An der Affär #Gaardenhaischen krut den Déifferdenger Buergermeeschter Abus de pouvoir virgehäit. Dee wiert sech, gesteet awer och Feeler an.

VIDEO: #Gaardenhaischen
An der Affär #Gaardenhaischen krut den Déifferdenger Buergermeeschter Abus de pouvoir virgehäit. Dee wiert sech, gesteet awer och Feeler an.

E Mëttwoch de Moien hu vill Déifferdenger hire Bléck gespaant op d’Stadhaus geriicht, wou de Buergermeeschter Roberto Traversini an der Affär ëm e Gaardenhaischen an d’Ëmklasséierung vun engem eegenen Terrain an de PAG, virum Gemengerot an duerno och der Press, Stellung geholl huet. Déi Lénk an d’DP hate jo déi lescht Woch d’Demissioun vum grénge Buergermeeschter gefuerdert. Eng Affär, déi schonn de ganze Summer iwwer zu Déifferdeng fir Opreegung suergt.

Rieds goung iwwer e Recours um Verwaltungsgeriicht, deen de Me Krieger fir en Noper vun engem Terrain vum Roberto Traversini agereecht huet. An deem Kontext sot de Buergermeeschter e Mëttwoch de Moien, dass de Vott vum Juni iwwer den neie PAG den nächste Mount widderholl gëtt.

Déi eng Méiglechkeet ass eng Jurisprudenz, déi ganz kloer seet, dass de betraffene Conseiller an hie selwer hätte kënnen um Vott deelhuelen. Dës Jurisprudenz hätt de Roberto Traversini och vum Inneministère geschéckt kritt. E Feeler hätte si do kloer net gemaach.

AUDIO: De Roberto Traversini

Wann een do prozesséiert, verléiert een Zäit. All Biergerin a Bierger huet d'Méiglechkeet ze soen, dass eppes net richteg ass. Fir deem aus de Féiss ze goen an de PAG sech net méintelaang dohischleeft, proposéiert de Roberto Traversini den 9. Oktober de Vott vum Juni z'annuléieren an an där selwechter Seance en neie Vott ze maachen. Sou gëtt verhënnert, dass et eng Geriichtsaffär soll ginn.

Den Dag vun e Mëttwoch war sécher ee vun de schwéiersten, wann net dee schwéiersten an der politescher Karriär vum Roberto Traversini. De grénge Buergermeeschter vun Déifferdeng, dee bei de leschte Gemengewalen zesumme mat senge Parteikollegen e phenomenaalt Resultat fäerdegbruecht hat, stoung an de leschten Deeg a Woche ferm an der Kritik wéinst engem Haus, dat hie geierft hat, an engem Gaardenhaischen, oder villméi wéinst Aarbechten dorun.

AUDIO: Affär ëm de Roberto Traversini

E Mëttwoch de Moie stoung den och-Deputéierten am 1. Gemengerot no der Summervakanz mam Réck widder der Mauer a konnt sech Loft verschafen, andeems hie Feeler zouginn huet. Déi lescht Deeg a Woche sinn awer net sou mir näischt, dir näischt un him laanschtgaangen.

Wéi ass et anescht z'erklären, dass de Roberto Traversini zu engem gewëssene Moment an der Gemengerotssëtzung Tréinen net méi verstoppe konnt? War et Zoufall, dass hie grad dee Moment vum Ali Ruckert vun der KP a Schutz geholl gouf, dem eenzegen Oppositiounspolitiker, dee sech der schaarfer Kritik vu v.a. engem François Meisch vun der DP net ugeschloss huet? Oder huet den Drock vun de leschten Deeg just dunn e Ventil no bausse gesicht?

Ronn annerhallef Stonn gouf sech mam Punkt 10 vun der Dagesuerdnung befaasst. De François Meisch hat d'schwéier Artillerie erausgeholl: De Buergermeeschter hätt d'Pläng vun deem Haus vu Gemengeleit zeechne gelooss, dat heescht fir privat Zwecker op e Gemengeservice zréckgegraff. Virun der Press huet de grénge Politiker dat de Mëtten, Zitat, „net gutt“ fonnt.

