De Prozess ëm d’Auere vum Geschäftsmann Flavio Becca ass en Dënschdeg virum Tribunal correctionnel ugaangen.

Wéinst dem Reproche vun Abus de biens sociaux an dem Verontreie vu Firmegelder steet de Baupromoteur a Sport-Investisseur Flavio Becca zanter en Dënschdeg viru Gericht an der Stad. De Parquet reprochéiert dem 58 Joer ale Promoteur seng Entreprisë genotzt ze hunn, fir Luxus-Aueren ze kafen. Dat kontestéiert de Baupromoteur.

Flavio Becca viru Geriicht / Reportage Tim Morizet

2010 gouf d’Enquête lancéiert - en Dënschdeg um 9.30 Auer war et den éischte vu sechs geplangte Rendez-vouse viru Geriicht. Déi éischte Kéier a Presenz fir de Flavio Becca.

Konkret geet et ëm de Kaf vu knapp 850 Luxus-Aueren am Wäert vu ronn 18 Milliounen Euro. Tëscht 2004 an 2011 gouf e Groussdeel vun den Aueren iwwer 18 Entreprisë vum Flavio Becca kaf. Dës hätten awer näischt mam deegleche Geschäft vun de Societéiten ze dinn, esou de Reproche viru Geriicht.

Ënnert den Auere waren ënner anerem eng Honnert Rolexen, nach eng Kéier genee esou vill vu Chopard an eng 30 vu Patek Philippe. Déi meescht Fournisseuren, also Bijouterien, waren am Ausland baséiert.

Am Prozess huet de Flavio Becca en Dënschdeg de Moie selwer kuerz geschwat. Hien hätt mam Kaf iwwert déi Lëtzebuergesch Entreprisë vu gewëssen TVA-Avantage profitéiert. D’Sammler-Auere wieren awer als Investissement kaf gi fir an e puer Joer vum méi héije Wäert ze profitéieren.

Dem fréieren Enquêteur vun der Police Judiciaire Jean-Paul Bohler no, den éischten Zeien an der Affär, wier den Dossier 2010 duerch eng Denonciatioun vun der Steierverwaltung an d’Rulle komm, well d’Aueren zum Deel als Fraise verbucht gi waren. Datt se an 3 Entreprisen als Frais Cadeau klasséiert goufen, hätt deemools zu Doute gefouert.

D’Police Judiciaire gouf Ugangs 2011 mat der Enquête beoptraagt. Am September, en halleft Joer méi spéit koum et zu der éischter Perquisitioun am Haus vum Flavio Becca. Grond fir de Retard, esou d’Ausso en Dënschdeg de Moien, waren d’Presse-Rumeuren, datt de Falvio Becca zu där Zäit bei Leopard Trek involvéiert gewiescht wier. Mat der Perquisitioun hätt ee bis nom Tour de France gewaart, fir déi sportlech Karriär vun de Schleck-Bridder net ze beaflossen.

Bei der Perquisitioun am Haus hätt ee gutt 600 Auere fonnt. Et wier immens schwéier gewiescht, d’Originne vun den Aueren ze retracéieren, esou nach de fréieren Enquêteur.

D’Luxus-Produite wieren net méi an der originaler Këscht gewiescht, an och Certificaten, déi d'Originalitéit beweisen, hätten net direkt bei d’Auere gepasst. D’Rechnunge wieren zum Deel ganz vage gewiescht. Eng Auer vu Paräis wier zum Beispill just als "Marchandise enlevée" opgefouert ginn. Vill Bijouterië wieren hei net ganz kooperativ gewiescht, heescht et nach vum pensionéierten Enquêteur.

Ronn 200 Aueren, déi net am Safe konnte fonnt ginn, waren am Virfeld un d'Famill verdeelt ginn.

Wéinst de Reprochë vum Verontreie vu Suen, riskéiert de Flavio Becca eng Strof vu bis zu 5 Joer Prisong an eng Geldstrof vun iwwert enger Millioun Euro.

De Prozess géint de Flavio Becca wier iwwerdeems 2019 bal vum Dësch gewiescht. Wéinst dem Depassement vun den "Delais raisonnables", festgesat vun der europäescher Konventioun vun de Mënscherechter, hat et an enger éischter Instanz geheescht, datt Delaie vun de Prozeduren depasséiert gi waren. An 2. Instanz hunn d’Riichter d’Infraktiounen awer zeréckbehalen.

De Virworf vu Korruptioun am Zesummenhang mat der Affär Wickreng Léiweng goufen iwwerdeems net vun Enquêteure festgehalen. Hei gouf et e Soupçon vu Korruptioun, well de Premier Jean-Claude Juncker a seng Ministere Krecké an Halsdorf e Projet fir e Futtball-Stadion mat Akafszenter vum Flavio Becca zu Léiweng ëffentlech ënnerstëtzt haten.

D’Suite vum Prozess ass e Mëttwoch de Mëtteg um 15 Auer. De Prozess ass op 6 Deeg ugesat.