De Vott ass mat 31 zu 29 Stëmmen decidéiert ginn.

An der Chamber gouf e Freideg de Mëtten dat neiste Covidgesetz mat de Stëmme vun der Majoritéit ugeholl, déi ganz Oppositioun huet géint de Projet gestëmmt. Queesch duerch d’Parteie stéieren d’Oppositiounsdeputéiert sech un der Ausgangsspär, déi och mam neie Gesetz nees verlängert gëtt.

Vott an der Chamber - Reportage Fanny Kinsch

D’Reegelen am Sport an an der Kultur ginn e bësse manner streng gemaach, wat och vun der Oppositioun begréisst gëtt, och wann zum Deel der Regierung e Manktem u Koherenz reprochéiert gëtt. D’Terrasse gi méi kloer definéiert. Dat hätt een och schonn am Gesetz virdru misse maachen, sou eng Rei Oppositiounsdeputéiert.

Dass dat net geschitt ass, géif weisen, datt alleguerten d'Mesuren, déi envisagéiert ginn a Rou misste kënnen debattéiert ginn, sou den Deputéierte vun déi Lénk Marc Baum:

"D'Madame Lorsché huet dovunner geschwat, datt jiddereen drop gammst op deen nächste Projet de Loi, wou dann hoffentlech nei Ouverturen dra sinn. Och dat géif elo schonn erëm bedeiten, wann dat da sou wier, datt mer déi Optiounen op d'mannst um Dësch missten hunn. Domat hätt d'Regierung sech net verbindlech ausgeschwat, dass se déi Optiounen och géif zéien, mee op d'mannst hätte mer déi verschidde Varianten um Dësch leien, mir kéinte se diskutéieren a mir kéinte ganz vill Onkloerheeten am Virfeld aus de Féiss goen. Dorëms muss et awer goen, dat ass den allgemengen Interessi, datt d'Reegelen, ob ee se elo opportun oder net opportun fënnt, dat ass nach eng politesch Diskussioun, mee datt d'Reegelen, déi instauréiert op d'mannst kloer sinn."

De Marc Baum an och d'CSV-Deputéiert Martine Hansen hu sech iwwerdeems driwwer gewonnert, datt rezent Covid-Patiente vu Lëtzebuerg an d'Ausland hu misse verluecht ginn, well hei net genuch Material wier.

D'Gesondheetsministesch Paulette Lenert huet preziséiert, datt et hei ëm héich spezialiséiert Material géing goen.

"Dat ass eng kënstlech Long. Eng kënschtlech Häerz-Longe-Maschinn, déi am INCCI, där hu mer eng 4 Stéck am Asaz, mir kënnen dat op 6 eropfueren, e ganz héijen techneschen Equipement, wou mer als Land ganz gutt gestallt sinn a wou mer mat der Groussregioun zesummeschaffe schonn zanter laangem. Dat ass u sech an der Häerzchirurgie, wou dat agesat gëtt. Wann elo e Covid-Patrient eng Longefibrose mécht, da kënnt en och un esou en Apparat a mir hunn d'Chance där ze hunn. Mir hunn der souguer 3 déi ganzen Zäit reservéiert just fir Covidpatienten, et kënnt awer vir, datt mer saturéiert sinn, da ginn d'Leit an d'Ausland, dat ass vice versa, huet awer strictement näischt mat Covidmaterial ze dinn, mat Respirateuren."

Esou eng kënschtlech Long géing een och net vun haut op muer kafen a mat 6 Maschinne wier Lëtzebuerg scho gutt opgestallt, sou nach d'Gesondheetsministesch Paulette Lenert.

Dat neit Gesetz gëllt bis de 15. Mee. Den Text definéiert jo ënnert anerem méi präzis, wat eng Terrass ass an et sinn och liicht Ouverturen am Sport a bei der Musek virgesinn. Dat neit Covidgesetz gëllt bis de 15. Mee op d'mannst. Bis dohinner gëllen all déi aner Restriktiounen, wéi de Couvre feu an d'Besuchslimitatiounen doheem weider.

E pragmateschen an effikasse Politiker mat Visioune fir d‘Zukunft, awer och e Familljemënsch, mat deene Wierder hu seng Parteikolleege Fernand Etgen a Xavier Bettel de kierzlech verstuerwene Paul Helminger beschriwwen an engem Hommage an der Chamber hunn de Chamberpresident an de Staatsminister dem fréieren DP-Politiker geduecht a senger Famill hiert Bäileed ausgedréckt.

De Paul Helminger hätt als Staatssekretär an der Werner-Thorn-Regierung de „Modell Lëtzebuerg“ mat opgebaut, esou de Fernang Etgen. Hien hätt ëmmer e frëndlecht Laachen am Gesiicht gehat a wier iwwert d’DP eraus respektéiert ginn an hätt d’Leit inspiréiert", sot de Xavier Bettel.

"En hat seng Gemeng gären, mee et war awer och en iwwerzeegten Europäer. Et war deen, dee fir Europa plädéiert huet, mee deen och iwwert d'Grenze vu senger Stad gekuckt huet, wéi ee kéint mat den Nopere méi staark sinn. D'Quattropole, wou en d'Gemengen zesummegesat huet, fir ze kucken, weider ze kommen. An et war hien, wou ech d'Chance hat, an enger Majoritéit eng Kéier mat der CSV ze sinn an dunn an enger Majoritéit mat deene Gréngen ze sinn. An awer ëmmer gekuckt hunn, wéi mer d'Stad kéinten och weider bréngen. Ech muss iech soen, dass ech e laange Wee mam Paul gemaach hunn. Vun 99 bis 2011. An ech géif haut net virun iech stoen als Staatsminister, wann de Paul mer 2011 net d'Chance ginn hätt, Buergermeeschter vun dëser Stad ze ginn. Ech wäert dat och ni vergiessen."

De Paul Helminger ass de leschte Samschdeg am Alter vun 80 Joer onerwaart verstuerwen.