Um Stater Geriicht gouf e Mëttwoch an enger Affär ëm Déierequälerei e gedaamt Urteel gesprach, am Verglach zu der Fuerderung vum Parquet.

AUDIO: Geriicht: Déierequälerei / Rep. Eric Ewald (23.1.2020)

Dës Affär hat fir Gespréich gesuergt, nodeems op Hellegowend 2018 bekannt gi war, dass kuerz virdrun an der Minettemetropole 252 Reptilie saiséiert goufen, dorënner 123 gëfteger. Ënnert anerem Schlaangen a Skorpioune goufen am Appartement vun engem Mann fonnt. Déi gëfteg Déiere waren an eng spezialiséiert Opfangstatioun zu München komm, déi aner an d'Fleegestatioun zu Diddeleng.

Virun deem Hannergrond hat de Vertrieder vum Parquet et am Prozess, de leschte Mount, de Riichter iwwerlooss, ob eng Prisongsstrof sollt gesprach ginn. Eng zolidd Geldstrof géif duergoen, bei déi awer e Verbuet vu 15 Joer sollt dobäikommen, fir Déieren ze halen. E Mëttwoch sinn dunn eng Geldstrof vu 4.000 €, e Verbuet vun 3 Joer, fir Déieren ze halen, ënnert anerem d'Confiscatioun vun 8 Terrariumen an d'Zoumaache vum Buttek, bis de Mann eng Autorisatioun dofir huet, gesprach ginn.

Nom Urteelssproch sot sech de Me Jean-Jacques Schonckert, Affekot vum Mann, net iwwerrascht doriwwer, mä frou fir säi Client. Nieft all dëse Fuerderunge stoungen nach Fraisen an Héicht vun zéngdausenden Euro am Raum, fir déi de Mann sollt opkommen. Um Enn hunn d'Riichter mol keng 700 € Fraise gesprach.

Dass dem Mann säi Buttek zougemaach gëtt, trëfft dee wuel, sou de Me Jean-Jacques Schonckert, ma et wär och eng Dier op. Den Affekot kann deemno vun der Héicht vun der Strof hir mam Urteel liewen, spréch, ob Appell gemaach gëtt oder net.