E Samschdeg goufen et op ville Plazen am Land Zeremonien, fir den Europadag ze feieren.

Ënnert anerem op de Lëtzebuerger Grenze mat den Nopeschlänner gouf sech gréisstendeels am klenge Krees versammelt, fir en Zeechen ze setzen a fir oppe Grenzen ze verlaangen. Besonnesch laanscht déi däitsch Grenz goufen et vill Aktiounen. Deels waren et Zeremonië mat offizielle Vetrieder vu béide Säiten, wéi zum Beispill zu Gréiwemaacher, wou den Europa-Fändel gemeinsam nees eropgezu gouf, nodeems en op Hallefmast houng.

Zu Iechternach solle sech op Lëtzebuerger Säit souguer eng 100 Persoune versammelt hunn. Op Nofro hi goufe mer vun der Police gewuer, datt eng Patrull op d'Plaz geschéckt gouf, fir derfir ze suergen, datt d'Distanzen agehale ginn.

Wéi d'Police um Sonndeg schreift, wären et am Ganzen 200 Leit gewiescht, déi op de Grenzposten op der Iechternacher Bréck, Wuermer, Réimech a Waasserbëlleg ënnerwee waren an un de friddlechen Demonstratiounen Deel geholl hunn.
E Samschdeg ass jo Europadag. En Dag, deen op den 9. Mee 1950 zeréckgeet. Gefeiert gëtt also de Plang vum Robert Schuman. De franséischen Ausseminister huet viru 70 mat sengem Pabeier d'Weiche gestallt fir déi spéider Europäesch Unioun. Zu Lëtzebuerg ass dësen Dag jo zënter leschtem Joer offiziell e Feierdag.

Et ass mat Sécherheet net déi beschten Zäit fir déi europäesch Iddi. Europhille bekloen an der Corona-Kris, datt virun Allem national agéiert gëtt an datt ebe souguer bannent dem Schengenraum Grenzen zougemaach goufen.

Syvicol: Solidaritéitsaktioun op de Grenziwwergäng

Um Europadag, deen zënter dem leschte Joer en offizielle Feierdag zu Lëtzebuerg ass, gouf op Initiativ vum SYVICOL eng Solidaritéitsaktioun op de Grenziwwergäng zu Däitschland organiséiert. Den Daachverband vun de Lëtzebuerger Gemengen hat dozou opgeruff, sech staark ze maachen „Fir en Europa mat oppene Grenzen“. Zënter siwe Wochen ass en Areese vu Lëtzebuerg an Däitschland ouni valabele Grond a speziell Autorisatioun jo net méi erlaabt. Fir d’Bierger an d’Politiker aus de betraffene Regiounen, dës- an déisäits der Sauer a Museln ass et onverständlech an inakzeptabel, dass ee wärend der Corona-Kris net méi fräi tëscht béide Länner kann zirkuléieren. Vu Waasserbëlleg, Gäichel, Doosber-Bréck oder och nach vu Schengen aus gouf dofir en dréngenden Appell a Richtung Berlin geschéckt. Déi däitsch Regierung huet d’Grenzkontrolle jo nach bis de 15. Mee verlängert.

Ich hätte mir gewünscht, von der deutschen Bundesregierung, dass ein klares Zeichen heute am Europatag gesetzt wird und dass man sagt, die Grenzen werden wieder geöffnet.“

Dat sot de Michael Holstein, de Buergermeeschter vun der Verbandsgemeng Trier-Land. Hie war zesumme mam Wolfram Leibe, dem Oberbürgermeister vun Tréier, e Samschdeg de Moien zu Waasserbëlleg, fir un der Solidaritéitsaktioun fir oppe Grenzen deelzehuelen. De Wolfram Leibe huet wéi vill anerer och d’Grenzkontrollen als „sënnlos“ beschriwwen an drop opmierksam gemaach, dass de Virus net virun enger Grenz oder engem Floss Halt mécht.

„Ich hoffe, und nachdem beide Miisterpresidenten so deutlich sich positioniert haben, dass in den nächsten zwei Wochen die Grenzen wieder aufgemacht werden, ohne Reglement“, sou d’Hoffnung vum Oberbürgermeister vun Tréier.

De Buergermeeschter vun der Gemeng Mäertert huet sengersäits nach bedauert, datt déi ronn 150 däitsch Frontalieren, déi a senger Gemeng am Fleegesecteur schaffen, owes no hirer Aarbecht ëmmer nach am Stau musse stoen a sech ausweise mussen fir heem.

Souwuel déi Lëtzebuerger, wéi och däitsch Politiker aus de betraffene Regiounen, wou d’Grenziwwergäng zou sinn, hunn op hir gutt Zesummenaarbecht aus de leschte Joerzéngten higewisen a gefuerdert, dass eng Kollaboratioun och wärend der Corona-Kris misst méiglech sinn, mat wannechgelift oppene Grenzen.

Aktioun oppe Grenzen: Iwwer Facebook-Grupp versammelt

Iwwer e Facebook-Grupp waren d'Leit opgeruff, sech bei de Landesgrenzen tëscht Lëtzebuerg an Däitschland ze versammelen an Blummen oder Fändelen neier ze leeën oder och eng Käerz unzefänken.

Den 15. Juni 1985 gouf de Schengener Ofkommen zesummen mat Däitschland, Frankräich, der Belsch, Lëtzebuerg an Holland ënnerschriwwen, fir d’Persounekontrollen un de Grenzen ofzeschafen. 35 Joer duerno sinn déi Kontrollen, duerch de Coronavirus nees un de Grenzen tëschent Lëtzebuerg an Däitschland etabléiert ginn. Eng Kontroll, déi ville Leit sauer opstéisst. Wei ofgeschwat ass alles ass roueg ofgelaf an d’Police hat net missen agräifen.