D'Situatioun huet sech op eng beonrouegend Manéier entwéckelt, sot de Premier Xavier Bettel nom Regierungsrot um Briefing fir d'Press.

Nei Corona-Mesuren/Reportage Roy Grotz

De Conseil huet dofir nei Mesuren decidéiert.

De Virus huet sech flächendeckend am ganze Land verbreet, huet de Xavier Bettel betount, dofir muss d'Zuel vun 10 Leit, déi een dierf bei sech heem invitéieren erofgesat ginn.

Extrait Xavier Bettel (1)

Déi sozial Kontakter mussen dofir limitéiert ginn. Et dierf ee just nach 4 Leit bei sech heem an de Stot invitéieren an et dierf een och just nach zu 4 an de Restaurant oder soss éierens hi goen. Wann een zu méi wéi 4 zesummen ass, egal ob dobaussen oder dobannen, muss een eng Mask undinn.

Extrait Xavier Bettel (2)


Donieft gëllt tëschent owes 23 Auer a moies 6 Auer eng Ausgangsspär.

Extrait Xavier Bettel (3)

Dës Mesurë gëlle soubal se vun der Chamber gestëmmt sinn elo emol fir ee Mount, esou de Xavier Bettel, bis dohinner sinn et Recommandatiounen. D'Gesondheetsministesch Paulette Lenert huet erkläert, datt een zwou bis 3 Woche brauch, ier d'Situatioun sech bessert.

Am Sport ginn all d'Championnater ofgesot, ausser déi iewescht Divisiounen an d'Matcher vun den Nationalekippen. D'Federatioune vum Basket, Volleyball, Handball a Futtball hunn e Freideg scho reagéiert an Adaptatiounen an hirem Programm gemaach.

De Virus hätt sech flächendeckend am ganze Land verbreet an et wiere méi vulnerabel a méi eeler Leit betraff, seet de Premier Xavier Bettel.

D'Gesondheetsministesch Paulette Lenert huet ënnerstrach, datt ee virun allem an de Kläranlage gesäit, datt de Virus iwwerall ass an datt ee vun enger héijer Donkelziffer misst ausgoen.

Et misst een elo d'Handbrems zéien, wann ee wéilt verhënneren, datt de Gesondheetssystem iwwerlaascht an d'Ekonomie an d'Gesellschaft geläämt gëtt.

An de Spideeler wier nach alles am Grëff, mä mir riskéieren, e Problem ze kréien, seet d'Paulette Lenert. Fir Schlëmmeres ze verhënneren, misst elo séier gehandelt ginn.

De Weekend iwwer gëtt elo un den Texter vun den neie Mesurë geschafft, an deenen déi nei Moossnamen dann och schrëftlech festgehale ginn, e Méindeg kommen déi zoustänneg Chamberkommissiounen zesummen a wann een do virukënnt, kéinten d'Texter schonn e Méindeg an de Staatsrot goen a spéitstens Enn nächster Woch gestëmmt ginn. Soubal dat de Fall ass a se am Memorial publizéiert ginn, triede se a Kraaft.

De Premier an d'Gesondheetsministesch hunn awer un d'Leit appelléiert, sech elo schonn dodrun ze halen.
Et géif nämlech elo drëms goen, fir nach eng méi schro Situatioun ze verhënneren.

An den Altersheemer, esou d'Gesondheetsministesch, ginn et eng Rei Infektiounsketten, dofir dierft dat och Konsequenzen op d'Visitten hunn. Den Ament gëtt do nach u Mesurë geschafft. Dat wieren Aarbechten, déi iwwert déi nächst Deeg lafen.

Keng Adaptatioun vun de Mesuren a Schoulen a Betreiungsstrukturen

Am Laf vum Freidegowend huet den Educatiounsministère matgedeelt, datt et bei de Schoulen an de Betreiungsstrukture keng Ännerunge wäert ginn.

Reaktiounen op d'Pressekonferenz

D'Horesca huet sech berouegt iwwert d'Decisioun vun der Regierung gewisen. "Firwat net éischter?", dat freet d'CSV sech an enger éischter Reaktioun. 

De Replay vun der Pressekonferenz