D'Iwwerwaachungskommissioun vun der Finanzplaz CSSF huet den 1. September israeelesch Staatsemprunten op den europäesche Finanzmäert gréng Luucht ginn.

De Ball läit beim Ausseminister Xavier Bettel, esou d'Deputéiert en Dënschdeg de Moien no enger Sitzung vun der Chamber Finanzkommissioun.

Den Direkter vun der CSSF, de Claude Marx, hätt hinnen erkläert, datt, wann et europäesch oder national Sanktioune géint Israel géif gi wéinst dem Krich géint d'Palästinenser, kéint d'CSSF dann och hir Autorisatioun réckgängeg maachen. D'Gréng Deputéiert Sam Tanson huet vun engem neien Ament geschwat. Och d'ADR-Deputéiert Tom Weidig an de Piraten-Deputéierte Sven Clement soten et wier en Dënschdeg kloer ginn, datt et un der Regierung oder un der Chamber wier, ze decidéieren, wéi ee mat Israel ëmgeet. Fir si hätt d'CSSF alles richteg gemaach.

Den LSAP-Deputéierte Franz Fayot, dee konnt d'Decisioun vun der CSSF novollzéien, och wann et a sengen Ae genuch aner juristesch Unhaltspunkte géing ginn, fir den israeelesche Bonds keng Autorisatioun ze ginn. Sou zum Beispill d'Avise vun der UNO oder ONGen oder nach d'Urteel vum internationale Strofgeriicht géint den israeelesche Premier Netanjahu. Datt de Lëtzebuerger Ausseminister nach e Méindeg gesot hätt, hien hätt näischt mat der Decisioun vun der CSSF ze dinn, huet de Franz Fayot als "politesch Abdikatioun" bezeechent.

Den David Wagner, Deputéierte vun déi Lénk, deen huet en Dënschdeg de Moie begréisst, datt d'Mobiliséierung vun de leschten Deeg géint d'Autorisatioun fir d'israeelesch Bonds "Friichte gedroen" hätt. A sengen Aen hätt d'CSSF sech zwar scho vill Gedanke gemaach, mee net genuch. Well a sengen Aen d'Decisioune vun der Finanzopsiicht Lëtzebuerg als Staat par rapport zum internationale Recht "bënnt".

De Parteikolleeg vum Ausseminister, den DP-Deputéierten André Bauler, huet just widderholl, datt d'CSSF keng aner "Handhab" gehat hätt, mee "déi eng oder aner Entwécklung" ëmmer méiglech wier. D'CSV-Deputéiert a Presidentin vun der Finanzkommissioun Diane Adehm sot hirersäits, et géing een elo en Datum sichen, fir de Xavier Bettel an d'Kommissioun anzelueden.

Bréif un Ausseministère 2 Wochen no Decisioun

En Dënschdeg de Moie gouf een och gewuer, datt d'CSSF dem Ausseminister den Dag virdru schonn e Bréif gemaach huet. Op d'Fro, ob d'CSSF net besser gehat hätt, dee Bréif virum 1. September an der Autorisatioun fir israeelesch Bonds ze maachen, huet d'Diane Adehm geäntwert, si kéint dat net "jugéieren".

De Finanzminister Gilles Roth, dee steet "voll a ganz" hannert der Onofhängegkeet vun der Iwwerwaachungskommissioun vun der Finanzplaz. Hie kéint awer d'Demande un d'Regierung verstoen, well et eng Fro vun internationalem Recht wier an d'CSSF net dofir responsabel wier.