Nëmme 4 vun 10 Leit zu Lëtzebuerg wëssen, datt et en Euthanasiegesetz gëtt, och wa 85 Prozent fir esou e Gesetz sinn.

Et gëtt also e grousse Manktem un Informatioun zu der Euthanasie. Zu där Conclusioun kënnt déi zoustänneg Kontrollkommissioun, déi eng Ëmfro zum Thema bei TNS Ilres an Optrag ginn huet. An den 10 Joer, an deenen et d’Euthanasiegesetz fir Fäll vun onheelbare Krankheete gëtt, goufen et am ganzen 71 Euthanasien. Dat sinn der däitlech manner wéi an Holland an an der Belsch, wou et änlech Gesetzer ginn. Et missten nach méi Efforte gemaach ginn, fir d’Leit iwwert hir Optiounen z’informéieren.

Dräi Véierel vun de Leit waren der Meenung, datt d'Spideeler missten obligatoresch en Dokter zur Verfügung stellen, deen eng Euthanasie maache kann. Dat ass den Ament nach net de Fall, sot d'Lotty Prussen, Presidentin vun der Euthanasie-Kontrollkommissioun.

"Dat ënnerstëtzt am Fong déi Fro, déi d'Kommissioun scho laang an hire Rapporte gemaach huet, fir d'Installatioun vun enger Consultation médico-éthique, déi eben d'Méiglechkeet kéint ginn, an de Klinicken an eventuell och an de Centres intégrés, fir dass dat e Sujet ass, iwwert deen ee vill méi fräi kéint schwätzen. Et ass och esou, datt dat plebiszitéiert ass, vue dass 78 Prozent vun de Leit gefrot hunn, dass esou en Dokter zur Verfügung steet, fir iwwert déi Problematik ze schwätzen an iwwer d'Méiglechkeete fir d'Ënn vum Liewen ze gestalten."

D'Kommissioun proposéiert iwwerdeems, datt systematesch bei Admissiounen a Spideeler an Altersheemer soll gefrot ginn, op et eng Disposition de fin de vie gëtt, doduerch géif d'Thema och enttabuiséiert ginn.

D’Akzeptanz vun der Stierfhëllef ass héich zu Lëtzebuerg, ma d’Leit sinn net gutt genuch driwwer informéiert – déi Conclusioun zitt d’Kontroll- an Evaluatiounskommissioun vum Euthanasiegesetz op Grond vun engem rezente Sondage zum Thema. An deenen 10 Joer, an deenen d’Gesetz a Kraaft ass, goufen et 71 Fäll vu Stierfhëllef – proportionell gesinn däitlech manner, wéi an der Belsch an an Holland, an deenen et änlech Gesetzer ginn.

D’Enquêteure stelle fest, datt eng Majoritéit vun de Leit en Euthanasie-Gesetz begréisst an och zouversiichtlech ass, datt et zu Lëtzebuerg uerdentlech applizéiert gëtt. Allerdéngs hätten nëmme véier vun zéng Leit gewosst, datt et d’Gesetz fir d’Euthanasie an d’Hëllef zum Suicide a Fäll vun onheelbarer Krankheet gëtt. Den Tommy Klein vum Meenungsfuerschungsinstitut TNS Ilres: “Nëmme 36 Prozent vun de Leit fille sech gutt oder genuch informéiert iwwert de Sujet vun der Euthanasie zu Lëtzebuerg. Wann ee kuckt, bei deene Leit, déi net wossten, datt et esou e Gesetz gëtt, sinn 81 Prozent déi sech net gutt informéiert sinn. An och bei deenen, déi et wossten, ass eng Majoritéit déi seet: "Ech fille mech net genuch informéiert iwwert de Sujet vun Euthanasie".”

Eeler Leit wieren am allgemenge besser informéiert, wéi Jonker an och Lëtzebuerger a Leit, déi scho méi laang zu Lëtzebuerg liewen, wéisste besser Bescheed.

93 Prozent vun de Leit waren der Meenung, dass enzwousch soll festgehale sinn, wéi si wëlle stierwen. Weidert Thema: Den Ament mussen d’Spideeler keen Dokter zur Verfügung stellen, deen eng Euthanasie maache kann: “Dräivéierels vun de Leit soen awer ganz kloer, dass dat sollt de Fall sinn. Dëst ass natierlech och ganz koherent mat der Ausso, wann ee seet déi selwecht Proportioun vun de Leit soen et ass ganz wichteg en Accès zu engem Dokter ze hunn, deen eng Euthanasie applizéiere kënnt.”

Dës Observatioun aus der Enquête ënnerstëtzt d’Kontroll- an Evaluatiounskommissioun vum Euthanasiegesetz an enger vun hiren zentrale Fuerderungen, seet d’Presidentin vun der Kommissioun Lotty Prussen: “Eng Obligatioun fir d'Direktioun virzegesinn, dass eng Prozedur installéiert gëtt, fir d'Méiglechkeet ze maachen, dass een un en Dokter kennt, deen engem kann hëllefe fir ze bestëmmen, wéi een den Ënn vum Liewe gesäit a fir och kennen op eng Euthanasie oder eng Assistance aus Suicide zeréckzegräifen.”

Et géif net drëm goen, Reklamm fir d'Stierfhëllef ze maachen, ma d’Applikatioun vum Gesetz wier a Fro gestallt, wann d’Leit net informéiert wieren. Do missten och d’Dokteren an d’Spideeler hiren Deel bäidroen.

Fir d’Ëmfro vun TNS Ilres goufen am Oktober/November 2019 1.006 Awunner iwwer 16 Joer iwwer Internet an Telefon befrot. All d’Resultater fannt dir hei: (PDF Ëmfro)

Zanterdeem d’Gesetz fir d’Euthanasie an d’Suicide-Assistenz a Kraaft getrueden ass, goufen et 71 Fäll, dat heescht 0,25 Prozent vun de Stierffäll. An deene meeschte Fäll waren et Kriibspatienten. Bis 2018 goufen iwwer 3.000 Dispositions de fin de vie enregistréiert. De ganze Rapport vun der Kontrollkommissioun fir 2017/18 fannt dir hei.