An den Altersheemer ass et sou wéi am Rescht vum Land, et ginn héich Infektiounschifferen, also eng ganz Rei Leit déi positiv getest ginn sinn.

Stand e Mëttwoch den Owend waren 138 Bewunner positiv op de Coronavirus getest ginn, aus 19 verschiddenen Alters- a Fleegeheemer. Am Ganze ginn et der jo 52. Dës Chifferen huet d'Familljeministesch Corinne Cahen en Donneschdeg de Moien op RTL-Nofro matgedeelt. D'Santé ass den Ament jo am gaange mat mobillen Ekippen d'Alters- a Fleegeheemer duerchzetesten. Do ginn och net just d'Bewunner getest, ma och d'Personal. Dat wär allerdéngs ënnert der Opsiicht vun der Santé a géing och nach e bëssen daueren, esou d'Familljeministesch.

Keen nationalen Aktiounsplang fir vulnerabel Leit: Et gëtt keen "one size fits all"

Et soll mat alle Moyene verhënnert ginn, dass vulnerabel Leit, also eeler Persounen oder krank Persounen, nach eng Kéier agespaart ginn, sou wei dat am Mäerz de Fall war. Dofir hat d'CSV an enger Motioun de 14. Oktober proposéiert, dass e nationalen Aktiounsplang, fir vulnerabel Persounen ze protegéieren, misst ausgeschafft ginn. Dës Motioun gouf en Donneschdeg de Moien an den zoustännege Chamberkommissiounen debattéiert.

Et hätt ee gehofft, dass schonn iwwer de Summer eppes Konkretes an déi Richtung ausgeschafft ginn wär. Ma dat wär net de Fall, sou d'CSV-Fraktiounscheffin Martine Hansen: „Zum Beispill, dass géif sécher gestallt ginn, dass d'Personal géing reegelméisseg getest ginn. Well elo virun 2 Wochen ass ugefaangen ginn, se nach eng Kéier méi gezielt an den Large Scale Testing ze huelen, mee och dat hätt missen am Summer direkt geplangt ginn. An dat dierf net dem Zoufall iwwerlooss ginn."

Och misst d'Akafe fir eeler Leit nees organiséiert ginn a soubal et Schnell-Tester ginn, missten dës och prioritär dofir genotzt ginn, dass d'Leit kënnen op Visitte goen.

„Fir eben ze verhënneren, dass déi Leit nach eng Kéier sou staark isoléiert ginn, well dann hu se vläicht relativ sécher Sécherheet virun der Krankheet, mee wa se awer herno keng Freed méi um Liewen hunn, dann ass dat och eng Aschränkung vun de Grondrechter."

An den 19 vun dem 52 Alters- a Fleegeheemer goufe Bewunner positiv getest. Et hätt awer kee Wäert elo een nationalen Aktiounsplang auszeschaffen, erkläert d'Familljeministesch Corinne Cahen: „Mir hunn, souwuel d'Paulette Lenert wéi ech selwer erkläert, wat alles geschitt, an dass mer net kënnen een „one size fits all" maachen, dass mer musse kucken, ob et Positiver an engem Haus gëtt oder net, dass d'Haiser sech och selwer organiséiert hunn an dass een net ka fir d'ganzt Land eppes vun uewen erof dekretéieren, well d'Leit all aneschters sinn, d'Strukturen aneschters sinn an d'Gebaier architektonesch aneschters sinn."

Wat d'Visitten an den Altersheemer ugeet, sou wär et net forcement sou, dass wann eng Struktur zouméscht, dass dann d'Leit all isoléiert wären.

„Also ech liesen an der Press, dass verschiddener hir Diere mol fir e puer Deeg zoumaache fir d'Visitten, fir sech z'organiséieren, respektiv och, krut ech zum Beispill vun engem Chargé de direction gesot, si hätten d'Haus fir Visitten zougemaach, fir dass d'Leit in-house kënnen awer fräi liewen, dass déi sozial Kontakter am Haus, d'Aktivitéiten an alles, dass déi kënne stattfannen."

Et huet een d'Oppositioun gefrot, wat een nach hätt kéinte maachen, nieft all den Mesuren, déi schonn geholl goufen, sou d'Corinne Cahen. Der CSV geet et awer net duer, et géing ee sech iwwerleeën, ob een dës Motioun net awer nach eemol an der Chamber wäert ofstëmme loossen. Méi Moyenen hätt ee leider net, sou d'Martine Hansen.

Alters- a Fleegeheemer / Rep. Annick Goerens

Wanteraktioun um Findel fänkt e Méindeg un

Duerch de Couvre-feu si jo besonnesch d'Sans-abrisen concernéiert an dofir hat de Familljeministère jo och schonn e Mëttwoch e Communiqué verëffentlecht, an deem erkläert gëtt, dass d'Dortoirë vun der Wanteraktioun um Findel net eréischt den 1. Dezember, mä schonn e Méindeg opginn. Et wär awer illusoresch ze mengen, dass alleguer d'Leit ouni Daach iwwer dem Kapp dohinner géinge goen, dofir hätt een och Récksprooch mam Policeminister geholl fir z'evitéieren, dass d'Police si kontrolléiere geet an se opfuerdert, ënner Daach ze goen, wa se keen Ënnerdaach hunn, sou d'Corinne Cahen.