D'Awunner vun der Gare dogéint géifen d'Patrulle vun enger Sécherheetsfirma an hirem Quartier begréissen, esou d'Ausso um City Breakfast.

Den Drogenhandel a seng Konsequenze suergen nach ëmmer fir grouss Frustratioune bei den Awunner a Geschäftsleit vun der Stater Gare, sou wéi bei de politesch Responsabelen. „Mir fillen eis wierklech am Stach gelooss“, sot d'Buergermeeschtesch Lydie Polfer nom traditionelle City Breakfast mat der Press.

City Breakfast / Reportage Annick Goerens

Eleng gelooss fille sech déi Stater Gemengenautoritéiten, well och no jorelaanger Demande nach ëmmer keng Léisung do ass, fir nohalteg mam Problem op der Stater Gare ëmzegoen. Drogéiert Persounen, déi an Entréeë vun Appartementsgebaier, Haiser oder Butteker leien an do och hir Geschäfter hannerloossen, een Onsécherheetsgefill, wann een besonnesch Owes duerch de Garer Quartier trëppelt an och vill Knascht dorënner eidel Sprëtzen an aner Drogenutensilie gesäit. D'Lëscht vun den Doleancen ass laang an net onbekannt.

Extrait Lydie Polfer

„Ech fannen nëmmen, zanter der Diskussioun, déi mer am Summer haten an der Chamber, wou versprach gi war, dass d'Police déi Moyene kréich, fir an deenen Situatiounen z'intervenéieren, wou Leit an den Agäng vun den Haiser sinn, wou d'Leit mol net méi an hir Haiser kommen, dass bis elo nach näischt do geschitt ass. An déi Leit, déi ebe vun der privater Entreprise do ënnerwee sinn, déi hunn där do Situatiounen déi ganzen Zäit gesinn. Ech erwaarden also wierklech, dass endlech eppes geschitt fir dass déi do Situatioune kënnen ënnerbonne ginn. Mir maache wierklech alles, wat mer kënnen. An nach eng Kéier, dat hei war fir eis een 'Hilfeschrei'“.

Well awer näischt geschitt ass, huet d'Stater Gemeng no Ofsprooch mat der Police jo privat Sécherheetsleit agestallt, déi zanter Dezember patrulléieren. An dat géing och vun de Leit begréisst ginn, seet d'Lydie Polfer.

„An mir fannen et einfach schued, dass virun allem Polemik do ronderëm gemaach gëtt. Et sinn der hei eng Rei, déi mussen intervenéiere. An do hu mer awer nach net gesinn, dass sech wierklech eppes beweegt. Dofir nëmmen zesummen. An wann ech soen 'zesummen', dat ass d'Police an dat ass d'Justiz an dat sinn déi sozial Institutiounen, déi mir jo ebe wierklech och matdroen. An dat ass och d'Santé. Nëmme wa mer zesummen an eng Richtung wierklech zéien, kann een déi Situatioun do op eng durabel Aart a Weis verbesseren.“

Et wär un der Zäit, der Police endlech z'erlaben, fir an esou Situatiounen z'intervenéieren, fënnt d'Buergermeeschtesch. Am Léifste géing d'Stad Lëtzebuerg nees eng Biergerversammlung organiséieren, fir op en Neits de Bols bei de Leit aus dem Quartier ze fillen. Duerch d'Pandemie wär dat aktuell awer natierlech net méiglech. Dofir lancéiert d'Gemeng elo e Sondage bei den Awunner vum Garer Quartier.

„Fir eben d'Leit ze froen, wéi se déi Situatioun aschätzen an ob se d'Impressioun hunn, dass eppes geschitt ass oder net. Ech géing am Léifsten nach eng Kéier dohinner goe mam Minister an dass alleguer déi Léit, déi wëlle kommen, dass se kéinten hir Meenung soen. Dat hoffen ech kënne mer dëst Joer och nach eng Kéier maachen.“

Enn des Mounts erwaart een sech d'Resultater vum Sondage, sou d'Lydie Polfer.

Weider Annoncen um City Breakfast

An Zukunft sollen all d'Busse vun der Ville de Luxembourg mat Kameraen equipéiert ginn. Dat wär keng Video-Surveillance, mä eng Video-Protektioun, präziséiert den zoustännege Schäffe Patrick Goldschmidt. Just am Fall wou eppes géing geschéien, géing d'Material och wierklech gekuckt ginn.

Bis den 23. Juni soll dann och d'Paräisser Plaz komplett amenagéiert ginn. Dofir si vun en Donneschdeg u massiv Aarbechten op der Plaz geplangt, déi och Ännerungen am Trafic matsechbréngen. Ënner anerem d'Zitha-Strooss wäert gespaart ginn. Den Detail fannt der op vdl.lu.

D'Buergermeeschtesch confirméiert dann och, dass et Iwwerleeunge gëtt, fir e Restaurant/Café opzemaachen op der Plaz, wou fréier de Buttek vun „Tapis Hertz“ war. Si verstoppt och net, dass si esou eng Initiativ géing begréissen, well aktuell wär jo och e Pop-Up-Store mat engem Café op der Plaz an dat hätt eng ganz flott Atmosphäre an d'Groussgaass bruecht, sou d'Buergermeeschtesch.