Den OGBL huet an der Chambre des salariés déi meeschte Sëtz, 35 Stéck. Den LCGB klëmmt vu 15 op 18. Aleba, Landesverband a Syprolux bleiwen onverännert

Den Aarbechtsministère huet d'Resultater vun den Wale fir d'Chambre des salariés erausgeschéckt.

Den OGBL bleift bei wäitem stäerkste Kraaft a behält déi absolut Majoritéit. Vun de 60 Delegéierter stellt den OGBL der an Zukunft awer just nach 35, dat sinn der 3 manner, ewéi nach an de leschter Period.

Den LCGB ass mat 18 Leit an der Salariatskummer vertrueden, dat sinn der 3 méi, ewéi déi leschte Kéier.
Bei den anere Gewerkschafte bleift d'Zuel vun den Delegéierten onverännert.
Fir d'Bankegewerkschaft ALEBA sinn et 4 Delegéierter. Beim Landesverband sinn et der 2 a beim Syprolux 1.

Am Grupp 1, dem Stolsecteur, huet den onofhängege Gewerkschaftsbond ganzer 10 Punkte verluer, de chrëschtleche Gewerkschaftsbond där 13 gewonnen.  Bei der Sëtzverdeelung bleift trotzdeem alles beim alen. D'Gewerkschaft NGL hat hei keng eege Lëscht méi.

Am Grupp 2 bei den aneren Industrie sinn d'Verloschter a Prozentpunkt zwar bedeitend manner staark, hei geet awer e Sëtz vum OGBL un den LCGB. Dat selwecht ass de Fall am Grupp 3, der Constructioun.

Am Finanzgrupp 4 verléiert d'Bankegewerkschaft Aleba zwar minimal, bleift awer bei hire 4 Mandater. Well d'ALEBA awer ënner 50% gefall ass, dierft sech d'Fro vun der sektorieller Representativitéit stellen.

Eng Fro, déi net esou einfach ze beäntweren ass. Och d'Resultater vun de Wale fir d'Delegatiounen an de Betriber kéinten eng Roll spillen.

D'Aleba fuerdert op alle Fall dës sektoriell Representativitéit. De Generalsekretär Laurent Mertz weist am RTL-Interview drop hin, datt een als éischt gewerkschaftlech Force confirméiert wier. Vun der ITM wier een och gewuer ginn, datt een an de Betriber déi stäerkste Kraaft bleift. D'Aleba géing op alle Fall net agesinn, firwat hir déi Roll am Secteur net sollt unerkannt ginn.

AUDIO: De Laurent Mertz

Ob déi sektoriell Representativitéit elo unerkannt gëtt oder net, ass bis ewell net kloer. Aus dem Aarbechtsministère heescht et, datt d'Walresultat elo analyséiert gëtt an datt dann eng Decisioun geholl gëtt.

Am Grupp 5 bei den Zerwisser geet nees 1 Sëtz vum OGBL eriwwer bei den LCGB, och hei war d'Neutral Gewerkschaft net méi mat enger Lëscht mat derbäi.

RTL

© RTL Grafik

Am Grupp 6, dem ëffentleche Secteur, kann den onofhängege Gewerkschaftsbond liicht bäileeën, bei de Sëtz bleift awer alles beim alen. Fir d'FGFC gëtt et weiderhi kee Sëtz.

Am Grupp 7, dem Gesondheets-a Sozialwiesen, wënnt den OGBL 4 Punkten. Sëtzméisseg bleift alles beim alen. D'NGL war net méi mat dobäi.

Dat war och am Grupp 8 bei der CFL esou. De Landesverband verléiert zu Gonschte vum Syprolux, bleift awer stäerkste Kraaft a behält seng 2 Deputéiertemandater, de Syprolux behält 1.

Bei de Pensionnairen am Grupp 9 kann den onofhängege Gewerkschaftsbond 5 Punkte bäileeën, LCGB an ALEBA och. Dat, well den NGL net méi mat vun der Partie war. Sëtzméisseg bleift alles beim Alen.

Bei de Personalie fält op, datt am Grupp 5 zwar d'Generalsekretärin vum OGBL Nora Back de beschte Score gemaach huet, den Numm vum President André Roeltgen fanne mer allerdéngs eréischt an der Rei vun de Suppléanten erëm. Den LCGB-President Patrick Dury ass beim LCGB den éischten am Grupp 5.

Am Grupp 9 bei de Pensionären huet de Jean-Claude Reding fir den OGBL de beschte Score gemaach, den CSL-President huet jo annoncéiert, datt hien net méi fir dee Posten zur Dispositioun wäert stoen.

D'Resultater mussen elo awer nach validéiert ginn, éier se als offiziell gëllen.

Vum OGBL heescht et an engem Communiqué, datt si den 2. Abrëll op enger Pressekonferenz op d'Resultat géifen agoen. De Patrick Dury dogéint huet e kuerze Statement ofginn. Et wier en excellent Resultat fir d'Gewerkschaft, déi 3 Sëtz bäigewonnen huet an nach ni esou gutt an der Salariatskummer vertruede war.

AUDIO: Extrait Patrick Dury