Et ginn aktuell 7 Fäll vu Riedelen am Land. D'Riedele sinn eng viral Krankheet, déi extrem ustiechend ass.

RTL-Informatiounen no gouf et e Foyer vu Riedelen an der Europaschoul zu Mamer - d'Eltere goufen och ewell an deem Sënn d'lescht Woch vun der Direktioun vun der Schoul informéiert.

Deen Infektioun-Foyer gouf natierlech och vun der Direktioun vun der Santé detektéiert. No enger Enquête bei den infizéierte Leit an hirem Ëmfeld huet sech erausgestallt, datt et e Risk vu Propagatioun bannent vun der Populatioun gëtt.

Et gëllt Riedelen eescht ze huelen, well se grav Komplikatioune ka mat sech bréngen, déi am uergste Fall zum Doud kënne féieren.

Jiddweree ka bis zu 20 Persounen ustiechen - duerfir den akute Rot vum Gesondheetsministère, fir op Basis vun dëser spezieller Situatioun, säin Impf-Carnet ze préiwen, op d'Vaccinatioun géint Riedelen nach aktuell ass - en Traitement géint d'Krankheet gëtt et net.

Fir e komplette Schutz ze garantéieren, sinn zwou Dosë vum Vaccin néideg.

D'Symptomer vun de Riedele sinn eng Nues, déi leeft, verbonne mat enger Conjonctivite, Houscht a Féiwer, dobäi kommen kleng, rout Punkten am ganze Gesiicht.

D'Riedele sinn eng Krankheet, déi obligatoresch muss vum Dokter deklaréiert ginn, dee se bei engem Patient feststellt.

Weider Informatiounen iwwert d'Krankheet, vun där wéi gesot den Ament 7 Leit betraff sinn, ginn et um Site sante.lu.

E Samschdeg den Owend war den Dr. Schmit, Direkter vun der Santé eisen Invité am Journal vun RTL Télé Lëtzebuerg.

VIDEO: Dr. Jean-Claude Schmit war eisen Invité
Et ginn aktuell 7 Fäll vu Riedelen am Land. Dat confirméiert d'Direktioun vun der Santé um Samschdeg.