttel ass de System staark iwwerlaascht.