E Mea culpa gouf et och, wat dem François Meisch säi Virworf betrëfft, am a ronderëm d'Haus hätt de CIGL Aarbechte gemaach, fir déi keng Rechnung ausgestallt gi wär. De Roberto Traversini huet Aarbechten un engem Gelänner zouginn:

An, jo, et kéint ee vun engem batteren Nogeschmaach schwätzen, dass hie beim Vott iwwert den neien Déifferdenger PAG matgestëmmt hätt: Dofir kéim et den 9. Oktober zu engem neie Vott. An do géif hien dës Kéier d'Fanger ewech loossen.

Dem Gemengepapp säi Schlusswuert, de Mëtten, um Enn vum Conseil war allzäit kloer: Hie géif net ophalen als Buergermeeschter.

Zolidd Virwërf

De François Meisch vun der DP huet am spéide Mëttwoch de Moie weider zolidd Virwërf un d'Adress vum Buergermeeschter Roberto Traversini geriicht. Dem DP-Vertrieder no hätt de grénge Politiker vum CIGL Aarbechten am a ronderëm d'Haus, dat hie geierft hat, maache gelooss huet, ouni Rechnung. Dozou huet de François Meisch en externen Audit gefrot. Donieft hätt de Roberto Traversini Pläng fir dat Haus vu Gemengeleit zeechne gelooss, mat der Mentioun Bauhär Gemeng. De Politiker vun der DP huet déi Faite beim Parquet denoncéiert, wéi hie sot, hien huet vun Abus de pouvoir geschwat an nach emol de Récktrëtt vum Buergermeeschter gefuerdert.

VIDEO: #Gaardenhaischen: D'Oppositioun mat schwéier Virwërf.
Zolitte Kaméidi am Déifferdenger Gemengerot.

Reaktioun Carole Dieschbourg

De Roberto Traversini hätt keng Aarbechten u sengem Gaardenhaischen dierfen ouni Autorisatioun ufänken, esou d'Ëmweltministesch Carole Dieschbourg. Nom Gespréich mam Fierschter wären d'Aarbechten awer gestoppt ginn an den 9. Juli eng Demande un den Ëmweltministère agereecht ginn. Den 12. August koum d'Autorisatioun vum Ëmweltministère. Dat wär en normalen Delai, déi bei einfachen Dossieren tëscht engem an zwee Méint léich, sot d'Carole Dieschbourg.

AUDIO: D'Carole Dieschbourg iwwert de Fall vum Gaardenhaischen

Et géif sech hei ëm en existent Gaardenhaischen handelen, fir dat Renovatiounsaarbechten ugefrot goufen a keng Vergréisserungaarbechten, esou dass dem Déifferdenger Buergermeeschter säin Dossier deen übleche Wee am Ëmweltministère gelaf wär.

VIDEO: #Gaardenhaischen: Reaktioun Carole Dieschbourg.
.

"Jo, ech hu Feeler gemaach"

Et gëtt eng Baugeneemegung vun 1961 fir d'Haus, ma keng fir d'Gaardenhaischen. Dat huet de grénge Schäffe Georges Liesch erkläert.

De Roberto Traversini huet dorop geäntwert, hien hätt net gewosst, dass d'Gaardenhaischen nieft deem Haus an enger Natura 2000-Zon géing leien. "Ech hunn e Feeler gemaach mat den Aarbechten an dat deet mir schrecklech leed". En hätt net dierften ufänken dran ze schaffen, ier en d'Autorisatioun vum Ëmweltministère gehat hätt. Ma déi wier awer direkt ugefrot ginn an hien hätt sech och zu kengem Moment mam Ëmweltministère ofgeschwat.

