"Et muss ee krank sinn, fir kënne vun der "Annulation Voyage" ze profitéieren", dat betount de Generaldirekter vun der CMCM Fabio Secci op Nofro vun RTL.

D'Caisse Médico-Complémentaire Mutualiste hätt nämlech eng Tendenz festgestallt, fir Abus ze bedreiwen, dat wéinst dem Coronavirus.

D'Leit hätten Angscht oder wierklech keng Loscht méi ze reesen, sou de Fabio Secci.

A fir dann net mussen an d'Täsch ze gräifen, wäre schonn eng ganz Rei Leit bei d'Doktere gaangen, fir sech krankschreiwen ze loossen, fir dann d'Sue fir hir Rees nees erëmzekréien.

Dat ass kee Kavaléiersdelikt, ma Assurancen-Bedruch an net just fir de Client, ma och fir den Dokter strofbar, betount den Direkter vun der CMCM. D'Assurancë wären do fir ze hëllefen, wann ee wierklech krank wär.

Vill Tour-Operateuren hunn an de leschten Deeg jo och scho Kulanz gewisen. Zum Beispill huet d'Luxair a LuxairTours Clienten, déi bis den 8. Mäerz sollten op Mailand oder op Venedeg reesen, proposéiert, hir Rees ouni Fraisen ze stornéieren.

D'Caisse Médico-Complémentaire Mutualiste schléit Alarm - Reportage vum Annick Goerens

De Coronavirus suergt fir Panik am In- an Ausland. Ëmmer méi Leit déi an d'Vakanz wollte fueren, hunn mëttlerweil Angscht oder keng Loscht méi a wëllen hir Rees annuléieren. Dat geet awer net einfach sou an dofir gëtt nawell gefuddelt. Dofir schléit d'Caisse Médico-Complémentaire Mutualiste elo Alarm.

CMCM an de Coronavirus - Reportage Annick Goerens

„Et muss ee krank sinn, fir kënne vun der „Annulation Voyage“ ze profitéiere“, dat betount en Donneschdeg de Moien de Generaldirekter vun der CMCM Fabio Secci op Nofro vun RTL. D'CMCM hätt nämlech eng Tendenz festgestallt fir Abus ze bedreiwen, dat wéinst dem Coronavirus.

„Eis hunn Dokteren ugeruff, eis hunn Reesagencen ugeruff déi gesot hunn, dass si de Leit erkläert hunn „dir sidd net krank, dat leeft sou net“ an déi dunn sote „da ginn ech mol séier bei mäin Dokter mech krankschreiwe loossen. T'ass kloer, dass an de Wartesäll elo Leit sëtzen, déi mengen, dass dat géing goen.  An et gëtt eventuell och Dokteren, ech hoffen net, déi dat maachen. Dofir nach eng Kéier den Appell, huelt dat net op d'liicht Schëller. Et wäerte sécher Assureuren an och mir, e bësse méi een detailléierte Rapport verlaangen, elo grad well mer déi do Réckmeldunge kritt hunn. An da geet einfach just „n'est pas capable de voyager“ net méi duer.“

Dat ass kee Kavaléiersdelikt, betount de Generaldirekter vun der CMCM.

„Seng Assurance bedréien, also Assurance-Bedruch gëtt schwéier bestrooft. An och Dokteren, déi op Zouruff ee Krankeschäin ausstelle fir eng „incapacité de voyager“ wann d'Leit net krank sinn, och fir déi ass et kee Kavaléiersdelikt, wann se et maachen. D'Assurancen, egal op kommerziell oder net kommerziell, sinn do fir ze hëllefen an deene Fäll wou virgesi sinn. Krank an et kann een net reesen, dann ass ee couvréiert, mä einfach nëmme just als Precautioun ze soen „ech hunn keng Loscht méi ze reesen“, do ass een net couvréiert.“

Et ass schonn sou, dass d'Leit elo bësse fäerten, seet de President vun der Unioun vun de Lëtzebuerger Reesagencen, Fernand Heinisch.

„Dat heescht et ginn och Annulatiounen déi sou direkt net kënnen duerchgefouert ginn. Dann si Leit, déi einfach nach ofwaarde wei et sech entwéckelt. An et ginn och Leit déi nach Saache buchen. Also et ass elo net sou, dass nëmmen nach Annulatioune kommen. Et hänkt wierklech vun de Clienten of.“
 
Just déi geféierlech Destinatioune géing een net méi usteieren. Do géing een sech un d'Consignë vum Gesondheetsministère halen.

„Ech mengen do si jo verschidde Länner déi à risque sinn: China, Singapur, Japan, Südkorea, Iran. An dann an Italien d'Lombardi, Venetien, Emilia-Romagni an de Piemont. An dorunner musse mir eis als Reesbüro halen. Mä de Rescht gëtt awer nach iwwerall gebucht.“

Et géing een déi schwiereg Zäite kennen, sou de Fernand Heinisch. Terrorismus, Naturkatastrophen an de SARS-Virus. Et kéint een domat ëmgoen, et géing ee just hoffen, dass et net ze laang dauert. D'Leit géinge jo nach buchen, souguer op Teneriffa wär nach gebucht ginn. Et wär net sou, dass elo déi ganz Welt géing zesummebriechen, sou de President vun der Unioun vun de Lëtzebuerger Reesagencen.