Fir de lokale Commerce ze ënnerstëtzen, hunn de Schäfferot an de Geschäftsverband e Mëttwoch de Moien de Projet #MäinDiddeleng virgestallt.

Vun enger excellenter Teamaarbecht tëscht Privat- a Geschäftsleit, der Gemeng, dem Geschäftsverband an dem City manager huet den Diddelenger Buergermeeschter de Mëttwoch de Moie bei der Presentatioun vum Internetsite maindiddeleng.lu geschwat: D'Resultat vun där gemeinsamer Initiativ fir de lokale Commerce kéint sech allzäit weise loossen.

Diddelenger Commerce/Reportage Eric Ewald

Dem Dan Biancalana no hätt een et nämlech a kuerzer Zäit fäerdegbruecht, fir 44 Commercen u Bord ze kréien. Op där Plattform kann e Buttek oder Restaurant eegen Akafsbongen erstellen oder e Solidaritéitsbong ouni Géigeleeschtung, respektiv op Bongen zréckgräifen, déi virgi sinn.

An den Ae vum Alain Clement, President vum Diddelenger Geschäftsverband, hätt een heimat eppes richteg Flottes op d'Bee gestallt: "Mir setzen domat, denken ech, en Zeeche vun enger schéiner Solidaritéit an als Geschäftsmann muss ech soen, deet dat engem gutt."

An zwar, well d'Initiativ heifir net vum Geschäftsverband koum, mä vu Privatleit a vun zwou Firmaen. Och de Buergermeeschter huet drop higewisen, dass hei eng ganz Rei Acteuren zum Wuel vun der Diddelenger Geschäftswelt zesummegeschafft hunn. D'Akafsbongen, déi een no der Kris aléise kéint, géife Liquiditéite fir d'Commerçanten duerstellen an dës Iddi hätt sech séier weiderentwéckelt. Fir den Dan Biancalana stinn hei d'Notioune vu Solidaritéit an Zesummenhalt am Mëttelpunkt: "Dat sinn am Fong déi zwee Elementer, mengen ech och, déi dës Initiativ hei zu Diddeleng ausmaachen an dat ebe spezifesch fir den Diddelenger Commerce."

Fir de President vum Diddelenger Geschäftsverband hat et kee Sënn, e puer Saachen an d'Liewen ze ruffen, mä d'Kräften ze bündelen. An enger 1. Entrevue, virun enger décker Woch, gouf vill un der Privatinitiativ geschafft, déi um Ufank heivu stoung. Den Alain Clement sot dat heiten zur aktueller Situatioun vu Geschäftsleit:

Den Alain Clement

"Et si Geschäfter, déi wäerten dës Kris ouni gréisser Plommen ze loossen iwwerstoen, well jo och de Staat sech hei oder do gutt mat abréngt. Et sinn awer och Betriber - an ech denken do zum Beispill un eis Coiffeuren - déi einfach elo zou hunn, wou een och op Einname muss verzichten. Wann déi Kris eriwwer ass, geet zwar sécherlech jidderee sech d'Hoer schneiden, awer dat, wat elo feelt, dat ass net méi nozehuelen. Fir eng Kleederbranche, déi sech, well se d'lescht Joer schonn eleng zu Diddeleng duerch de shared space e Plus verzeechent a vläicht méi akaaft huet, kënnt elo grad an där Phas, wou d'Leit déi nei Kollektioune kafen, sou eng Kris wéi déi heiten. Déi stinn zum Deel virun existenzielle Problemer. An ech hu sou mat muncher engem geschwat an ech wëll och net verheemlechen, dass sou muncher een dobäi Tréinen an den Aen hat."

An der Forge du Sud hat ee jo schonn d'Decisioun geholl, fir de Butteker a Restauranten, déi a Lokaler vun der Gemeng ënnerbruecht sinn, de Loyer nozeloossen.

"Mir hu jo och scho Réckmeldung kritt, dass eng Rei privat Proprietären deselwechte Geste maache vis-à-vis vun Diddelenger Commercen. An nach eng Kéier vläicht awer och hei vun dëser Plaz aus den Appell, mengen ech, gemeinsam solidaresch och ze sinn.", betount den Dan Biancalana.

Um Internetsite kënne Betriber hir Donnéeën aginn, spréch sech virstellen, an dat Ganzt wär eng Mesure, fir sech an dëse schwieregen Zäiten iwwer Waasser ze halen. Si géif awer och eng Visibilitéit no bausse ginn, well net jidderee wéisst, wat fir eng Butteker et zu Diddeleng gëtt. Dass sou e Support net vu Muttwëll ass, huet den Alain Clement mat engem Chiffer illustréiert: Hien huet vun engem Réckgank vu geschat 80% a sengem Optikerbetrib geschwat. Wann dat sou géif weidergoen, kéint hien net éiweg iwwerliewen, sou de President vum Diddelenger Geschäftsverband.

Iwwregens schafft d'Handelsconfederatioun un enger änlecher Plattform: D'nächst Woch soll déi lancéiert ginn.