D'Bauschuttdeponie zu Monnerech, soll an der zweeter Hallschent vum Joer nees opgoen. Dat fir ongeféier 2 Joer. An duerno gëtt e Solarpark draus gemaach.

2024, dat heescht ronn 10 Joer, nodeems d'Monnerecher Deponie massiv gerëtscht war, soll um Site e bis zu 12ha grousse Solarpark mat Panneaue Realitéit sinn: Dat huet de Buergermeeschter Jeannot Fürpass e Méindeg am RTL-Interview erkläert.

Solarpark zu Monnerech - Reportage Eric Ewald

Et wéilt een dat Bescht aus der Situatioun maachen, huet den CSV-Politiker gemengt, fir deen déi 4 Parteie Gemeng, Staat, Cloos an ArcelorMittal hiert zum Projet bäidroe géifen. Ier de Solarpark steet, ass awer ë.a. eng Sanéierung néideg, déi 17,5 Milliounen € kaschte soll.

Nom Terrainsrutsch vu virun déck 6 Joer war kloer, dass eng Léisung misst fonnt ginn, well d'Situatioun net sou bleiwe konnt, an d'Gemeng hätt en aussergeriichtlechen Accord mat den 3 anere Parteie gewollt, seet de Jeannot Fürpass. Virzejoert hätt eng Expertise dunn dokumentéiert, firwat et zu deem Rutsch koum. Dës Expertise wär vun all Partei acceptéiert ginn: "Du war u sech d'Vertrauensbasis geluecht, fir ze soen: Hei, mir halen op, mam Fanger op deen een, op deen aneren ze weisen. Kommt, mir versichen, ënner verstännege Leit, wéi mer deen Dossier hei kënnen upaken a wéi mer kënnen eng Léisung fannen!"

Déi setzt sech aus 4 Elementer zesummen. 1. gëtt, fir de Site ofzesécheren, eng Déiftendrainage geluecht, bis zu 5m ënnert dem Buedem. Deemools war dee gerëtscht, well no engem ganz naasse Wanter de Grondwaasserspigel ferm geklommen an an eng Buedemschicht virgedronge war, déi instabil gouf, wouropshin den Hiwwel erausgedréckt gouf. Déi Gefor bestéing nach ëmmer: "Dat Éischt, wat mer musse maachen, dat ass, dass déi Tiefendrainage realiséiert gëtt, fir dass d'Grondwaasser net méi kann an déi Schicht Buedem erakommen!"

2. missten déi zwee Hiwwelen dicht ginn, deen zu Monnerech zou, op deem v.a. Bauschutt läit, an deen zu Féiz zou, mat méi problemateschen Industrieoffäll vun der ARBED. Dofir misst nach emol eppes méi wéi eng Millioun m3 Buedem do drop: "Mir hunn eis do gëeenegt, ënnert de Parteien, dass net méi wéi 200 Camionen den Dag däerfen dohi kommen!"

Ass dat no zwee Joer geschitt, gëtt d'Uewerfläch mat Leem planéiert, fir dass näischt vun deem schwéier belaaschtende Material méi an d'Grondwaasser ka kommen.

3. ginn dann, fir ze kucken, ob d'Mesurë gräifen, 4mol d'Joer Waasserprouwe geholl, fir d'Qualitéit ze kontrolléieren. Ier, 4., dann de Solarpark gebaut gëtt, deem seng Energie duergoe kéint, fir 2.500 Stéit ofzedecken. D'Gemeng géif kucken, ob si dat an Eegeregie mécht oder sech e Partner sicht. Egal wéi hätt Lëtzebuerg um Enn doraus geléiert: "...an där Hisiicht, dass an Zukunft, wann iergendwou eng Bauschuttdeponie wäert kommen, wäerte virdru Buedembuerunge stattfannen, fir ze kucken, wéi d'Festegkeet vum Ënnergrond ass."

Schliisslech hätt sengerzäit keen doru geduecht, dass dës Deponie kéint gerëtscht kommen, sou de Monnerecher Buergermeeschter.