AUDIO: De Roberto Traversini, Extrait 1

D'Virwërf am Zesummenhank mam CIGL wäre schlëmm, huet de Roberto Traversini gemengt. Jo, et wären Aarbechte gemaach ginn an déi meescht dovu wäre facturéiert ginn. Zu engem anere Reproche sot de grénge Politiker, et wär richteg, dass Pläng fir dat Haus vun engem Léierbouf an der Gemeng gezeechent goufen, dat wär "net flott". Hien hätt deemno Feeler gemaach a géif doraus seng Konsequenzen zéien. Dat Ganzt wär him eng gutt Léier.

AUDIO: De Roberto Traversini, Extrait 2

Pressekonferenz virum Gaardenhaischen

Och op der Pressekonferenz, déi um Mëttwoch am Nomëtteg nieft deem ominéise Gaardenhaischen ofgehale gouf, huet de Roberto Traversini nach eng Kéier betount, datt eng Geneemegung fir Aarbechten um Gaardenhaischen néideg war, déi awer net virlouch.

AUDIO: De Roberto Traversini, Extrait 3

Op der Plaz huet de grénge Politiker erkläert, dass e Buergermeeschter net alles wéisst; dat war seng Äntwert op d'Fro, wéi et z'erkläre wär, dass e Gemengepapp eben net wéisst, dass en eng Autorisatioun bräicht fir Aarbechten un engem Gaardenhaischen an enger Natura 2000-Zon. Dass d'Gaardenhaischen dora léich, wär him net bewosst gewiescht, an dat géif un hie goen.

Wat war geschitt?

Am Juli hat de Gemenge Conseiller Gary Diederich dem Roberto Traversini en Interessekonflikt beim Ausschaffe vum neie PAG virgehäit. De Gemengepapp hat en Haus mat Gaardenhaische geierft, dat an enger Gréngzon steet. De Projet fir den neie Bebauungsplang, gesäit vir, datt en Deel vum Terrain mam Haus elo als Wunngebitt soll ëmklasséiert ginn. De Roberto Traversini hätt awer de Gemengerot net iwwer d’Proprietéitsverhältnesser an deemno den Interessekonflikt informéiert, esou den éischte Virworf.

AUDIO: Affär Gaardenhaischen - Reportage Raphaelle Dickes

Lescht Woch dunn hat d’Oppositioun, déi Lénk, d’DP an d’LSAP eng Pressekonferenz aberuff, an där se dem grénge Buergermeeschter reprochéieren, hien hätt iwwer de Summer Aarbechten um Gaardenhaische maache gelooss, ouni déi néideg Autorisatioune vum Ëmweltministère ze hunn. Dës wieren awer néideg, well de Chalet eben an enger Gréngzon steet.

Den Ëmweltministère huet dës Faite confirméiert. D’Aarbechte wieren allerdéngs direkt gestoppt ginn, wéi de Fierschter de Roberto Traversini bis drop opmierksam gemaach hätt. Et wär eng Demande agereecht ginn, d’Autorisatioun an der Tëscht och ginn.

E weidere Virworf geet ëm den Asaz vum CIGL, dee jo eigentlech Aarbechten am ëffentlechen Interêt oder fir Leit iwwer 60 oder Hëllefsbedierfteger, soll maachen. Den Déifferdenger CIGL, deem säi President de Gemengepapp Traversini ass, soll am Summer un der Proprietéit an der Gréngzon geschafft hunn.

Fir de Roberto Traversini kënnt dës Affär an engem denkbar schlechten Ament. Am Fall, wou de Félix Braz säi Ministère net méi iwwerhuele kéint an et zu engem Remaniement an der Regierung kéim, wär de Roberto Traversini als zweetgewielte Gréngen am Süden ee potentielle Kandidat fir e Ministerposten.
De Gemengerot zu Déifferdeng ass um 8 Auer e Mëttwoch de Moien a gëtt LIVE op RTL.lu iwwerdroen.