"Kloer Exit-Roadmap mat mënschleche Perspektiven"

Déi gréisst Oppositiounspartei fuerdert ënner anerem eng Exit-Strategie mat Koherenz, Kloerheet a Gläichbehandlung, d'Offiedere vun der Wirtschaftskris an en equilibréiert COVID-19-Gesetz.

PDF: Pressecommuniqué vun der CSV / 12 Virschléi

De Parteipresident Fränk Engel an d'Fraktiounspresidentin Martine Hansen hunn eng nei Normalitéit verlaangt, mat virun allem engem séieren nees-Opmaache vum Eenzelhandel. D'Ofgeschlossenheet vu viru 7 Woche wär richteg gewiescht, ma elo wär den Exit richteg.

„Et muss eng Demarche zréck an eng Zort vun Normalitéit ginn, eng Zort vun Normalitéit, vun där mer all wëssen, dass dat net déiselwecht Normalitéit wäert sinn, déi mer nach viru Mëtt Mäerz kannt hunn!“

Och wann en Exit vläicht nei Infektiounsfäll provozéiere géif an een dann eventuell nees zoumaache misst, sou de Parteipresident. De wirtschaftleche Schued duerch de Virus dierft enorm sinn, genee wéi d'Auswierkungen op d'Staatsfinanzen: „Et steet ze befierchten, dass nach wesentlech méi e grousst Lach am Staatsbudget wäert ufalen, wéi déi zwou an eng hallef Milliard, déi mer elo ze léine beschloss hunn!“

Et wäre wuel op d'mannst 5 Milliarden, bei engem Minus vu 6% beim Wuesstem. D'Wirtschaft misst dofir elo erëm ulafen, eng Wirtschaft, déi een net dierft erstécken:

„Wa mir duerch en iwwerméisseg laangt an iwwerméisseg strengt Zoumaache vun eiser Gesellschaft eis selwer sou erstécken, dass mer en Deel vum Virus senger Aarbecht maachen, dann hu mer géint e verluer!“

Den Eenzelhandel misst dofir nees opgoen, sou zäitno wéi méiglech, an d'Restauratioun e bëssen dono. De Fränk Engel wëll an deem Kontext, Zitat, „Inkoherenze vun der Verbuetslandschaft“ aus der Welt schafen:

„Wann tatsächlech beispillsweis nëmme Geschäfter hätte sollen opmaachen, déi Iesswuere verkafen, jo, dann hätten och ni an der Belle Étoile däerfe Spillsaache verkaf ginn an aner Saachen, wärend anerer, déi Spillsaache verkafen an anerer, an all där Zäit net hunn däerfen op hunn. Dat ass net nëmmen deloyal Konkurrenz, mä dat ass eigentlech e fuerchtbare Virgank, andeems Eenzeler Geld verdéngen, wärend Anerer d'Enner net méi beienee kréien.“

Wann de „bleift doheem“ net méi ass, da muss een dat soen, huet de Frank Engel gemengt. Et misste kloer Consignë ginn. Dass ee keng grouss Partyen dierft maache wier kloer, an dat géifen d'Leit och verstoen. Ma eventuell awer eng kleng Familljefeier, wou e ronne Gebuertsdag gefeiert gëtt, sou den CSV-Parteipresident.

Op de Schouloptakt dëse Méindeg hätt een iwwerdeems besser misse virbereet sinn, sot d'Martine Hansen. Et wieren den Ament nach bal méi Froen op, wéi Äntwerten, an dat wier definitiv net gutt. D'Martine Hansen versteet och net, wisou de Minister d'Leit vum Terrain net méi mat agebonnen huet. En hätt awer fäerdeg bruecht, wat schwéier fäerdeg ze bréngen ass... nämlech, dass alleguerten d'Gewerkschaften zesummen ee Communiqué gemaach hunn a soen, dat géif sou net goen. Den Educatiounsminister soll net stuer sinn, ma op d'Leit lauschteren a se mat abannen, sou d'Martine Hansen weider.

Et wär op alle Fall kee Grond do gewiescht fir d'Premièren, dëse Méindeg an d'Schoul ze goen, sou d'Fraktiounscheffin.

Fir d'Martine Hansen misst an Zukunft am Gesondheetssystem manner no de wirtschaftleche Critèren gekuckt gi wéi nom Patient:

„Do kann ee mol einfach soen: Mir brauche erëm eng Kéier Fleeg mam Häerz an net mat der Stoppauer!“

Wat den Noutstand ugeet, wëll d'CSV-Fraktiounspresidentin keng Verlängerung duerch d'Hannerdier vun der Chamber a kee Pandemie-Gesetz, mä:

„Mir soe Jo zum Prinzip vun engem geziiltene COVID-19-Gesetz, mä mir brauchen dofir Zäit, fir dat a Rou ze diskutéieren. Dofir misst d'Regierung elo geschwënn domat kommen!“

Woubäi d'Proportionalitéit awer misst garantéiert sinn.

D'Martine Hansen huet iwwerdeems widderholl, dass Leit, déi um Stierwe leien, musse kënnen Äddi gesot kréien:

„Mä u sech geet dee leschten Äddi net duer. Mir hu vill Leit, déi krank sinn, an dat bedeit am Moment Isolatioun. A wann ee schwéier krank ass an et ass een isoléiert an et ass een eleng gelooss mat sengen Ängschten, an och d'Famill ass op där anerer Säit hëlleflos, well si kann net bei ee goen: Dat ass net mënschlech, an dat kënne mer net nach méintlaang, ee Joer laang sou acceptéieren.“

D'Fraktiounspresidentin fuerdert op deem Gebitt eng kloer Kommunikatioun vun der Regierung.