ArcelorMittal Lëtzebuerg hat et zejoert net einfach: an Europa war de Stol manner gefrot. D'Zukunft géif awer nees Besserung verspriechen.

AUDIO: ArcelorMittal Neijoerschpatt / Rep. Pierre Jans

Dat sot de President vun ArcelorMittal Lëtzebuerg Michel Wurth en Donneschdeg de Moien um Neijoerschpatt vum Stolgigant. D'Chefetage vum Lëtzebuerger Standuert ass och eng éischter Kéier offiziell op rezent Kriticke wéinst de Mülldeponien zu Déifferdeng beim Site vun ArcelorMittal agaangen. Mir entsuerge keng geféierlech Industrieoffäll vun eiser aktueller Produktioun op der Deponie zu Déifferdeng, esou de klore Message.

Den Däiwel läit nämlech, wéi esou dacks, am Detail. ArcelorMittal entsuergt also keng geféierlech Industrieoffäll vun hirer aktueller Produktioun op der Deponie zu Déifferdeng.

Generaldirekter Roland Bastian: "Mir hunn als ArcelorMittal, an och Arbed virdrun, eis ëmmer un déi Legislatioun, déi en vigueur war, gehalen."

De Roland Bastian kann net ausschléissen, dass schiedlech Offäll vu fréier op där Plaz leien.

Roland Bastian: "Wat virun 30 Joer nach erlaabt war, ass et natierlech haut deels net méi. Wat alles do läit, dat kënne mir Stand haut net präziséieren."

Um Crassier zu Déifferdeng wäre keng Offäll gelagert, déi den europäeschen Normen no geféierlech sinn, betount de Roland Bastian. Déi Niewenproduite vun der Stolproduktioun, déi e Risk fir d'Ëmwelt a Gesondheet duerstellen, géife vun agreéierte Prestatairen am Ausland behandelt ginn.

Andeelung vun der Deponie zu Déifferdeng

D'Deponie zu Déifferdeng ass an dräi Zonen agedeelt. Déi sougenannt ''historesch'' Decharge, wou Offäll vu fréiere Sitte vun Arcelor respektiv der Arbed, zum Beispill och zu Déifferdeng, zu Suessem oder nach zu Esch, entsuergt ginn. Heivir huet ArcelorMittal déi néideg Autorisatioune vum Ëmweltministère a vun der ITM. 2021 wäert d'Deponie zougemaach ginn, a bis 2023 soll se sanéiert sinn, duerno dann ouni Impakt op d'Ëmwelt. Dat schreift ArcelorMittal en Donneschdeg och an engem Communiqué.

Op engem zweete ''provisoreschen'' Site ginn Offäll, déi net geféierlech wären, sortéiert, vum Metall getrennt an da recycléiert. Heivir brauchen ArcelorMittal nach verschidden Autorisatiounen. Den Ëmweltministère wéisst iwwer dës Aktivitéite Bescheed a wéilt d'Prozeduren acceleréieren, esou de President vun ArcelorMittal Lëtzebuerg Michel Wurth. Den drëtte Site ass eng klassesch Bauschuttdeponie, an déi géif de Stolproduzent selwer net notzen, mä éischter Acteuren aus dem Lëtzebuerger Bausecteur.

© www.googlemaps.com

Schlecht Konjunktur 2019

2019 war e schwéiert Joer fir de Standuert hei am Land. Zwar hätt een d'Volummen op engem héijen Niveau hale kënnen, deemno vill produzéiert.

Roland Bastian: "Mir hunn esouguer op enger vun eise Walzstroossen en neie Produktiounsrekord gefuer. Mä et ass virun allem am 2. Semester, wou mir gesinn hunn, dass eis Margë géifen erofgoen."

D'Konjunktur war schlecht. Virun allem op den zwee Mäert, déi ArcelorMittal haaptsächlech interesséieren: Europa an d'USA. Dobäi komme weltwäit Iwwerkapazitéiten, erkläert de President Michel Wurth.

Michel Wurth: "Dobäi ass d'Kris komm vun der Automobilindustrie an dann déi ganz Onsécherheeten, déi komm sinn duerch déi respektiv Handelssträiter. Dat huet mat sech bruecht, dass manner investéiert ginn ass. A wann ee seet, manner Investissementer, dann ass och manner Stol gefrot ginn."

Et kann u sech just eropgoen. De Stolgigant bekennt sech zum Paräisser Klimaofkommes. 250 Milliounen Euro sollen an d'Fuerschung vun neien Technologië fléissen.

Michel Wurth: "Mir sinn haut der Meenung, dass et méiglech ass, CO2-fräi ze produzéieren. Mir brauchen eng industriell Revolutioun. De 'prix de revient' vun deene Produiten ass och méi deier. Dofir brauche mir eng Konjunktioun tëscht der Politik an der Wirtschaft, fir dass mir dat finanzéiert kréien."

A wann de Stol eng Qualitéit hätt, seet de Michel Wurth, dann déi, dass e revaloriséiert ka ginn. De Stolgigant géif 5 Autoe pro Minutt recycléieren.

Déi gescheitert Acquisitioun vum Stolwierk Ilva an Italien wollt de Michel Wurth nach net am Detail kommentéieren. Duerch déi politesch Situatioun bréicht een elo en aneren Accord wéi deen am Oktober 2018.