De Museker war schonn am Mee um Stater Geriicht am Zesummenhank mat sengem Lidd "FCK LXB", dat fir "Féck Lëtzebuerg" steet, fräigesprach ginn.

Den Tun Tonnar gouf e Mëttwoch am Nomëtten och op der Cour d'appel an der Stad fräigesprach. De Fils vum Museker Serge Tonnar hat jo do wéinst sengem Lidd „FCK LXB“ nach emol de Prozess gemaach kritt.

Säin Affekot huet nom Urteelssproch vun enger klenger Erliichterung geschwat, och wann déi 1. Ronn am Mee zejoert um Stater Geriicht gewonne gi war an de Parquet général am Appell d'Confirmatioun vun deem 1. Urteel gefrot hat. Et wär ee frou, dass an dësen Zäiten, an deene Solidaritéit an Zesummenhalt gefrot wären, dës Fräiheete bestoe bleiwen, a Leit, déi d'Exklusioun priedegen, e Punkt gesat kriten.

War dat da fir de Me Philippe Penning e wichtegt Urteel, a béiden Instanzen?:

Extrait Maître Penning

„Ech mengen, an deenen zwou Instanzen e ganz wichtegt Urteel, wat hei zu Lëtzebuerg e staarken Akzent wäert setzen! An et kann een, wéi gesot, der Justiz nëmme felicitéieren, dass se der Tentatioun entgaangen ass, fir sou Saachen ze sanktionéieren, well soss gi mer net méi fäerdeg!“

Freed och beim Tun Tonnar nom Urteel

Et géif och Freed bei sengem Client ginn, dee mat där Affär eng schwéier Laascht gedroen hätt:

„D'Reaktioun - loosse mer mol soen - an eisem Lager ass, dass mer an dësen Zäiten, wou Solidaritéit an Zesummenhalt gefrot ass, frou sinn ze héieren, dass d'Geriichter och op de Wee ginn, fir en Zeechen ze setzen, dass déi Fräiheete musse bestoe bleiwen an dass déi Leit, déi d'Exklusioun priedegen, e Punkt gesat kréien!“

An der Campagne fir d'Chamberwalen, Enn 2018, war sech an deem Lidd un der adr an un déi Konservativ geriwwe ginn. Doropshin haten den adr-Kandidat Fred Keup, de Kandidat vun déi Konservativ Joé Thein an e Mann, deen ewell e puermol wéinst Opruff zum Haass verurteelt gouf, Plaintë gemaach.