Fréi waren d'Leit e Samschdeg an der Stad ënnerwee, fir dem Grand-Duc Jean eng lescht Éier ze erweisen.

Trotz dem schlecht Wieder hate vill Leit de Wee an d'Stad fonnt: Engersäits wollten der vill um leschte Wee vum Grand-Duc Jean deelhuelen, anerersäits waren och vill Perséinlechkeeten a kinneklech Gäscht ze gesinn.

De Magazin huet Leit getraff, déi schonn moies fréi um 7 Auer bei der Kathedral souzen, Leit, déi wollten dobäi sinn, obwuel se net gutt zu Fouss sinn, a Leit, déi extra aus dem Ausland ugereest sinn, fir bei dësem Evenement dobäi ze sinn.

Am Videoreportage e klengen Abléck, wéi d'Spectateuren d'Staatsbegriefnes an der Staat erlieft hunn.

Fotoandréck vum Samschdeg de Moien aus der Stad

Géint 8 Auer war et  nach roueg an der Stad, wat wuel um naassen a kale Wieder dobausse loung. Éischt Leit hate sech awer schonn op der Plëss a virum Palais afonnt.

Och d'Irish Guards ware scho fréi an der Stad an hu sech an der Residenz vum briteschen Ambassadeur op d'Begriefnes preparéiert.

Hannert dem Palais gouf kuerz no 9 Auer op d'Staatsinvitéë gewaart a géint 9.30 Auer ass d'groussherzoglech Famill am Palais ukomm.

Eppes no 10.30 Auer goufen d'Famill an Invitéeë vum Palais bei d'Kathedral gefouert. An där Zäit huet sech och d'Plëss, wou e groussen Ecran installéiert ginn ass, lues a lues gefëllt.

© Screenshot RTL Livestream

Um 11.10 Auer e Samschdeg hat d'Lued vum Grand-Duc Jean op der "Lafette" de Palais verlooss, gezu vun engem Militärgefier. Knapp 20 Minutte méi spéit war d'Lued an der Kathedral ukomm.

Wéi beléift de Grand-Duc war, konnt een déi lescht Deeg gesinn: Dausende Leit si beim Palais defiléiert, fir him Äddi ze soen. Zanter sengem Doudesdag den 23. Abrëll war de Grand-Duché jo a Staatstrauer.

Am Palais gouf de Groussherzog opgeboert, déi staatlech Vertrieder hunn him do eng leschten Éier erwisen. Bausse stoungen d'Mënsche Schlaang, fir de Grand-Duc eng leschte Kéier ze gesinn an dem beléifte Monarch Äddi ze soen.