118 Covid-Fäll ginn et den Ament an den 52 Alters- a Fleegeheemer am Land.

Déi allgemeng Chifferen, déi d'Santé all Dag matdeelt, schwätze fir sech, seet d'Familljeministesch Corinne Cahen. Si géife weisen, datt de Virus den Ament omnipresent ass a wieren alarmant. D'Ministesch recommandéiert dofir, datt een dëser Deeg net an en Alters- a Fleegeheem soll op Besuch goen, wann et net onbedéngt muss sinn. De Leit, déi an Heemer wunnen, réit d'Corinne Cahen aus deem selwechte Grond, net aus dem Heem erauszegoen, wann et net néideg ass.

An den nächsten Deeg ginn d'Heemer ganz duerchgetest, d'Awunner an d'Leit, déi do schaffen, fir datt een e geneeën Iwwerbléck iwwert d'Situatioun kritt.

D'Corinne Cahen recommandéiert net op Besuch ze goen

A méi wéi 40 Prozent vun den Haiser ginn et nach guer keng Covid-19-Fäll, seet de Marc Fischbach, de President vun der Copas, déi d'Prestatairen aus dem Fleegesecteur regroupéiert. Si proposéiert eng Zort Stufemodell fir d'Haiser. Eng éischt Stuf fir déi Heemer, déi bis elo vum Virus verschount bliwwe sinn. Eng zweet Stuf fir Heemer, an deenen et just ganz vereenzelt Fäll gëtt.  Do géifen d'Visitten encadréiert ginn. Dat heescht, si wieren an engem Sall, deen dofir virgesinn ass a just op Rendez-vous.

Bei der drëtter Stuf géife se da ganz verbuede ginn, fir eng Zäit, well et ze vill Infektioune ginn.

De Marc Fischbach iwwert déi 3. Stuf

De Marc Fischbach ënnersträicht, datt dëse Modell awer op kee Fall gëllt fir Leit, déi "fin de vie" sinn. Si sollen ënner bestëmmte Konditiounen,egal wéi Besuch vun hire Famille kënne kréien.